嘩今日係元宵佳節前夕, 我哋一家夜晚去咗尖咀海旁睇馬戲團表演
玩火, 吞火, 好刺激呀! 但係好......凍呀!
我哋去完K11個玩具亭玩完, 就穿過港鐵站E出口上番去文化中心
當時7:00, 仲有半個鐘先開始, 見到表演場地我哋就先坐低喺樓梯霸番個靚位!
因為我哋怕睇完先食嘢會太晏! 所以我就飛奔去麥記買個外賣番嚟一邊睇一邊食
見到工作人員喺舞台準備緊試緊燈光!
我神速用咗15分鐘一來一回買咗嘢食番嚟啦!
即刻要食番杯粟米同飲番杯熱朱古力取取暖先!
開始啦開始啦! 一班哥哥姐姐上到舞台,
表演咗一陣, 我發覺唔太似馬戲, 好似睇緊話劇咁...
好明顯睇得出有部份團員係好新冇乜經驗, 有幾次仲差D失手
跟住睇多陣終於有個疑似勁少少又有少少mixed既女仔出嚟表演
觀眾都拍咗幾次手掌! 好利害, 佢全身都係肌肉....我諗同佢打起上嚟我都會輸俾佢
然後有團員出嚟表演樂器....究竟佢哋係咪馬戲團嚟架?
我仲諗住有空中飛人同埋跳火圈!!! 唔通呢D係新式現代化D既馬戲
嘩....睇咗大半個鐘開始覺得有D悶, 但係突然間到呢個環節,
終於令我醒一醒, 覺得自己似係睇緊馬戲, 有番D像樣既表演!
幾個資深團員不停喺度玩火!! 又吞火....好勁呀!
兩個小朋友都睇到眼都唔"眨", 哥哥仲問我「乜火可以食架?」
之後畫面又去番好靜好靜既表演....雖然我知道係好高難度既表演
但係其實如果講rundown既話, 好似怪怪的, 帶大家去到高潮之際突然又靜番落嚟
有部份人都已經睇到走咗, 所以佢哋兩個都行前幾級自己坐
表演大概40分鐘, 最後所有團員逐個出嚟致謝!!!
我哋都「琴琴」聲走人, 如果唔係就凍到變「薑」人
Photo by CANON 5D Mark III, Len | EF 24-70mm f2.8L USM, iPhone 5s
呀劍評分: 7分
