抱歉,發生點錯誤。
重新載入
Berliner German Bar and Restaurant:深德民心
山區麵包王
2016-01-01
943
0
分享
收藏
對於德國,雖然算叫做去過旅行,但已經喺十多年前嘅事了,加埋所聽所聞,其實對德國嘅認都唔算好深。唯一熟啲,就喺德國隊,不過,仲喺懷念緊馬圖斯、奇連士文、布林美……嘅年代。今晚嚟到Berliner,就唔喺搞咩細想德國,而只喺跟家人食慶生飯,試吓唔同嘅國家菜式。
嚟到就發覺個鋪位好熟,原來前身喺意粉屋,咪睇個門面以為間餐廳得咁大,轉入去其實裡面都仲有好多位。
裝修唔算好有德國嘅風格,只喺牆上掛咗啲德文嘅牌子,如果有啲大啤酒桶、德國木鐘……可能感覺唔同,但內廳嘅氣氛蠻不錯。
舅仔湊埋個B出嚟,大家掛住玩B,點菜嘅重任就由小弟負責。
餐牌前前後後6頁紙,部份有埋圖片參考,夾夾埋埋都只喺大概30款菜式,分門別類,都唔算好難揀菜。
bowl德國式雜菜沙律 $85 
先上場就梗喺慣性嘅沙律,等大家開開胃。何謂「德國式」?睇菜名嘅英文「Chopped」就有啲端倪,的確沙律菜軋得細碎,加入紅菜頭、洋蔥、番茄、溫室青瓜及香脆松子仁,醬汁另上,用料新鮮,入口清爽,夠晒健康!
bowlBerliner特色拼盤 $208
雖然餐牌寫住適合3-4人分享,但查實嚟到嘅份量,就明顯喺3人份,樣樣嘢都喺3件,不過,切開佢叫多啲人分享到。拼盤內容有炸脆大蝦、精選煙豬肉腸、德國鹹豬手夾餅配洋蔥蓉、煙三文魚伴德國黑麥包及焗雅支竹配火腿及芝士。
炸脆大蝦
啲大蝦其實都幾鮮甜嘅,大大隻,又甘香,只喺嫌佢粉漿稍厚。
精選煙豬肉腸
豬肉腸有少少煙燻味,質感挺實,唔會霉霉腍腍,豬肉味濃,腸衣又有點脆口。
德國鹹豬手夾餅配洋蔥蓉
個夾餅真喺幾好食喎,咬落焦脆,夾住鹹豬手肉及洋蔥蓉,味道鹹香,質感爽口,幾好配搭嘅小食。
煙三文魚伴德國黑麥包
做得較細緻嘅一件小食,煙三文魚油潤,塗上少少酸忌廉,又加啲水瓜柳,鹹鹹酸酸幾得意,而黑麥包口感粗,亦鬆散,但好有質感。
焗雅支竹配火腿及芝士
火腿並非巴馬火腿,只喺一般高檔少少嘅火腿,口感比較乾身;雅支竹已經焗到腍晒,跟火腿及芝士夾埋一齊食,個人覺得又唔算好夾。
bowl炭燒自家製雞肉香腸 $145
雞肉香腸喺自家製,當然,佢哋有好幾間分店,就算唔用來貨,自家製都可以較宜控制成本,亦可以保持品質水平。雞肉香腸炭燒過後,表面帶點焦香,肉味唔及煙豬肉腸咁濃,但仍然唔錯。配菜有香草炸薯角、法邊豆、忌廉大蔥,幾樣都幾好食,尤愛最後者,忌廉汁好滑溜,大蔥蔥香有個性。
bowl煙燻豬柳伴香滑薯蓉及酸椰菜配黑啤酒汁 $172
啲煙燻豬柳咪睇佢個樣好似唔喺完熟,其實,喺煙燻後再焗嘅效果,肉質出奇地軟腍,鹹香極具煙燻味,若嫌佢鹹味濃,伴住啲酸椰菜就啱啱好,不過我就鍾意一小件豬柳,一小撮酸椰菜間住咁食。薯蓉果然夠軟滑,又有薯味, 反而個黑啤酒汁似似哋一般燒汁,半點酒味都唔多覺。
雖然無話特別預備到蛋糕,但慶生日,點番兩客甜品頂一頂檔。甜品基本上共有4款,每款都喺賣$68,而另一款只喺拼盤而已。
bowl焗鮮蘋果卷配香草雪糕 $68
本來個甜品嘅賣相應該唔錯,但可能個雪糕溶得奇快,拎到嚟嘅時候個雪糕球跣埋一邊。初時睇落個蘋果卷唔覺有幾多蘋果肉,一切開裡面大部分都喺果肉,絕無欺場,蘋果肉酸香而帶幽幽玉桂味,兩者嘅味道平和相融,再配個球雲呢嗱雪糕,一熱一福,一酸一甜,感覺實在微妙。
bowl焗鮮雜莓德國式香酥甜品 $68
賣相相當精緻,以小煎pan盛載,面頭鋪上金寶,甜脆酥香,下底就喺滿滿嘅雜莓果肉,用料十足,莓肉酸酸甜甜,個人最喜歡食法喺每一羹都莓肉連帶金寶脆脆,甜酸度可以平衡番。
雖然是夜無鹹豬手,又無德國啤酒,但其他菜式一樣令大家食得稱心滿意。整晚所見,不單坐滿人客,亦見有唔少翻枱,可見佢嘅受歡迎程度都幾深得民心。

個人評分
味道:8/10
環境:7/10
服務:8/10
抵食:8/10
平均每人消費:HK$165

餐廳資料:
Berliner German Bar and Restaurant
葵芳興芳路223號新都會廣場5樓531-540店
2796 2203


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~