Pati by Lassana：再廠Pati SeeWide

記得大概大半年前左右嚟過一次開晌廠廈嘅Pati by Lassana食晏，嗰時佢哋有個一人自選午餐，可以自選1款主菜、1款配菜及1款沙律，仲有包一杯一般餐飲，真喺好鬼抵。今次再闖Pati by Lassana嚟捧捧場，又睇吓有無點變先。

餐廳身處廠廈嘅小型美食廣場中，個美食廣場都算幾旺，對比起其他食店，Pati by Lassana亦睇落企理啲。

跟上次一樣，仍然有自選沙律餐、一人自選午餐、二人自選午餐，不過價錢就加咗少少，但以其質素而言，仍然都覺得抵食。

今回試吓佢啲意粉餐，是日共有3款，包括卡邦尼意粉、蕃茄汁雞肉胸意粉及忌廉汁黑松露雜菌意粉，款款都喺賣$46，包一杯美式咖啡或熱茶，凍飲加$3，如選其他意式咖啡加$10。

始終喺美食廣場，服務欠奉，一切自助，拎完餐，就順手向店尾取飲品、調味料、紙巾、餐具……等等。

卡邦尼意粉 $46

所有意粉都喺落單後即製，所以，可謂新鮮熱辣。份卡邦尼意粉以長碗盛載，份量都幾多，下忌廉亦都無手軟，所以，啲意粉既有咬口，又好柔滑，而且，煙肉粒亦有不少，實屬做得唔錯嘅卡邦尼。

忌廉汁黑松露雜菌意粉 $46

依個黑松露雜菌意粉就比較期待多啲，意粉方面水準穩定，始終日日喺咁煮，工多藝熟；此外，意粉內更落咗唔少雜菌，食落有菌香，不過，個人就嫌佢個忌廉汁太重手，冚咗啲黑松露香味，變得好隱約，有啲美中不足囉！

鮮奶咖啡、意大利泡沫咖啡 +$10

小弟要咗杯鮮奶咖啡，做得比較迤咗，拉花唔喺好靚，不過，始終用豆、沖調各方面都有一定水平，所以，都算保持到其味道醇香；而友人話佢嘅意大利泡沫咖啡個奶泡做得夠豐厚，入口好順滑。

雖然喺廠廈食堂，又喺美食廣場，但意粉質素絕對唔喺一般大眾食堂嘅層次，飲埋杯靚啡，比起去一啲餐廳仔食嘅意粉，更加划算好食！

個人評分
味道：7/10
環境：7/10
服務：8/10
抵食：8/10
平均每人消費：HK$56

餐廳資料：
Pati by Lassana
荔枝角青山道688-690號嘉名工廠大廈地下VeryFood Court 11-12號舖
2393 0888

=============================================

感謝山區麵包王提供以上資料

山區麵包王的網誌: http://garycwm.blogspot.hk/

=============================================

~END~

商店	Pati by Lassana


(0)	(0)	(0)