|
[親子旅遊] 金鐘 立法會兒童學習室 Lecgo Children’s Corner 添馬公園 Tamar Park
|
|
kimfamilytravel
2015-11-01
1007
0
|
分享
收藏
今日嚟咗個充滿「黃」色回憶嘅地方！係立法會
哥哥第一次聽錯係「垃圾會」其實哥哥都唔算係聽錯嘅...哈哈哈！
雖然佢哋仲細唔會明白今日的政治問題，但係從小俾佢哋認識吓呢個社會嘅運作
到將來長大後再有自己嘅態度同立場
我哋今日完咗教會聚會慢慢歎咗個晏！ 跟住就由尖沙咀搭港鐵搭一個站到金鐘就落車啦 跟住到海富中心A出口，一上嚟就已經有清晰指示叫人U turn 
然後上扶手電梯上天橋
穿過天橋就即刻會見到「門常開」
即刻兩個跳起影番張相！
穿過個「門常開」我哋就向住海旁方向行到添馬公園
跟住路過見到塊大樹葉兩個小朋友即刻爬上去玩
老實講瞓喺呢度都真係幾舒服
然後我哋搵到一個冇咩人嘅大草地就安頓喺度踢波
雖然有少少曬，但係因為天氣都乾燥同埋近海幾大風
其實周圍都係工人姐姐，唯獨是呢邊草地係冇人(因為咁啱太陽正正曬緊呢邊)
隔咗一陣其實就已經冇咁曬，太陽落山速度好快！
吹吹吓Bubble有個小妹妹過嚟望住，佢眼神好似好想一齊玩咁！
跟住紫柔姐姐拎住俾佢吹咗幾下，都離開嘅時侯個小妹妹主動同姐姐講「拜拜」
我覺得成個場面好Warm，小朋友之間真係唔駛太多言語表達就可以溝通到
那邊廂哥哥都係繼續喺度同叔叔踢波，都唔知爹哋媽咪去咗邊！>.<
跟住同哥哥行咗去海旁吹吓風睇吓風景
哥哥好盡情咁瞓喺一大個草地度
好舒服咁嘅樣喎！
差唔多時間啦！我哋預約咗4:00個場兒童學習室
我哋大約3:45就先入去預備，因為職員姐姐電話同我講
話因為安全問題要先通過保安檢察，所以叫我早少少入去
其實好似機場過關咁，放低袋去輸送帶過紅外線機
然後俾保安用掃描機全身上下掃一掃，跟住就可以入去立法會啦
入到去裡面見到大堂上面有個藝術裝置喎
好得意全部都係巿民生活嘅剪影
仔細D睇見到有人耍太極，有地盤工人推泥頭車
入到嚟第一件事就係去接待處登記拎番張訪客證
跟住同小朋友去哂厠所攪掂哂先入去聽故事
喺另外一邊係立法會個大招牌！大大個「立」字
芊芊唔肯過嚟影所以冇份lu....
希望你哋長大成人後真係可以好似個「立」字！做自己喜愛的事，意志堅定！
呢度都幾好配套，對於我哋呢D家庭型訪客就最窩心
又有幼兒護理室，又有母乳餵哺室！仲有個餐廳喺度
可以話個兒童學習室附近有齊你所需要嘅設備
鏡頭轉過嚟就係我哋今次要去嘅兒童學習室啦
大家要嚟記住早D(可3日前至4星期前預約)致電(852) 3919 3399或親臨立法會綜合大樓的大堂接待處預約
其實兒童學習室的講故事環節只係其中一項選擇，其實仲有遊戲活動環節(我哋今次選擇咗講故事環節)，但係每位市民每日只可預約一個學習環節
所以其實我覺得好麻煩，因為除咗兒童學習室的「講故事」及「活動」環節，大家仲可以預約導賞團，這個是帶你參觀立法會的導賞，這個則要登入以下網址預約(可以3日前至90日前)
希望大家睇得明白，換句話說大家一次只可以預約「導賞團」+「講故事」或「活動」環節
如果要去哂的話至少都要分第二日再嚟過，同埋網上預約只有「導賞團」，另外「講故事」及「活動」環節只接受電話及到場預約，超..........亂
所以我下次會預約埋「導賞團」+「互動學習活動環節」
學習室唔算大，好似一個兒童圖書館
時間一到先有姐姐叫各位小朋友用捽手液先乾淨對手先
以後入去排排坐係墊上面準備要聽故事
芊芊都唔知佢聽到幾多！其實佢仲有幾日先三歲，所以佢係偷雞報名㗎！
姐姐講嘅係一個動物村的故事
故事大約係講有動物整污糟條河
跟住要立法禁止人再污染河流同埋動物們齊心清潔番個河
姐姐雖然好落力咁去聲演每一隻動物，但係每隻動物嘅聲都好似一樣咁...滴汗
果然係冇受過專業訓練...同埋佢講嘅時侯好緊張，對住咁多家長自己都覺得怕醜
學習室內仲有其他遊戲咭及圖書之類的東西
應該就係報名互動學習活動環節時用嘅
每個小朋友都聽故事聽得好入神！其他父母就只係喺度撳電話
我最唔贊成各位家長咁樣，你哋唔係帶個小朋友嚟呢度就交俾姐姐
自己都成機玩電話囉！希望你哋唔好咁現實啦，同小朋友一齊投入吓好無
跟住姐姐同各位小朋友一齊都嘗試立法
法案係要準時瞓覺！貼紅色葉代表不贊成...(邊個小朋友咁醒貼咗紅色葉)
芊芊都走咗出去貼咗塊綠色葉表示贊成...
但係佢成日晚晚都唔願瞓
最後都有張證書派番俾小朋友
如果有埋佢哋個名會仲好囉！
之後完咗我哋就出番去海旁嗰邊嚟個輕食
唔好以為係海邊嘅餐廳一定好貴
點知原來唔係你咁諗
呢間叫「愛烘焙輕食站 iBakery express」原來係社企，由東華三院成辦
所以店裡嘅嘢食都唔算貴，都係$30-$50不等
我哋叫咗兩個飽餐，一個牛肉漢堡一個係吞拿魚
每個餐仲可以跟埋薯角或者沙津同埋一杯嘢飲
算係咁啦！！！我哋食完坐吓Hea吓差唔多六點就拜拜番歸囉
Photo by CANON 5D Mark III, Len | EF 24-70mm f/2.8L USM
呀劍評分: 6分
呀劍評語: 如果獨立對這學習室的評分, 就不算太高, 因為我覺得他們所設的環節及預約流程都可以改善! 但係加上立法會外的大草地及海旁, 可在這玩樂及下午茶都算係一個不錯的節目
立法會兒童學習室 簡介
兒童學習室為三至八歲的兒童提供各種教學資源，透過書籍、互動遊戲、學習教材套，為兒童提供輕鬆而活潑生動的環境，讓他們體驗立法機關的運作。
地址
香港中區立法會道1號立法會綜合大樓
開放時間
由於開放時間及其他活動可以個別預約，所以未能在這裡詳盡記錄，建議參閱提供網址
交通
網址 http://www.legco.gov.hk/chinese/education/teach_children_corner.html 3919 3441 (以上資料更新至文章當日)
感謝 呀劍萬帥 提供以上資料 呀劍萬帥的網誌: http://kimfamilytravel.blogspot.hk/
|
~END~
| 商店 | 立法會兒童學習室 |