抱歉,發生點錯誤。
重新載入
上星期日,我登上富士山!(上)
平凡人
2016-07-17
2179
14
分享
收藏
上星期日,2016年7月10日,我登上富士山!

日本有一句說話:「唔上富士山係笨蛋,上多過一次富士山係大笨蛋!」為左唔做笨蛋上一次 就岩岩好!上面講下笑咋,其實好多年前見過富士山之後已經好羨慕可以行上富士山,亦知道富士山分為十個合目比人慢慢行上去,但咁多年黎都無衝動要行上去咁 誇張,直到今年年頭因為一套動畫而燃燒起行山鬥志,決定一定要上富士山走一轉;富士山係日本人心中既神山,今次我就向呢座神山出發!

富士山係日本最高既山,最高峰「劍峰」海拔3776米,聽起黎要行上去一定好辛苦,不過行完之後感覺上山比想像中輕鬆,反而落山因為揀左條難啲既路就辛苦一啲,好彩我都仲應付到安全落返山,但係對行山鞋同襪就報銷左...

講 起上山路線,分別有四條路包括「吉田路線」﹑「須走路線」﹑「御殿場路線」﹑「富士宮路線」,每條路線出發地方唔同,大家都一樣可以直到富士山山頂,而各 條上山路線因應長度同路況等等因素可分為唔同難度,上山最易係吉田路線,之後係富士宮路線同須走路線,最難係御殿場路線

自己知自己事,平時都無做開運動體能差到爆,咁一定係揀最易既吉田路線啦,最多人揀就係呢條路,大家都貪佢易行,而且上山路山小屋多,補給好方便

由 東京出發去吉田路線亦都係最方便,夏天時間新宿就有高速巴士直到吉田口五合目,唔想坐呢班車都可以由東京坐巴士或火車到河口湖,再轉登山巴士上五合目,咁 就可以順便玩埋河口湖啦,我就係先坐火車到河口湖,浸過溫泉第二日先上山,亦都有更多人鐘意行完富士山再落河口湖浸溫泉,辛辛苦苦行完山再浸溫泉一定特別 舒服

新宿來回吉田口五合目同河口湖既高速巴士可以預先係網上預訂

http://highway-buses.jp/chi/

行富士山唔似係香港行山咁簡單,準備既裝備要充足一啲,我同大家分享一下我帶左啲咩上山(同專業既行山人士比我應該算帶得少野,我盡量都唔想拎咁多,如果大家真係要上山可以上網搵搵資料,好多網站都有專業介紹):

* 御寒衣物:正常黎講每升高100米氣溫會低0.6度,富士山高三千七百幾米正常比平地要凍超過二十度,我上山個日仲誇張,我住既本八合目(3400米高) 溫度只係得1度,上到山頂見啲水都凍到結晒冰,而且超級大風,好彩拎左上雪山用既風褸去咋,可惜我只係著條薄行山褲,等日出時對腳超凍(我有帶左條厚褲上 山架,不過換褲唔係咁方便就懶得換),而我既衫褲都係防水,以防落雨濕身,山上唔可能開到遮

*防曬用品:山上路段絕大部份都係無遮無擋,一定要帶帽同用太陽油

* 食物食水:山上小屋都會有食物同水賣,但價錢比平地貴好多,我呢啲窮人都係自己帶上去算,最多辛苦小小;今次帶左麵包﹑飯團同朱古力上山,知道自已出得汗 多所以帶左2L水同500ML果汁上山,到落完山岩岩好飲晒;係就係辛苦啲,為左慳返啲錢都要辛苦下,而且落山路線無咁多小屋就算幾有錢點都要帶定一啲

*行山杖:有行山杖上落山會輕鬆好多,由其係落山;好多人都會去到買金剛杖當行山杖用,咁都好多無啦,但始終行山杖好用一啲

*行山鞋:上落山好多路都係泥路碎石路,如果著普通波鞋或其他鞋未必可以保護到對腳;行須走路線落山既話最好用埋腳套,唔用既話對鞋一定入晒石仔同火山灰,會行得唔舒服

*手套:有啲路要手腳並用上山,有手套可以保護好對手

*口罩:落山唔想食灰既話一定要用

*頭燈:睇日出要半夜出發,山上係無路燈,有頭燈比用普通電筒方便好多

*氧氣:自問身子弱又怕有高山反應,一早準備定枝氧氣以防萬一,還好無明顯高山反應情況唔需要用到;大吉利事如果到時真係要用既話係山小屋都可以買到,價錢介乎¥1100-¥1500,我支係amazon買唔洗四百日圓,覺得平平地買個安心都好

