|
祝你新婚愉快
|
|
技巧樹熊
2015-11-03
393
0
|
分享
收藏
| 當你到了某些年紀，你總會有一段時間，會經常收到請帖。 大約在三十歲，或者是三十幾的時候，我們會步入了人生中的囍帖街，無論係中同，大學玩的損友，小時的玩伴，紛紛向你投出最真摯的紅色炸彈。 雖然每次銀包都炸過稀巴爛，然而我們都會開心地做人情，畢竟找到另一半邊生命，需要的係勇氣，愛和承擔。 十一月，盲年前的今個月，喜帖，第四張，不過，值得快樂的是，在五兄弟當中佢係最快跑出的一個，而且，經歷了不時風浪，如果你是過來人，你會知道跌跌碰碰也是找不到適合的人的經歷，你會更為朋友最終去到呢步而感動。 當然，之後嘅事，無人能保證，但做人就是要向前看向好看，我不會認為你們婚後定必像那些童話故事，快樂收尾，那些婚後的細節，也不是怎樣重要，因為愛要體諒和容忍，我的朋友是一個好好先生，請你好好照顧他。 朋友十一月結婚，今晚派帖飯局，呢幾個朋友食飯冇乜所謂，最重要係平靚正，本身想食日本放題，一班男人任吃任砌是最抵，但星期五的晚上，人一定多，我不想一係六點一係八點食飯，於是拒絕蒼井空的邀請，我要食陀地。 係天祥，愛文生和妹記間，佢地選擇了妹記，我在尖沙咀寫過一篇推理要在晚餐後，我說過妹記午餐的水準真的是不堪入目，一於就試埋晚餐水準有冇跌watt。 呢個係旺角新分店，之前吃過呢座大廈的韓國菜，不錯，聽聞盛八的任食飛驒牛是不錯的，可惜上次朋友去約食極冇影，可能冇緣份啦，第二次來這裡，吃的卻是本地大排檔的勁旅。 星期五的晚上，等位是常識吧，等了十多二十分鐘，翻枱算快，是港人一貫速度，也是大排檔的真諦。我的遲放工，讓我可以直入，有時候壞處就出奇地成為好處，這就是人生，你永遠唔知道那是壞是福，就正如如果你還未步入囍帖街，還未找到你的另一半，可能幸福在等著你，轉角就會遇上愛。 四個男仔，當然叫點粗獷的食物，係食飯前，飲杯少不免，戰鬥碗又點少得，這是妹記的名物signature，冰凍的碗裝著啤酒，未飲都知涼快，那個我們一起溝女的年代已過不復在，只有幾個中年阿叔拿著戰鬥碗，話當年那終將逝去的青春。青島純生，又抵又好，佢結婚要用錢，我做人情又要錢，都係飲得經濟點。 朋友說要吃羊腩煲，記得幾年前羊腩煲還是一百五十元的年代，現在連羊都像股票升值一樣，二百幾蚊，羊腩也算大舊而肉厚，那種麻甩的羶味不是外面吃羊扒的感覺，一班人，你一舊大的羊肉，我吃我愛的枝竹，那種佬味，只可意會，不能言全，送兄弟最後一程，呢個係必點項目。 還有一定會送的生菜，加上羊肉汁，就是引人入勝，希望你以後都食得清清地。 南乳香酥骨，這些小食佐酒一流，不過唔係好大舊，真係以吃骨為主，如果你喜歡啖啖肉，對不起，不是你，飲杯酒，下個可能更適合你，愛情的人生，不好就要換，不是你杯茶，唔會由龍井變菊花，唔好拖，愛情第一信念，如果還為了那些美麗動人的時光，而去結婚生仔，謝安琪都話不用回看，你看黎把托。 朋友叫了黑椒薯仔黑柳粒，坦白說，真係唔係好得，以做得最好黑椒薯仔黑枊粒的愛文生有九十分來說，呢到我只俾五十分，薯仔古怪，冇乜黑椒味，也不特別好吃，還有點硬，牛肉就有點如更年期的人，老而韌，以大排檔和小炒來說，僅合格，就如愛情，放久了就過期，炒得太熟會變質。 我說過，去大排檔要吃大鑊氣的炒物，豉油皇炒麵係必選，就如如果你要測試你老公的忠誠度和可靠大概你用林志玲來做測試錯不了好遠，豉油皇炒麵炒得乾身不留一點油，每條都充滿廚師的火氣，我就是喜歡這種粗獷，吃到落口吃到是廚師的溫柔，對你口腔能賞美食的愛和關懷。 咸魚蓉飛天通菜煲，這個又是我的飛佛，還未到秋天仲有機會吃通菜就握好機會，我喜歡的是通菜的爽口，雖然有點油同鹹，但可能是咸魚蓉的關係吧，我愛的，就算幾多缺點也是我愛的，愛是什麼，愛就是這樣不怕鹹也會把菜全清理還要高呼好吃的，這就是愛。 最後叫了鴛鴦炒飯，穩定的選擇，點都唔會太差，茶餐廳大排檔呢啲唔好食，你不如執左佢啦。叫呢個飯作結，鴛鴦炒飯，以兩種唔同味結合起來，陰陽調和，乾坤平衡，男女交合，就係鴛鴦炒飯的真諦，你和我本是兩個不同個體，但同一屋簷下，以後無分彼此你我，就如碟飯一樣，最後兩個味出奇地夾，係家傳户曉的一對，如果我祝福你們，我希望你地像鴛鴦炒飯一樣，永不分離。 個多小時，吃得開心，談得開心，恭喜哂你，我地五個朋友第一個找到半邊生命的兄弟，希望你以後也會珍惜呢個鴛鴦炒飯。 阿嫂，可能佢有唔好嘅空間，不過，我會幫你睇住佢，以後佢都會好乖，請放心，個日我會好早到。 唔好講咁多，飲勝，祝你新婚愉快，Steve Lee。 妹記大排檔 Mui Kee Cookfood Stall 旺角通菜街1A-1L威達Deli 2商業大廈2樓B舖
感謝 技巧樹熊 提供以上資料 技巧樹熊的網誌: http://www.openrice.com/zh/gourmet/reviews.htm?userid=718688&city=hongkong
|
~END~
人均
$160.00
| 商店 | 妹記大排檔 Mui Kee Cookfood Stall |