|
200分的人情味
|
|
mohkc
2015-11-18
415
0
|
分享
收藏
| 香港有好多類似大角咀嘅地區，新舊社區交雜，對於中間嘅過程，有人欣然接受，亦有人耍手擰頭，有人鍾意亦有人唔鍾意。無論過程係點，企返係成長嘅一區，都會令人懷念細細個嘅樂事，但同時又會慨嘆呢個社會比以前更加冷漠，人情味又仲有幾多。
今日經朋友大力推薦，黎到大角咀嘅金船長餐廳同親愛的享受浪漫嘅一晚。 餐廳門面貼滿多份傳媒嘅報道，仲有openrice 200個好評証明！呢個已經最好嘅宣傳啦！餐廳近大門位置都有啲光，可以影返啲靚相，枱就由二人至八人都有，人多人少店員都會幫你安排。Dinner Set價錢$158，其他主菜加$28有餐湯或飲品，仲可以用優惠價叫甜品，Pizza款$108-168，下午菜餐$34-42，食物價格都好吸引! 蕃茄海鮮清湯 海鮮清湯嘅做法複雜，步驟繁複，不過海鮮種類就可以隨你心意，呢款湯就有蝦仁仔、魷魚同蜆肉，酸酸甜甜嘅蕃茄非常開胃。 甘荀忌廉湯 忌廉湯香滑，醫學證明，每日食用三條甘荀有助你遠離心臟同腫瘤病，胡蘿蔔素係強力嘅抗氧化劑，可防止細胞遭受破壞而引起癌病變，亦能幫助預防早衰同白內障 ，同時甘荀係可溶性纖維，可降低膽固醇! 黑松露菌醬意式馬斯卡醬芝士夾心Pizza 6吋 $108 店員對菜式同用餐安排都好熟練，完全感受到佢地嘅專業同積極，先黎個金船長餐廳招牌菜 黑松露芝士夾心Pizza，外層鬆脆，有啲似像燒腩肉脆皮，上菜個時講解埋獨家嘅三款食法，一、乜都唔加，就咁食，香濃芝士配埋誘惑無比嘅黑松露，唔食實後悔！二、加少少提子醋，半分嘅甜味亦都帶到另一種味道。三、夾埋啲豆苗芽一齊食，味道會比較清，層次豐富，食開清淡嘅就啱晒。 法式寶雲穌焗羊架 配意粉$158 羊架係用羊嘅肋脊部份，肉質鬆軟，脂肪唔多肥瘦適中，寶雲穌嘅調味包括麵包糠、百里香同法式黃芥辣等，搽上羊肩架，放入焗爐直至五成熟，保持外脆內軟，切開嗰陣可見顔色粉嫩，成個味道好配合，意粉就未有調味，店員都有問多句要唔要醬。 香煎老虎蝦配龍蝦汁意大利飯 $148 兩份主食都配黑松露法包，似切鮮牛肉嘅蝴蝶切，返起兩面令面積更大，上面搽咗黑松露醬，香氣撲鼻，薄薄嘅法包食起黎似薯片，如果有得外賣就好，嘿嘿，老虎蝦放咗香料再煎熟，味道唔錯，意大利飯吸收咗所有龍蝦嘅精華，帶黎非一般嘅鮮味。 金船長梳乎里 朱古力味 加餐加$28 對待新顧客會同老顧客一樣咁熱情，對老顧客會同新顧客一樣咁周到。老牌嘅餐廳就建立到呢種關係，同顧客有深層次嘅情感交流。因為工作，好多時食飯食到一半已經攰攰地，咁啱店員見我打咗個喊露，就講笑話甜品好快就得，我地揀咗招牌梳乎里，有別於一般食開嘅，呢款表面好有光澤，熱辣辣上枱 脹到似個波咁，放入口香噴噴嘅蛋白味好似陣風咁走咗，但味道依然係味蕾之間環繞。 網絡社交係人際關係嘅另一種模式，我地嘅朋友應該係多咗而唔係少咗，交流應該深入咗而唔係膚淺咗。不過你手機上嘅聯絡人有幾多係有聯絡過？你臉書上嘅朋友有幾多又係你真正嘅朋友？係網絡世界，搵個傾訴對象一啲都唔難，但要記住人與人之間聯繫唔單只係打幾隻字就得。老人家嗰一代感情好，好多時係因為遠在兩地，除咗書信，就只有電話。可以聽到親人把聲，其實遠比今日幾隻字滿足得多。 平均消費$ 258，2位，2個set + 1杯飲品 金船長餐廳 Golden Captain Restaurant 星期一至日:11:00-23:00 大角咀大全街55號3A 港鐵奧運站 B 出口, 步行約7分鐘 Tel: 2381 7369
感謝 mohkc 提供以上資料 mohkc 的網誌: http://www.openrice.com/zh/gourmet/reviews.htm?userid=717759&city=hongkong
|
~END~
人均
$258.00
| 商店 | 金船長餐廳 |