我帶上山既就係呢啲,當然仲有好多個人用品要帶;話說係上富士山前兩日行其他山時有少少拉傷一邊膝頭,當日即刻係東京買左對護膝,唔知係唔係因為有護膝幫助,行完富士山膝頭都無再有問題,太好啦

上 富士山要係山上小屋住一晚,小屋價錢唔平架,但大家唔好期望小屋有啲咩設施,小屋係用黎保護大家安全而唔係比人嘆世界,係小屋只係訓睡袋咋;出發前個幾月 book左本八合目小屋,當時除左某幾日之外七﹑八月大部份日子都有位;直到七月頭我要轉時間再睇先發現七月中暑假開始之後大部份日子已經冇位,好彩我想 要既十號仲有位;七月頭先知道今年七月一號富士山開山只係開吉田路線,另外三條路線同山頂鉢巡路線要十號先開,所以即刻改時間,亦都因為改時間避開左大 雨,超好彩

呢道有一啲山小屋資料作為參考

http://www.fujisanguide.com/forms/menutop/menutop.aspx?menu_id=1650

廢話就講完而家開始分享富士山旅程!

上山前一日去到河口湖,當日天氣唔好多雲又有雨,有小小擔心第二日上山既天氣;等到夜晚雲差唔多散晒,天色好左好多,我相信第日一定會好天

第二日真係好好天,六點幾出發行去河口湖站,順便係便利店買定物資,站附近就有兩間便利店

係第7號站上車;不過係等車之前一定要入去河口湖站入面買車飛,呢班車唔收現金!我要等到車黎先知呢件事,同幾個人一齊跑入站車飛,好彩司機等埋我地

巴士7:20由河口湖站開出,大約五十分鐘車程去到吉田路線登山口「富士斯巴魯線五合目」,已經上到海拔2305米,清涼好多,距離富士山頂仲有一千四百幾米咋

五合目郵局

八點幾五合目冇咩人,大多數上山同落山既人群未到

有間「小御嶽神社」,好多人會黎參拜求旅程順利

好多人都話黎到五合目唔好咁心急上山住,先休息一下比身體適應高山環境,可以減低高山反應出現既機會;既然休息咁重要,我都慢慢行下鋪頭,順便食個早餐,係五合目留左好耐

係五合目留左三個鐘,到買好野做完熱身運動可以出發既時間已經係十一點半,呢個時候五合目好熱鬧,迫滿上落山既人,仲有好多遊客

呢道有得騎馬,我相信真正行山既人唔會咁做掛?

又早日出又遲日落

正式出發!

上山門口有「富士山保存協力金」攤位,以自願方式收¥1000作為保護富士山經費;呢¥1000係自由選擇比定唔比,見好多遊客係右邊直行直過就算,相反日本人比較願意交錢

作為一個負責任既登山者都係選擇交錢比較好,我都想富士山繼續靚架;交錢後會得到呢塊小木牌做證明同留念,職員見意掛係身上方便睇到;木牌由富士山木材製成,而木材係由劃界做防火線既樹木取得,係一份又環保又有意義既紀念品

向富士山頂進發!我知自己體力唔係太好,所以全程都係慢慢行,每行到一間小屋會休息下,中途行行下又會休息下,一路依自己最舒服既速度向上行,所以我上山既時間唔快,預計日落前上到住既地方就OK

由五合目去六合目初段好易行,路闊而且仲有小小落山位

五合目呢道大霧,睇唔到外面風景有小小可惜

沿路見到好多落山既人,好多人都冇咩表情,有啲行到一拐一拐,仲見有人要比人左右兩個攙扶落山,睇黎富士山都唔野小?而家我仲好開心有講有笑,到聽日呢個時間可能未必笑得出

轉入一條細路上山;由呢個位上山頂有六公里距離,六公里睇落好短,不過要上升既高度就好多,有預感上山既路將會好斜,而且係高山地方行會比係海拔低既地方行更加辛苦

穿過樹林向上行

過埋隧道就到六合目

用左大約四十分鐘時間,12:15去到六合目;六合目有間安全指導中心,派發吉田路線既地圖,而且仲有廁所比大定去,過左呢道要上到七合目先再有廁所

距離山頂仲有5.2公里,近左好多啦

休息一陣再出發,由六合目去七合目將會係無窮無盡既「之」字路,已經有心理準備同山路作戰到底

行左唔夠十分鐘見到有間冇開門既小屋,坐低拎左個飯團出黎開餐

霧中隱約見到七合目小屋,下個目標就係呢道!

