抱歉,發生點錯誤。
重新載入
士林台灣小吃 Shihlin Taiwan Street Snacks:小吃多滋味
山區麵包王
2016-03-13
882
0
分享
收藏
近期小弟同西九龍中心真喺有啲緣,繼上個月中晌依度嘅必勝客食飯賀細佬生日,早個星期又同親友晌Cafe Charm's食飯聚一聚。今日又再嚟到8/F嘅美食廣場食餐晏仔!事緣早前晌U Magazine網站抽獎,中咗「台灣士林小吃」嘅4人套餐,所以,趁到期前享用埋佢。
平日嘅西九龍中心都有啲靜,不過,星期日嘅景況就不可同日而語,就算未至水洩不通,都人頭湧湧。嚟到美食廣場就更加唔使講,食物種類選擇多之餘,大部份都定價大眾化,二、三十就有交易。但喺,啲位就一定喺唔好坐,枱與枱密到呢都算,全部高脚枱櫈(部份非高腳枱櫈喺優先座,俾有需要嘅人,如老人家、小朋友),啲櫈微微前斜,仲有,啲位明顯喺裁成4人位,但非常窄,所以,極有目的要你食完快啲走,坐多陣都會唔舒服嗰種。
望入去店內就喺廚房,感覺都幾乾淨企理。
店內都喺主打幾款嘢食:超大雞排、蚵仔麵線、甘梅地瓜、甜不辣、肉鬆蛋餅……等等,另外,每日特價有幾款套餐組合。
此外,亦有啲新產品,如芝味香瓜雞、監酥金針菇。
所抽中嘅套餐叫「富貴八方全家餐」,包括兩客肉鬆蛋餅、一客超大雞排、一碗蚵仔麵線及4杯蜂蜜檸檬,所以,拉咗住得最近嘅表哥一家三口幫手食。
等大概10分鐘就有得食,不過,服務麻麻哋,因為你個餐明顯喺4人餐,蛋餅及雞排都叫可以就咁夾嚟食,麵線點都要搵啲碗仔兜住嚟食啩!問啲店員有無啲細碗,佢回答喺無,問佢可唔可以俾隻麵線碗,初頭一口拒絕,之後煩多幾次先俾一隻咁大把我哋,所以,只好用蛋餅個紙盒載嚟食,佢哋啲安排有無常理架!
bowl肉鬆蛋餅
肉鬆蛋餅以前晌高雄旅行都喺食過一次,蛋餅煎得幾薄皮,綿綿而幾有蛋香,內裡捲住好多肉鬆,份量十足,唧上特制醬汁,食落又真喺唔錯喎。
bowl超大雞排
雞排炸好後再剪成細細件,方便食用,不過,就少咗一塊過嗰份豪氣。雞排食落幾香脆,因為我哋走辣,所以,欠缺咗點點惹味。雞排去晒皮,加上炸得唔錯,所以,入口亦唔會好油,此外,又無話太乾身、太嚡!
bowl蚵仔麵線
麵線都好大兜吓,面面鋪上好多細碎嘅雞絲及兩大粒蚵仔,湯頭幾香濃,口感又唔會好稀,麵線入口好滑溜,的確不俗,將雞絲跟麵線撈勻,就更加好食;蚵仔肥大肉厚,味道都幾鮮。
bowl蜂蜜檸檬
既有蜂蜜嘅清甜,又有檸檬嘅香味,冰凍酸香,配雞排食就更合拍!本身$12一杯,見佢周日(2:30pm-6:00pm)仲有限時促銷,買一送一,行開西九龍中心就不妨買杯試吓,好過飲汽水啦。
話就話喺個4人套餐,我哋3個大人加個細路而言,份量其實唔喺好夠。不過,要等表姪女上完興趣班先食,食得比較晏,而晚上又約咗朋友食任食火鍋,可以留留肚,否則,個餐真喺要加配份地瓜先夠4個人食。

個人評分
味道:7/10
環境:5/10
服務:5/10
抵食:6/10
平均每人消費:HK$0(抽獎禮物)

餐廳資料:
士林台灣小吃 Shihlin Taiwan Street Snacks
深水埗欽州街37號西九龍中心8樓28 & 29號舖位
3912 1218


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
商店 士林台灣小吃 (深水埗店)