|
【親子好去處】銅鑼灣 維園 香港花卉展覽 Hong Kong Flower Show 2016
|
|
kimfamilytravel
2016-03-13
1928
5
|
分享
收藏
今日教會主日後近近地就過去對面嘅維園睇花展
可惜今日落雨濕濕又多人, 睇得冇咁盡興有D論盡...
我哋行過對面馬路唔駛5分鐘就嚟到維園天后入口
佢設有購票處(門票須以現金繳付), 但係有八達通就可以直接Do入場
大家又可以一早係各大康樂事務辦事處預購門票(不過我睇唔到有咩原因點解要預購)
如果係優惠票朋友記住去橙色個閘口Do八達通 
入到場我哋最先由左邊開始睇起! 今年主題花係「洋彩雀」 好可惜今日睇花真係太論盡, 一時又開遮一時又拎住相機影相, 又要照顧佢哋兩個 所以我哋冇行哂成個維園, 到遇唔上呢個主題花! 只係當一年一度盛事俾小朋友欣賞吓花! (如果下星期日都好天可能會再嚟多一次) 
呢個用竹簍造成嘅特區徽章幾靚! 
今年睇到好多盤景都幾有特色同心思! 同樣今屆有攝影比賽同埋學童繪畫比賽, 但係我諗參賽者要擔住把遮影相同畫畫都幾輪盡 
雖然我冇睇哂成個維園嘅展覽, 但係喺我睇過嘅覺得最靚都係呢個展覽區 好似去咗個仙景咁! 芊芊仲問可唔可以行入間屋裡面, 佢問裡面有冇人架! 
去到場中間位置有好多隻用花造成嘅動物 D動物造型仲好得意好有幻想空間! 我同哥哥睇住同一隻動物但係我哋估都唔一樣 
人實在太多, 真係好唔容易先影到張冇人入鏡嘅相! 
我哋最後嚟到每次花展必有嘅鬱金香花海! 如果撞啱天氣唔好, 大家最好唔好影白色, 反而可以集中影粉紅色或橙色那邊! 
大家又可以試吓由底角度炒上去! 如果天氣好, 呢個角色配上藍天真係Perfect! 
又係好不容易可以幫哥哥影張花海相! (當時媽咪同芊芊已經逼唔到入嚟, 喺外面等我哋) 
由於係星期日, 有好多姐姐都嚟咗影相, 同埋龍友set哂腳架捕住D花 再加埋落雨真係冇心機睇咁耐... 
跟住妹妹又話好想食嘢, 所以我哋就離開咗展覽場地去咗大草地那邊! 估唔到大草地發現另外活動喎.... (途中經過一零食小賣部掛住有個超大芒果) 
呢個係大草地入口, 叫做「開心樂園」... 個名都諗得幾求其
我哋跟住指示牌行入去! 搵吓邊度有嘢食 
原來呢度另外有個咁大嘅地方, 好多活動同小食!! 
因為芊芊肚餓我就即刻買咗個燒賣俾佢哋兩個食, 成$20都唔平, 不過都預咗! 佢D燒賣寫住不含味精好健康....心諗「唔係講笑吓話!」 
原來今次花展都聯合其他單位喺大草地擺設其他活動 十足十一個嘉年華會!! 可能因為落雨, 呢度人唔算多! 如果想話基本上排隊等下一Round就得! 
邊食邊睇人玩非洲鼓! 
行到過嚟近銅鑼灣嘅呢一邊, 原來有Playright智樂參與今次花展活動 裡面放住好多木及竹材料同埋車軚! 俾小朋友自由發揮, 佢仲提供埋雨衣褸 
對小朋友嚟講佢哋未必咁識得欣賞花, 對睇花未有咁大興趣 正好呢個活動可以俾佢哋玩吓, 真係一個大驚喜! 仲可以鼓勵佢哋就算落雨天都可以照玩唔怕污糟! 
芊芊仲識到個朋友仔, 同佢一齊合作碌波波!!
碌咗落去又一齊去執番再碌過, 已經夠小朋友玩好耐 
之後時間差唔多媽咪就帶兩隻嘢去洗手! (洗手間要去到網球場嗰邊先有)
我就買個雞蛋仔等佢哋暖暖肚($20), 其實見到其他嘢食都差D忍唔住想買, 但係太貴都係忍住....
呢個太平唔咁食..... 
最後發現咗一個攤位有兩個大公仔同大家合照! 但係幾乎冇人發現到同埋一個人都冇.........原來佢哋兩隻係令次花展呢個開心樂園既吉祥物 真係好好笑!!!!!! 
Photo by CANON 5D Mark III
Len | EF 100mm f2.8L Macro IS USM | EF 16-35mm f2.8L II USM
呀劍評語: 花展每年一次, 真係好值得去! 不過今日落雨攪到好輪盡! 多人又攪到影相好多攝石人....所以減少少分
香港花卉展覽2016 簡介 香港花卉展覽是康樂及文化事務署推廣園藝和綠化意識的重點項目。每年為數十萬本港市民和世界各地的園藝愛好者提供一個賞花和交流種花經驗的良機。二零一六年香港花卉展覽將於二零一六年三月十一日至二十日在香港銅鑼灣維多利亞公園舉行。市民除了可以欣賞到花型秀麗、顏色奪目的主題花「洋彩雀」及各地的花卉之外，更可以觀賞到來自本地、內地及海外園藝機構展出悉心栽培的盆栽、造型優美的花藝擺設，以及色彩繽紛的園景設計。會場更設有售賣花卉及其他園藝產品的銷售攤位。 展覽地點 香港維多利亞公園 日期 2016年3月11日至20日﹝共10天﹞ 時間 上午9時至晚上9時 入場費
全費 14元
優惠收費 7元 4至14歲兒童、全日制學生 60歲或以上長者 殘疾人士及其照管人 (每名殘疾人士只可與一名照管人同享優惠) 電話 2601 8260 網址 http://www.lcsd.gov.hk/tc/hkfs/2016/
(以上資料更新至文章當日)
感謝 呀劍萬帥 提供以上資料 呀劍萬帥的網誌: http://kimfamilytravel.blogspot.hk/
|
~END~
人均
$14.00
| 商店 | 維多利亞公園 |