|
九龍城超正cafe Oslo，食物好食，環境又好
|
|
kelvinfoodki
2015-07-18
684
0
|
分享
收藏
通常大家去九龍城食，一係食泰國菜，一係就飲糖水，今次就有個新選擇啦！！ 位於九龍城南角道既oslo cafe 開業大約兩星期。外面裝修無得頂，鍾意可以坐出面感受陽光。怕熱既foodki當然坐入面涼住冷氣食好野。 內裡裝修都非常舒適又好坐。岩曬情侶拍拖，亦岩一班人食野吹水。仲有店員，廚師都非常養眼，令foodki食既時候望下佢地都覺得特別好食。 芒果奶昔(7.5/10)($58) foodki不嬲好鍾意飲奶昔，正所謂去麥記識飲一定飲奶昔。黎到oslo，見到芒果配奶昔，無可能唔飲。呢杯奶昔奶味極濃，內裡有新鮮芒果肉，飲一啖食少少芒果，岩曬foodki呢個芒果狂熱份子。但foodki認為定價稍微有啲啲貴，如果平少少既話，應該會更吸引。 榛子朱古力(6.5/10)(38) 呢杯定價就較合理。好多cafe都有既一杯飲品，榛子味朱古力味濃。 蒜香雞翼(7.5/10)($38) 雞翼好多地方都有得食，呢到有咩特別之處呢？雞翼本身質素已勝過好多餐廳。雞翼外皮超脆，肉質多汁好味，加上合適份量既蒜，一道簡單但非常惹味既小食。讚！ 花之戀(7/10)($98) 花之戀個名好容易令人諗到日本野，但呢到既花之戀係意粉，即係鮮忌廉煙三文魚意粉。黎到上碟真係超靚，將煙三文魚整成花既形狀，睇得出店內大廚對細節既追求，睇見咁靚，味道都知道非常不俗。煙三文魚味，口感煙韌，煙燻味濃，正。意粉煮得恰到好處，唔會過軟，配上白汁，好易入口，味道亦都幾好。 玉子野菌煙肉卷(8.5/10)($68) foodki見到呢個煙肉卷，嘩！好得耳啊！好似有四個minions 既頭突左出黎。煙肉卷包住流心蛋，野菌甘荀粒。本來foodki以為表面粒玉子只係一粒好普通既熟蛋，但估唔到既係，係一粒流心蛋，真係好有驚喜。成個煙肉卷放入口，煙肉脆口，流心蛋爆到成個口都係，口感非常特別，蛋味亦超濃！！foodki非常怕食煙肉卷成個嘴都係油。店家避免煙肉過膩，加上野菌甘筍係煙肉卷既底部，油膩感即時驟降，亦多一份口感，好爽！呢個真係必食之選！ 士多啤梨Toast Box(7/10)($88) Toast Box 亦係oslo其中一個皇牌。食物既賣相真係無得頂。整個士多啤梨Toast Box有好多士多啤梨既元素，如士多啤梨雪糕，士多啤梨朱古力棒，士多啤梨果肉。從碟上既士多啤梨花亦睇得出佢地對細節既要求。食完最頂既雪糕，內裡仲有熱辣辣超軟林林既多士。其實oslo既toast box仲有提供榴槤，石板街，綠茶紅豆等等既選擇。最衰foodki唔鍾意食榴槤，否則榴槤會更加吸引同特別，各位真係可以試下!!
感謝 kelvinfoodki 提供以上資料 kelvinfoodki 的網誌: http://www.openrice.com/zh/gourmet/reviews.htm?userid=58271625&city=hongkong
|
~END~
| 商店 | Oslo |