|
Playa de Papagayo：再遇西班牙之味
|
|
山區麵包王
2015-12-26
999
0
|
分享
收藏
早前晌西環嘅Chico Chica品嚐過一餐味美嘅西班牙菜，仲喺記憶猶新之際，今日同朋友嚟到尖沙咀嘅Playa de Papagayo食晏，同樣以西班牙小食（Tapas）掛帥，但就同時兼賣唔少意大利菜式。雖然聖誕啱啱過咗，但與老友相聚，只要心情好，一樣可以好似過節日咁開心！
餐廳周六、日及假期嘅早午餐時段（Brunch, 12:00pm-5:00pm）正正做緊正價餐牌嘅七折，點菜就可以更手鬆。不過，餐廳所指嘅時段，我就覺得喺午餐及下午茶時段喇（Lunchea）！
優惠又豈止於此，人頭計加多$118（要點選食物及只限於12:00pm-4:00pm）就可以任飲紅酒、白酒或氣泡酒（Cava，只有法國出產先可以叫香檳），啱晒酒鬼。當然，好似我哋唔喺個個都咁飲得，散點一渣西班牙生果酒（Sangria）共享嚟高興吓，反而喺個幾上算嘅選擇。
攤開個餐牌，一大頁有乜選舉都一眼睇晒，種類包括西班牙小食、湯、沙律、薄餅、漢堡、意粉、燒烤、主菜、甜品。西班牙小食（Tapas）更多達成33款，平貴都有，定價由$58-$128，唯獨啲西班牙24個月黑毛豬火腿就段重量計$138 / 100g，唔好忘記仲有七折優惠，真喺豐儉由人。
此外，睇佢裝飾及高腳枱櫈你都知喺酒吧格，所以，酒類飲品非常多，當然，非酒類嘅亦不少，依個時段更以歡樂時光價收費，喺咪又好吸引呢！
依度嘅西班牙生果酒出奇地唔喺得一款，足足有成5款，我哋試試以白酒混入青蘋果利口酒及生果嘅White Sangria，一渣都夠5-6個人享用。色澤淡黃而清澈，更插有一整條玉桂，入口有少許果香，先嚟一陣陣冰涼清爽，所以，有種錯覺喺幾易入口，繼而散發出一股酒勁，如果酒量淺真喺唔覺唔覺好易醉。
賣相十分精巧，自家製鵝肝醬就喺橙紅色嗰兩粒，成粒腐乳咁款，配上青橄欖同黑橄欖，最有趣喺嗰兩粒白色珠珠，原來喺乳酪嚟，以份子料理嚟演繹。將鵝肝醬塗晌脆薄片之上，加粒橄欖、伴少少乳酪，晌脆薄嘅口感中，又有綿密幼滑嘅感覺，鵝肝醬嘅豐膩，又有乳酪嘅酸為佢平衡一下，感覺好微妙。
有吃一般常見嘅豬手成件咁上，而喺「煎皮拆骨」起晒肉，伴有薯蓉及酸椰菜，極之方便客人食用。啲豬手皮燒焗得非常脆，咬落咔咔聲，又香口，肉質無想像中咁肥膩，鹹鹹香香，襯住啲自家製嘅酸椰菜嚟食，一啲都無油膩嘅感覺，賣$68喺一個好親民嘅價錢。
店家共有4款薄餅供應，揀咗個平平哋嘅四式芝士，邊四式？睇餐牌就知，就喺車打、巴馬臣、莫沙里拉（即喺水牛芝士）及羊奶芝士，一上枱已經香噴噴到不得了，賣相金黃，吸引死。批底喺薄身嘅「餅乾」底，所以，當小食都可以，而且邊位好脆，芝士味香濃馥郁，軟綿柔滑，芝士迷嘅不二之選。
另一客飽肚美食就喺意大利扁麵，意粉或意大利飯類合共亦有4款選擇，黑松露、野菌都喺小弟嘅偏愛，亦喺經常被「菌」綁式嘅組合。扁麵以小瓷盤盛載，咪睇佢細妯個份量可不少，扁麵煮得咬口，恰到好處，而且，條條都充滿黑松露醬，又多野菌，幽香滋味，好味得無「松」置疑！
餐牌中有一類叫「On Fire Main」，顧名思義你都明白喺燒烤類嘅主菜，澳洲羊仔扒一客有3支骨，份量不少，伴有薯蓉及數款烤野菜。最鍾意喺佢再加埋啲寶雲酥（香草麵包糠）嚟焗一焗，立時成件事升級晒，寶雲酥好香脆，羊仔扒外層焦香，內層鮮嫩，富肉汁，用料及烹調手勢都水準甚高，無怪乎一致讚好。
之前睇過人家嘅食評，講到個法式蒙布朗鹽味朱古力蛋糕好正，但食得實在太飽，最後連甜品都食唔落，不過，就真喺想嘆杯咖啡嚟輕鬆一下。鮮奶咖啡，製作似模似樣，但口感唔夠平衡，始終佢都喺間酒吧而已！
無論西班牙小食，抑或其他菜式，都做得甚出色，加上又有不少優惠，值得推介俾老友嚟嘆嘆午餐又或下午茶，好好享受一個悠閒下午。
個人評分 味道：8/10 環境：7/10 服務：8/10 抵食：7/10 平均每人消費：HK$205
餐廳資料：
Playa de Papagayo 尖沙咀河內道5號普基商業中心地下N3號舖 2739 1808
感謝 山區麵包王 提供以上資料 山區麵包王的網誌: http://garycwm.blogspot.hk/
|
~END~
| 商店 | Playa de Papagayo (尖沙咀河內道分店) |