繼續由「之」字路上山,還好條路鋪得靚又唔係太斜,慢慢行都算輕鬆,但要小心比石kick親,跟住前面啲人行同靠牆行條路多數都係好行啲,冇咁多碎石影響人行

最後小小路要由石牆向上「爬」,呢個時候手套就有用啦;我見仲有小小路懶得拎手套出黎,快啲上左去休息先算

大約1:30,上到七合目第一間小屋「花小屋」,由六合目到七合目連中間食野時候用左岩岩好一個鐘,呢個速度都OK啦,而家距離山頂仲有3.8公里咋

見到小屋第一樣要做既野就係幫金剛杖燒返個印,一個印要¥300唔係平架,不過呢份將會係上富士山一樣好重要既紀念品,我會揀啲我認為重要既地方燒印,如果有錢間間比¥300燒晒啲印上去仲正

花小屋好多人,大家經過咁多「之」字路都要休息一下,等陣再挑戰更難既路

休息左八分鐘,戴返隻手套向山頂繼續前進

由七合目到八合目係呢啲好斜要手腳並用既岩石路,我左手戴手套,右手拎行山杖開始一級級向上「爬」

「爬」左四分鐘已經上到另一間小屋,會唔會快左小小?由七合目到八合目之間大約十分鐘路程就會見到一間小屋,想補級同去廁所都好方便

小屋有好多野賣,係貴啲咁囉

山上廁所收費¥200,好多都係自助比錢,要去廁所就要自覺比錢啦

霧中向下一間小屋前進

好快又到左,霧散緊啲可以清楚睇到頭先走過既路,都唔係好難行姐?

同雲一樣咁高啦!

經過小屋繼續上山,繼續係呢啲石路;講真我幾鐘意呢啲路,爬下玩下有趣好多冇咁悶;路兩邊會有繩指示,唔洗擔心行錯路,不過呢啲繩千其唔好用黎借力,係一件好危險既事,自己危險之餘行後面既人都好危險

好快又經過小屋,呢道真係好多小屋

大家再次入返大霧之中努力爬山,向下一間小屋前進

小屋多到我都唔知過左幾多間,只知行一陣就有行一陣就有

條路睇落好驚險,慢慢小心行就冇問題

又到一間

最衰係大霧,望唔到山上仲有幾遠,只可以默默向上行

終於...真係衛出雲霧,係雲之上繼續爬升!好清楚見到一片藍天白雲,見到呢個靚景咁辛苦行到上黎都係好值得!

前路亦都清楚好多,可以望到下間小屋啦!不過有時睇得太清楚都未必係好事,見到小屋距離自己仲有咁遠,唯有笑一笑再努力向上行

下面好似仙境一樣,騰雲駕霧;雲海好耐之前都見過,但靠自己雙腳一步步穿過雲霧到達雲海之上就係第一次,呢種感覺好實在又好夢幻,估唔到自己都有能力上到咁高

望住靚景,個心飄飄然之下3:00飄到上八合目啦!由七合目花小屋上到八合目大約用左九十分鐘!

終點在望!今日我唔會去山頂,會先係本八合目住一晚,仲有唔夠一公里就到,好野!

風景超超超靚,仲可以望到琴晚住過既河口湖

一定要燒個印留念

人地個枝好多印,我個枝勁少印,哈哈

係三千米高空之上對住靚景開餐,食環境都夠好味;坐得耐開始凍,要著返件外套

對住一片美景靚到唔想行,足足抖左半個鐘先繼續上路;下個目標係本八合目住既地方,就係相中最高個間,好似好近又好似好遙遠

八合目有救護站,要七月中先開

不停回頭望不停回頭望不停回頭望,後面太靚啦

經過小屋都唔停lu,繼續向上行

山中湖

回歸「之」字路,今次呢條比下面個條更多碎石更難行,好彩我仲行到

經過八合目最後兩間小屋後下一間就係本八合目,雖然小屋在望,條路好似一直都行唔完咁,但我相信只要慢慢一步一步向前行,一定會去到我既目的地!

5:03上到本八合目第一間小屋,由八合目太子館上到黎本八合目大約用左90分鐘,行得好慢丫

望住頭先上山行過既路,原來自己都做得到架!

