|
食物款式多選擇 - 捧腹而回
|
|
Hunger Hunter
2015-02-07
210
0
|
分享
收藏
最近天氣回冷，朋友們都興致勃勃要約食雞煲，等個肚仔儲返脂肪過新年。 相約在元朗，在元朗地頭蟲推介下，我地一行數人就去左爺爺雞煲皇，食餐勁既暖下胃。 好彩七點半去到時唔算多人，食店望落好乾淨，而且好光猛，感覺很好。加上裝潢都幾新，碗碟餐具好有特色，係白中帶藍，具中國風又不俗氣，所以黎到特別開心，坐得都分外舒服。 去到侍應已經好細心咁介紹，又好有禮貌地招呼，真係有種賓至如歸的感覺。 招牌雞煲(大：$198) 一黎到既時候侍應即刻好細心幫我地搞勻佢，仲提我地轉頭會幫我地開蓋，又叫我地小心熱，非常體貼。 開蓋時真係令我地嘩言，好香好香既雞汁味，聞得出好香濃，加上我地好肚餓，所以已經爭住夾Ｄ雞黎食。食落口就知無黎錯，因為Ｄ雞真係好滑，食落去啖啖肉，雞皮都幾薄，忍唔到口的我決定食完再減！ 叫左個小辣，辣味啱啱好，食雞煲最興奮就係：食到Ｄ麻辣將兩片嘴唇麻痺，麻椒的味道滲哂落雞肉度，但係又唔會過麻或過辣。由於呢個雞煲湯底好濃，所以食到既雞都好入味，香濃雞汁中有種辣既感覺，一流！ 手切本地肥牛($128) 推介!! 牛肉肥瘦適中，見到一條條紋既高質素肥牛實在少見。 而且都幾厚切，淥8-10秒再一啖食左佢簡直完美，又滑又嫩，食落去唔會起哂渣，加上肥牛吸左麻辣雞汁味，多重口感衝擊味蕾，鍾意食牛的朋友絕對要試下。 好特別的雞煲火鍋店有炒飯食，鍾意試新野既我地當然要試啦。 爺爺招牌炒飯($58) 明知炒飯係落唔少油炒，但係呢度爺爺炒到粒粒分明，乾身唔痴埋一舊既炒飯真係令人愛不釋手。食落有ｄ咸咸地既菜脯，仲有肉粒同三文魚粒，講真呢個價錢食到咁足料既炒飯真係好抵，平時無飯不歡既一定要叫碟開心share。 大刺身拼盤($178) 同樣地，食雞煲有海鮮絕對唔奇，但顧及愛食日本野的朋友的爺爺雞煲有埋刺身就好難得。 原本驚中伏，所以唔敢叫特上拼盤，但呢份拼盤一黎到我地就知擔心係多餘！呢度既刺身賣相絕對不比一般日式餐廳差，而質素亦都比出面好，全部厚切已經唔係重點，食落去食得出鮮甜味真係令人驚喜。食完熱辣辣雞煲再食新鮮刺身，胃仔表示非常滿足呢。 三寶丸($78)，牛筋丸($48) 食牛筋丸食到入面彈得黎咬落好有口感既筋一直係筆者至愛，呢度既丸仲要食落好彈牙，吸收完雞煲精華，咬落去必左ｄ肉汁出黎，令人諗起電影裡面出哂名的星爺牛丸。 肥鵝腸($78) 真係好肥，睇到ｄ脂肪多到流出，令熱愛鵝腸的朋友嘖嘖稱奇，畏懼脂肪的朋友耍手擰頭。筆者試左一條，脂肪真係好滑，係喉嚨度會自己流落去，而且ｄ脂肪好香，好似食緊膠原咁潤。記得唔好淥太耐，兩三秒啱啱好。 總括黎講，爺爺雞煲皇價錢同出面相差不大，但質素水平絕對超乎出面的火鍋店，不足係元朗地方較遠，希望快ｄ開多ｄ分店啦，但絕對值得大家入去食一趙！
感謝 Hunger Hunter 提供以上資料 Hunger Hunter 的網誌: http://www.openrice.com/zh/gourmet/reviews.htm?userid=50295832&city=hongkong
|
~END~
| 商店 | (已結業)爺爺雞煲皇 |