抱歉,發生點錯誤。
重新載入
金記冰室 Kam Kee Cafe:當年金日
山區麵包王
2015-12-01
1351
0
分享
收藏
亞視雖然弱,但偶有佳作,其中一個幾分鐘嘅資訊節目「當年今日」,顧名思意,就喺想當年嘅同一日,世界發生咗咩大事。今晚同朋友嚟到「金記」食餐便飯,睇見啲「西瓜波」就即刻想起當年今日撻拖鞋踢波嘅情景。
晌西環重開嘅金記未有幫襯過,嚟新開嘅灣仔店就貪其就脚方便。一室裝修大賣懷舊風,亦喺唔少人特意去幫襯嘅誘因。我依等中佬,睇見咁多懷舊嘢,自不然回憶起唔少以前細細個嘅片段。
翻開盞鬼嘅「乒乓波拍」餐牌,第一版就見到金記嘅介紹,緣來緣去,晌度唔多寫,自己睇睇!
以前啲冰室,都喺賣三、五、七類嘢,邊似依家嘅茶記,十項全能乜都有。所以,金記自詡為冰室,實質如茶記般有過百款食物選擇,由早餐、常餐、小菜套餐、沙律餐、懷舊套餐、馬來咖喱、公仔麵餐、懷舊學生餐、精選焗類、意粉、碟頭飯麵、薯條、三文治、多士、漢堡包、新鮮蒸魚套餐、小食、冷熱飲品,到懷舊特色飲品……等等,一應俱全,不愁無嘢啱食!
本來試吓佢嘅炸雞髀、沙律,回味吓「銀禧小食店」年代嘅味道。不過,遇著佢有啲冬季新嘢,朋友就話要貪新鮮試新嘢。廚師冬季精選,有4款小菜選擇($88-$118),另外仲有一個臘味精選套餐,共5款臘味飯選擇($55-$78),兩者都包中湯或西湯,跟茶啡,凍飲加$3,轉特飲加$10。小弟就甚鍾意食咖喱,所以,揀咗一客馬來咖喱,包是日例湯或羅宋湯,跟茶啡,凍飲加$3,轉特飲加$10。
bowl西湯:羅宋湯(跟餐)
依家大多數飲到嘅羅宋湯色澤都比較清徹,但晌度飲到嘅就杰身啲,色澤較橙,蕃茄味偏重,似喺較落茄膏多,但酸香度都OK嘅,又有大量蔬菜,辣多少少就更合個人心水。
bowl是日例湯:南瓜煲唐排(跟餐)
老友喺中湯粉絲,所以,揀是日餐湯。個中湯夠老火,足料無欺場喎。
bowl馬來咖喱牛腩農夫一口包 $89
晌餐牌上,有一組叫農夫一口包,另一組叫農夫包,都喺咖喱菜式,好奇問吓店員有咩分別,佢都笑笑口話無分別,真搞嘢。
原個大農夫包裡面有炒飯,有牛腩,面頭有一朕咖喱汁及芝士,烘得賣相好吸引,唔使擔心唔夠咖喱汁,因為仲伴有一小兜任撈任點。最好嘅食法就梗喺先食個麵包頂,非常香脆,沾沾咖喱,咖喱帶有香料味,香濃好食。而內裡牛腩炆得好腍,入口鬆化,貪得意夾埋啲麵包,再滔多少少咖喱,真喺超正。
bowl火噴噴鴛鴦雙雞煲 $88
有幾火噴噴,純粹因為煲仔上,夠晒滾熱辣。雙雞就喺雞件同田雞,前者有啲嚡,煮得過火咗,後者就好嫩滑,只可惜份量少,內裡仲有啲豬潤添。然而,以豉椒爆,夠晒惹味。
bowl黑松露臘味炒飯 $78
臘味炒飯向來油香惹味,加埋黑松露相信更添香。炒飯做得唔錯,飯粒爽身,充滿臘味香味,食落又唔太油,不過,黑松露味明顯被臘味所掩蓋,唔多突出,只喺隱約咁食到啲松露香,未有預期咁有層次。
講明賣懷舊,當然唔少得好多懷舊嘢飲,如滾水雞蛋、杏霜、保衛爾牛肉汁、黑牛、白雪公主……等等,不過,少咗金牛喎(芒果雪糕加玉泉忌廉)!
bowl熱奶茶(跟餐)
雖然咁多懐舊嘢,但嚟到茶記奶茶都喺小弟首選。杯奶茶幾夠茶香,可見茶膽不俗,奶同茶嘅比例亦恰到好處,只喺稍稍欠細滑。
bowl熱菜蜜(跟餐)
開始入冬,朋友就揀熱菜蜜潤一潤,好讓喉頭舒服一下。
bowl保衛爾牛肉汁
另一位朋友話未見識過咩喺牛肉汁,膽粗粗試番杯。淺嚐一小啖,味道就無牛味啦,反而有少少似飲無咗甘苦味嘅涼茶,咁即喺唔喺涼茶啦?真喺有少少難形容嗰陣味。
香港近年多咗依類懷舊冰室,只可惜真正嘅舊冰室買少見少,執一間就少一間。真喺唔知幾多年後,冰室成為當年今日嘅事!

個人評分
味道:7/10
環境:7/10
服務:7/10
抵食:7/10
平均每人消費:HK$85

餐廳資料:
金記冰室 Kam Kee Cafe
灣仔天樂里6-18號恆安大廈地下D及E舖
2202 4168


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
商店 金記冰室 (灣仔店)