又係道欣賞一下靚景

休息完行多幾分鐘,5:25成功到達今晚住既地方,位於海拔三千四百米本八合目既「トモエ館」

風景一流

大廳食飯既地方

今晚就係住呢道啦,第一次訓睡袋;而家仲未到暑假旺季未係好多人,一格五個睡袋只係訓左四個人,仲有一個剩,哈哈

開餐啦!食咖哩漢堡扒,呢個可能係我食過最好食既咖哩!係呢道住一晚連晚餐收費¥7500,星期日係貴小小

食飽冇野做出去行下

呢道對上仲有一間吉田路線最高既山小屋「御来光館」,不過佢咁高第一日唔想行咁多路,而且佢要用信用卡比錢所以冇揀佢,亦都好彩冇揀佢咋,佢要轉時間一定好煩

黃昏時份,可以見到大大個富士山倒影

天開發變色

越夜個天變得越金黃

大家都出晒黎睇

買多左個飯團未食,唔想佢放得太耐都係食左佢先

而家得2.5度咋,著得一件外套就算冇風都有啲凍

係床上碌到八點再出去睇風景,真係好好好凍!原來由山上望落山下夜景係咁靚架!琴晚由河口湖望上富士山見到山小屋發出點點燈光,今日終於到我企係山上望返落河口湖,係好難以致信,事實我真係做到啦!

今日行程完滿結束,慶幸冇高山反應出現;聽日將會向更高既地方前進,目標係上富士山頂睇日出,仲要上去全日本最高既地方「劍峰」!加油!
~END~
商店
EEChan2016-07-17 12:06:33
+ 追隨
舉報
引用自 '平凡人' 的相片:

回覆:夜景都好靚呀!
回覆
EEChan2016-07-17 12:07:42
+ 追隨
舉報
引用自 '平凡人' 的相片:

回覆:都幾旺場
回覆
平凡人2016-07-17 18:49:28
+ 追隨
舉報
我都覺得又特別又靚
原文由EEChan於2016-07-17 12:06:33發表
引用自 '平凡人' 的相片:

回覆:夜景都好靚呀!
回覆
平凡人2016-07-17 18:50:37
+ 追隨
舉報
就算唔上山都好多遊客去架
原文由EEChan於2016-07-17 12:07:42發表
引用自 '平凡人' 的相片:

回覆:都幾旺場
回覆
羊羊2016-07-17 23:09:23
+ 追隨
舉報
掂呀﹗要比個叻叻你呀點解blogspot未出blog
回覆
1874飛飛2016-07-18 22:29:24
+ 追隨
舉報
多謝分享, 好想去富士山看看!
回覆
平凡人2016-07-19 00:17:38
+ 追隨
舉報
多謝blogspot個邊唔想出住,唔想搞亂個次序要搞掂關西先,仲有排
原文由羊羊於2016-07-17 23:09:23發表
掂呀﹗要比個叻叻你呀點解blogspot未出blog
回覆
平凡人2016-07-19 00:18:16
+ 追隨
舉報
富士山好正架,去啦去啦
原文由1874飛飛於2016-07-18 22:29:24發表
多謝分享, 好想去富士山看看!
回覆
mrsakwok2016-07-20 12:34:52
+ 追隨
舉報
引用自 '平凡人' 的相片:

回覆:去到這兒我已經驚驚哪!我唔係行山友,你嘅速度已經比我好.好..好多(如果你睇過我上濟州漢拿山,一定掩咀笑)
靠自己雙腳一步步穿過雲霧到達雲海之上,真係正,戥你好有成功感!叻!
BTW, 一D都冇廢話,呢D料對想去富士山嘅人好有幫助架,要多謝你無私分享(雖然我去唔到)!
回覆
平凡人2016-07-21 19:54:40
+ 追隨
舉報
多謝我都係慢慢行咋,我相信就算行得幾慢,只要唔停一定可以去到終點用汗水換返黎既風景我覺得特別靚,哈哈
原文由mrsakwok於2016-07-20 12:34:52發表
引用自 '平凡人' 的相片:

回覆:去到這兒我已經驚驚哪!我唔係行山友,你嘅速度已經比我好.好..好多(如果你睇過我上濟州漢拿山,一定掩咀笑)
靠自己雙腳一步步穿過雲霧到達雲海之上,真係正,戥你好有成功感!叻!
BTW, 一D都冇廢話,呢D料對想去富士山嘅人好有幫助架,要多謝你無私分享(雖然我去唔到)!
回覆