|
頂級川味燒烤 加 創意川燒！
|
|
kelvinfoodki
2015-10-18
224
0
|
分享
收藏
川燒貴為Openrice 無負評餐廳，必有過人之處，foodki終於抽到時間去食佢。川燒主打惹味川式燒烤（加上獨有四川香料），食物辣中帶麻，食起真係非常過癮。川燒最特別係除左傳統四川燒烤外，仲有大量創新食物，係除左川燒外，無乜地方可以食到架，係食物好多方面都可以睇得出佢地既創意同誠意，呢間係foodki最滿意既串燒餐廳，食物種類多，無乜可以挑剔！！ 魚湯清酒煮花甲($58) 第一道上既菜式，魚湯清甜，花甲好多，帶些微酒香，唔會太過火。花甲無沙，作為大餐既開始，滿意 蘇格蘭蟶子($60) 一大條蟶子真係極滿，加上蒜蓉粒，椒絲同蔥花辟腥，鮮甜多汁，好爽口，咬落彈牙，好新鮮。真係唔需要啲乜野調味料，已經非常好食 一口芝士車厘茄($24) 呢個好多地方都見到，但川燒既車厘茄的確非常新鮮，咬落去可以用爆汁黎形容，茄味好似周星馳套戲既瀨尿牛丸咁，係口入面爆發，好味道，加埋煙肉芝士好味！ 牛肋骨($158) 呢個真係非常滿意，燒牛肋骨賣相好靚，邊位微燶，但內裡嫩紅色。牛肋骨煮到淋曬，肉質鮮嫩，口感略為有啲韌，但真係非常好食，foodki會覺得呢個牛肋骨有啲似港式既叉燒。不俗，加埋旁邊既黃芥末醬同埋野椒汁，讚！ 日本黑豚肉露筍卷($28) 呢個就比較一般，勝在露筍爽口，豚肉烤得岩岩好包住露筍食，較為清新。 黑豚肉秋葵卷($20) 秋葵係香港比較難食到，秋葵帶微黏，用黑豚肉包起，味道好配合！ 羊架($56/2件) 羊架大件厚切，食落啖啖肉，咬落好軟，無乜蘇味，比你出面放題店既羊架真係好味太多。 燒栗米($24) 栗米都係食栗米本身既質素，勝在烤得岩岩好，清甜好味。唔會燒到過老太乾身，川燒既質素真係高 肉碎燒茄子($36) foodki最討厭食茄子，但因為朋友迫我食，估唔到呢到既茄子煮得唔會過腍，foodki好驚茄子過腍，搞到溶溶爛爛，呢到勝在無呢個問題。 紐西蘭大蘑菇($28) 呢隻紐西蘭既超大蘑菇，大到差唔多成個拳頭到咁大。加上黑胡椒同鹽簡單調味料就足夠令川燒到啲菇味出曬黎，咬落菇味好重，好juicy。 麻辣伴豬手($36)麻辣牛脷($28) 麻辣豬耳($36) 以上三個菜式都係用麻辣汁,食落去麻麻辣辣，三樣野都非常出色，麻麻辣辣好味道。牛脷咬落口有少少彈牙，牛味重，切成一條條，方便食加上沾麻辣更方便。豬手豬耳好入味，份量好多好抵食 大元貝($50) 又係差唔多成個拳頭咁大既元貝，新鮮，鮮甜多汁加上蔥花都非常出色。 鵝肝多士($48) 賣相同普通鵝肝多士差唔多，鵝味濃，咬落去邪惡感極豐富，入口即溶。 黑松露溫泉玉子($30) 一個好特別既創意菜式。用腐皮包住半溶蛋加上黑松露係蛋上，黑松露好香，成個造型都好得意，咬落口腐皮味比較重，但蛋汁會爆出。呢個真係有創意。 蜂蜜菠蘿($20) 菠蘿同樣食食物本身既質素，川燒既質素真係唔洗多講，消滯一流。咬落啖啖菠蘿汁 綿花糖朱古力厚多士($48) 又一個好特別既創意菜式，係串燒店食甜品都不失為一個新嘗試，係厚多士上放上綿花糖，將綿花糖燒到半溶再加上朱古力醬。綿花糖外脆內軟，但多士厚得黎又軟熟，口感非常特別，可以一試。 燒芝麻湯圓($22) 直接將湯圓燒黎食，真係好得意，外脆內軟，但味道都係湯圓味，係一個好有新意既食法 1664 ($62) Sapporo($52) foodki最愛飲啤酒,除左sapporo 同埋1664 外,仲有asahi, suntory 同埋藍妹,種類真係多,岩曬foodki! 整體黎講，川燒食物質素好高，種類又多，服務態度又好。foodki同朋友都非常滿意呢。
感謝 kelvinfoodki 提供以上資料 kelvinfoodki 的網誌: http://www.openrice.com/zh/gourmet/reviews.htm?userid=58271625&city=hongkong
|
~END~
| 商店 | 川燒 Chuan Shao |