晌美孚依個小小社區，已有唔少茶記及快餐店，我同老婆嘅「我的星期六美孚早餐」多數都喺去依啲地方，夠經濟嘛，味道有時又偶有驚喜。今次，由姨仔主動叫落美孚食早餐，仲要喺萬事達廣場上面間星巴克，當然有興趣啦。
依間星巴克都開咗好幾個月，除咗晌曼克頓山有間Pacific Coffee，附近又有Wolf Den，就算計埋間McCafe，整個美孚區都唔算多正式嘅咖啡店，所以，相信間星巴克都有得做。由於鋪位細細，大多數都喺木枱木椅，難安置坐得舒服嘅大梳化椅，其他各方面就跟平常所見嘅星巴克差唔多。
![bowl]() 無花果榛子士干 $18
老婆跟姨仔都揀咗無花果榛子士干，有別一般常見嘅圓形，而喺做成三角形，而且都幾大件，面面放滿無花果乾及榛子碎。士干質感不俗，乾身得嚟唔會太硬，唯可惜士干內無加入任何果乾或榛子碎，否則整體口感更好。
![bowl]() 菠菜西蘭花芝士批 $25
芝士批烘焗得金黃，落單後會微微翻熱，雖然只喺微暖，總好過凍冰冰。批殼幾鬆脆，內裡填滿晒菠菜及西蘭花蓉，口感綿密，又帶有少少芝士香味。
![bowl]() 蜂蜜脆糖香橙星冰樂 $40
姨仔杯香橙星冰樂色澤非常搶眼，面層放咗唔少蜂蜜脆糖，飲又得，食又得，不過，無試過佢杯嘢，味道如何就唔知咯。
![bowl]() 蜂蜜脆糖朱古力咖啡星冰樂 $40
老婆要咗一杯本日推介咖啡，貪佢夠平，只喺賣$25（中杯）。而我就揀另一款新推出嘅蜂蜜脆糖朱古力咖啡星冰樂，小弟唔怕肥，當然唔好走忌廉，將忌廉跟星冰樂攪勻，啜一啖冰凍軟滑，咖啡味突出，爽呀！
聲價十倍，喺指比喻名譽地位大大增高嘅意思，相比起其他食早餐嘅餐廳，晌星巴克食個早餐，「星」價雖然無十倍咁誇，但要俾多一倍就走唔甩，始終晌度一杯咖啡都等於茶記嘅早餐價，但唔喺食完雞咁腳走嘅心態，而喺慢慢嘆，跟家人傾吓偈嘅地方！
個人評分
味道：8/10
環境：7/10
服務：8/10
抵食：8/10
平均每人消費：HK$55
餐廳資料：
星巴克咖啡 Starbucks Coffee
美孚美孚新村萬事達廣場1樓
2371 4275
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
