抱歉,發生點錯誤。
重新載入
Essence:極速午餐
山區麵包王
2015-11-22
1109
0
分享
收藏
事緣教會搞咗個東涌半日遊,所以有機會嚟到諾富特嘅Essence食自助午餐。不過,又因配合番教會嘅主日時間安排,以及因為人數眾多(4架旅巴共二百幾人),幫手做埋車長,即喺幫吓手扶老携幼兼安排吓秩序咁,所以,未試過45分鐘內食一餐自助餐,認真極速。
Essence我都喺第一次嚟,餐廳環境唔錯,裝修如一般酒店西餐廳,無乜太多花巧裝飾,但勝在夠大夠闊落,樓底高,所以,空間感強。
食物區集中晌餐廳嘅左側,而右側就喺大部份用餐區。今次真喺無乜時間慢慢影相,兼且一下子成二百幾日嚟到,都唔太方便影,因為度度都人頭湧湧,哈哈。此外,搵食策略就喺要快,一啲多人排嘅熱門食物就無謂嘥時間排。
今餐食得唔算多嘢,所以對個自助餐嘅評語未算好全面。好似一啲凍海鮮、魚生、大部份熱盤就無試喇。以下相片,都喺等差唔多離開時,人潮過後先補影番食物區個環境!
bowl沙律、冷盤
照慣例,第一轉就喺食沙律開開胃先,沙律嘅選擇都喺大路嘢,但足夠砌一大份靚靚煙三文沙律。沙律菜好爽脆冰涼,薯仔、紅菜頭、車厘茄、南瓜……都好甜美,配上油醋,糝多少少煙肉碎,實在喺一份滋味前菜。
bowl餐湯、麵包
餐湯一中一西,前者喺青紅蘿蔔煲豬骨,聽其他人講夠老火,好飲;小弟就揀後者南瓜湯,水準平穩,自行加少少忌廉,務求口感更柔滑。
bowl即煮意粉、烤西冷
周圍人頭湧湧,見意粉檔無乜人,就先嚟一碟意粉打打底。即煮嘅雜菌墨魚麵配忌廉汁,味道唔錯,但意粉有少少煮過籠;見隔離烤西冷又無乜人排,順手加多兩件西冷配點燒汁,西冷好食喎,外皮位帶點脆,肉質頗腍滑;路經熱盤區,夾多兩件軟腍微羶嘅羊柳,再配啲芝士烤薯為伴菜,手多多拎多幾件凍蝦,依道主菜夠豐富喇啩! 
bowl甜品拼盤
時間關係,已經去到食甜品嘅時候,時為兩點有多,甜品款式都被人處決得七七八八,為滿足小弟嗜甜嘅性格,只好有咩擸咩。布甸、慕絲、奶凍、芝士餅、朱古力餅、泡芙、冬甩……樣樣執件,整體質素屬中上,只喺款式普通。
bowl即磨咖啡
餐廳供應自助啡茶,食甜品,點都配番杯咖啡至得嘅,雖然唔喺咩鮮奶咖啡、意大利泡沫咖啡,但話晒都即磨,幾芳香。
bowl生果碟
多得朋友夾一大碟生果返嚟,作為臨尾衝刺,晌極有限嘅時間內掃多幾件飯後果。
雖然,所試嘅食物唔多,但概略行過一圈,食款嘅質素唔多貴價食材,款式亦偏向大路,即喺唔會有咩驚喜俾到你,叫做穩穩陣陣又一餐。或許今餐真喺食得幾趕,不過,幫到大家晌車務上有個好秩序,令大家有個愉快嘅下午,食幾多都喺好小事嘅。好喇……把握時間,出發去下一站,就喺廸士尼……隔離個湖,哈哈!

個人評分
味道:7/10
環境:8/10
服務:7/10
抵食:8/10
平均每人消費:HK$150(註:教會津助收費)

餐廳資料:
Essence
東涌文東路51號諾富特東薈城酒店大堂
3602 8808 / 3602 8888


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
商店 Essence