抱歉,發生點錯誤。
重新載入
莆田 Putien:美味田色集
山區麵包王
2016-01-17
1130
0
分享
收藏
曾經到訪過莆田銅鑼灣店,對其莆田10醉都仲記憶猶新,因為好幾道菜都感受到師傅嘅手功細膩,卒之開到嚟荃灣,喺同老婆常到嘅區域,所以,順道過嚟食餐午飯。
過江龍嘅莆田賣較冷門嘅福建菜(閩菜),但佢晌香港開業都兩年有多,所以,都變得唔會太令人陌生。簡單嚟講,福建菜就喺以新鮮、天然嘅食材,利用精細嘅手工,保留真味嘅烹調,做出反璞真味嘅菜式。而且,晌亞洲等地已開咗多間分店,銅鑼灣店更榮獲車胎人美食推介餐廳!
荃灣店個環境幾闊落,一邊對住商場,另一邊落地大玻璃,採光十足,份外醒神。二、四人方枱,六、八、十人大圓枱,任君選擇,多少人嚟都適合。
餐枱上放咗一份「莆田新聞」,睇落去應該唔喺新近出版,不過,有啲食材資訊又幾值得睇吓。
菜式嘅選擇,未計甜點,單以主餐牌計都有超過60款食物,但既然要老婆試其特色嘢,自不然向「莆田10醉」埋手,所以,未有太費思量諗食乜。
資訊上補充一句,茶水費$8位,前菜$8碟(列明多少人會收幾多碟錢),白飯$10碗,樣樣嘢清清楚楚寫低晒就最好,免爭議。仲有個溫馨提示,餐牌內嘅菜式為例盤,同時備有中份及大份供選擇,前者就1.5倍份量,後者則2倍份量,份量上就可以控制得更有彈性。
bowl冰浸苦瓜 $48
被店方喻為最「薄」嘅苦瓜,依個近乎必試嘅冷盤,刀工嘅幼細,食材嘅新鮮,正體現出福建菜神髓。苦瓜晶瑩剔透、翠綠亮麗,擺成花開形,賣相已搶到唔少分。入口冰涼爽脆,沾一點蜜糖,先甜後苦,再有陣回甘,細嚐味道嘅變化。
bowl九轉小腸 $78
一講到乜腸物腸,第一個印象就喺肥膩、邪惡,其實,只要花點功夫、心思,可以有不一樣嘅效果。「九轉」絕唔喺虛談,睇佢一圈又一圈嘅「腸圈」就明白何謂功夫,又去晒睇壁肥膏,加上滷得入味,口感軟腍帶少少爽。第一次試九轉小腸,已有好驚喜嘅感覺,再試,都無改變。
bowl百秒黃花魚 $68
以前叫「原味燘黃瓜魚」,只賣$48一條,事隔年半,水漲船高,已升到$68,更改埋名,證明此菜有市有價。店家以自創100秒快速蒸煮法,只喺就咁加入薑蔥、海鹽吊味,魚質超滑, 魚湯鮮甜,唯小心魚骨多。
bowl極品椒鹽豬手 $39 / 件(最少兩件)
比起以前個名,多加「極品」兩個字,的確,豬手做得相當出色。咪睇佢以為就咁一隻炸豬手,記得第一次嚟個店長介紹過依道菜嘅特點,就喺先熬煮,逼出肥油,酥炸,鹵水,風乾,再炸,所以,外皮咬落脆鬼到啖啖咔嚓聲,入口滿滿骨膠原而無又肥又膩嘅感覺,又惹味不得了。店家更溫馨提供膠手膠,如果一手豬手,一手可樂或啤酒,相信不知幾爽呀。
bowl興化炒米粉 $78
我同老婆都幾鍾意食米粉,加上佢哋個炒米粉嘅質感真喺頗特別,故此,走唔甩嘅選擇。啲米粉不愧稱為最「幼」,幼細得比天使麵仲要幼,米粉內加埋蝦仁、蜆肉、紫菜、花生、西芹等等,食材豐富,伴點自家製嘅辣椒醬,微辣不嗆喉,份量又不少,好食。
臨走,見仍然有唔少客人入嚟幫襯,皆因佢哋有下午茶供應。想食得更抵,就不妨嚟嘆個下午茶。
今次再嚐其中嘅5最,都無令人失望,水準仍然保持到,為今日嘅午餐填上美麗嘅色彩,況且,服務又熨貼,自然食得舒暢,所以話,一間店嘅成功皆有因。

個人評分
味道:9/10
環境:8/10
服務:8/10
抵食:8/10
平均每人消費:HK$205

餐廳資料:
莆田 Putien
荃灣大壩街4-30號荃灣廣場4樓416舖
2111 8308


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
商店 莆田 (荃灣店)