終於喺灣仔食倒一個有Heart 嘅茶記早餐
|
|
井底龜龜
2015-11-15
1906
0
|
分享
收藏
第三日去會展,亦唯獨今日先唔係一支冷去會場,約左朋友食完早餐先去試酒! 最近兩個月喺灣仔都食過幾次早餐,除左一次係OK 之外,次次出事!連一啲比較穩陣嘅連鎖都瀨野,所以今日由陀地帶我覓食,希望食倒較為正常嘅早餐。 同朋友講早餐我做東,諗住佢會帶我去特色啲嘅食肆食啦,點知佢帶左我去一間叫金堡茶餐廳嘅茶記。佢話呢頭嘅早餐,佢最信得過。 好啦我同佢叫嘅野一樣,沙爹牛肉麵配腸仔蛋牛油方包,我要炒蛋,佢要煎蛋,餐飲我要凍檸茶,朋友叫左凍奶茶,每人盛惠HK$30 大圓。 幸福原來好簡單!其實一啲普通嘅食物都可以食倒幸福嘅感覺,大家睇圖我諗都睇倒個麵淥得幾靚仔啦,沙爹牛肉又深色,食落個麵淥得啱啱好,無生骨!家陣都唔知點解好多茶記都張啲麵搞到極度Al Dente , 即係淥得極不透心,淥一陣就擺落碗度,有啲直情揚散個麵都懶。做到呢度咁軟硬適中已經係好少!沙爹牛肉個醬好好味,牛肉疏打落得好適中,唔會過焾。 我嘅腸仔蛋到喇,腸同包都正常野,特別一提係個炒蛋,好滑呀! 火候控制得好,一啖食落口,已經食倒份Heart。 總結: 終於喺灣仔食倒令人感動嘅誠意早餐。其實一啲普通嘅食材,用心去煮,亦可以好動人。
感謝 井底龜龜 提供以上資料 井底龜龜 的網誌: http://www.openrice.com/zh/gourmet/reviews.htm?userid=59113883&city=hongkong
|
~END~
人均
$30.00
商店 | 金堡茶餐廳 |