抱歉,發生點錯誤。
重新載入
Bien Bistro:去到Bien.食布甸!
山區麵包王
2016-01-22
1021
0
分享
收藏
雖然慶祝結婚周年,但並未搵啲大店慶祝,只喺就腳少少嚟到荃新天地嘅小店Bien Bistro,喺朋友嘅推介,話值得一試。
雖然荃新天地嚟過唔少次,不過,原來Bien瑟縮樓上一角,兜咗個大圈卒之搵到,其實,如果晌沙咀道嗰邊入就好易搵到。店子查實一啲都唔細,有小圓枱,有卡座,樓底極高,空間感足,木系襯黑,配上暖和嘅燈光,型格中有股活力。而且,所有店員都喺後生仔女,服務勤快。
嚟之前都無乜睇過啲食評,都喺隨心所選,亦問問店長有咩推介。散點餐牌一紙過,包括湯品、頭盤、主菜、三文治、薄餅、墨西哥卷、甜點。
如果想慳少少錢,晚市套餐就應該喺較多人之選。包餐湯或沙律、主菜、啡茶,收費在於所選嘅主菜($148-$168)。雖然套餐無甜品,但可以+$28任選甜品一客,非常划算!
飲品餐牌備有另一張,啲飲品有唔少特色嘢,平常小弟就揀鮮奶咖啡,今回貪新鮮試吓抹茶梳乎厘系列。
此外,冬天佢哋又有多款熱飲系列,應該幾啱老婆飲,所以,佢都試咗杯特色熱飲。
bowl麵包條
先上一客餐前麵包條,撕開有點煙韌,但入口卻喺軟綿。伴上嘅薯蓉千島沙律醬都幾好食。
bowl西班牙特色頭盤 $80
個拼盤有吉列炸蠔、脆餅伴煙鴨肝醬、烤蘑菇沙律及西班牙凍湯。睇份量,就屬於兩人嘅份量。
趁熱辣就梗喺食炸蠔先啦,啲蠔幾有蠔味,個脆漿又唔厚,好甘香;
薄薄嘅脆餅搽上鴨肝醬,香膩滋味,載鴨肝醬嘅蕃茄當然亦都食得唔好嘥啦;
配菜唔喺就咁得啲沙律菜,仲有埋烤蘑菇,真喺誠意位;
至於個凍湯都OK喎,唔會好酸,入口涼爽開胃。
bowl東方辣椒大蝦扁意粉 $128
以意大利嘅香蒜欖油意粉(Aglio Olio)為基礎,加入泰式香料「羅勒」,令整碟扁意粉唔單止蒜香及辣勁,仲有香草幽香,加上大蝦都幾爽,意粉有咬口,粉內混咗啲菇菌,令整道意粉變得更豐富。
bowl匈牙利燴豬柳約克郡布甸 $95
店家不時有啲是日推介菜式,依個約克郡布甸就喺今日嘅新品,暫時喺試食價。估唔到個約克郡布甸咁大個,伴上匈牙利燴豬柳,淋少少黑醋,作為鹹食,得確幾有新意、心思,而約克郡布甸焗得鬆軟,質感有少少似麵包布甸,幾有蛋香,蕃茄汁底又酸香鮮活,唯一挑剔喺啲豬柳一般,唔算好滑。
bowl澳洲鮮草莓蛋白酥餅 $55
雪白嘅蛋白酥餅,淋上黃色嘅芒果漿及紅色嘅士多啤梨漿,好搶眼,加埋粒龍珠果同雜莓做裝飾,又搵啲餅碎襯一襯,賣相真喺攞硬高分。切開先發覺原來中間位仲唧咗啲忌廉,而個蛋白酥餅十分脆口鬆化,不過,就非常甜,非常「漏」,連一向食得幾甜吓嘅小弟,都覺得佢真喺頗甜,所以,建設3-4個人共享好啲。
bowl焦糖布丁抹茶 $36
好期待杯嘢會喺點,原來,焦糖布甸真喺做咗粒焦糖布丁放晌啲梳乎厘(蛋白)之上,我就讓粒布丁溶返入杯抹茶度,不過,其實飲落又唔喺好有焦糖味,但件梳乎厘入口好似棉花糖咁綿柔,而杯鮮奶抹茶亦做得不俗,抹茶味都幾甘香,口感亦頗滑溜。
bowl楓葉核桃煎茶 $48
依一系列嘅秋冬特飲,喺由德國引入富歐陸風情嘅飲品,仲喺得獎作品添。煎茶以成壺上,飲完可以再要求店員添加熱水,大致可以飲多一至兩轉。
茶色為透明淺啡色,入口帶微微嘅楓糖味,又似有一陣陣核桃香,感覺蠻不錯。不過,最特別喺店家會隨茶送上特色糖粒:檸檬、焦糖、車厘子、雲呢嗱,可以試完一款再試另一款,混和之後喺點?等你試過就知!

店家嘅菜式似乎喺集各國之大成,但好多睇落都相當有特色,就連飲品都別出心裁搞啲「花臣」,再者,服務又唔錯,值得再嚟幫襯。

個人評分
味道:8/10
環境:8/10
服務:8/10
抵食:8/10
平均每人消費:HK$220

餐廳資料:
Bien Bistro
荃灣楊屋道1號荃新天地1期1樓L117號舖
2155 9022


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
商店 Bien Bistro