抱歉,發生點錯誤。
重新載入
志蓮素齋 Chi Lin Vegetarian:明志之舉
山區麵包王
2016-07-31
568
0
分享
收藏
好耐無搵舅母食飯喇,唔喺佢唔得閒,就輪到我唔得閒,對上嗰次已經喺好幾年前嘅事,雖然間唔時傾吓電話講兩句,談談近況,但點都要久唔久見個面。故此,加埋幾個家人,就番佢食齋嘅習慣,揀咗晌南蓮園池裡面嘅志蓮素齋。


聽到瀑布水聲就個離餐廳不遠,其實,整個南蓮園池都好好環境,就算夜晚嚟,餐廳外嘅瀑布、水車景,加埋燈光,都好靚,而餐廳入口就繞過瀑布另一邊就喺喇 。



餐廳環境佈置得頗為樸素、平實,右邊有一截喺落地玻璃,對着瀑布,可以望住水花四濺地飛躍;另一邊,櫃位後放有唔少古玩(相片從缺),顯出絲絲雅氣。整體而言,就喺有一份祥和感,無任何俗氣嘅裝飾。



本身都打算食早啲,但打去訂枱時,周日晚市需要分時段:6:00pm-7:15pm或7:30pm-9:00pm,但第一輪太早交枱喇,所以,揀第二輪,7:30pm都仍然算早。實際上,佢哋晚市營業時間都只喺6:00pm-9:00pm!菜式方面,包括前菜、4人餐、8人餐、廚師時令推介小炒、湯品、粥粉麵飯、點心、甜品、飲品,3張A4紙清楚列晒出嚟,列明不含肉或蛋成份,樣樣都喺健康嘢。





順道一提,從餐牌所見,佢哋所用嘅醬料喺本地老字號九龍醬園嘅出品,食鹽則採用喜瑪拉雅山岩鹽,食糖就會部份甜品選用意大利果糖,而食材更以時令野生珍菌入饌,可見其對健康嘅注重,對用料嘅執著。


bowl
芙蓉銀耳羹 $120 / 窩 我哋一行5人,例牌只夠兩三人,所以叫一窩,大概都喺分到6碗多少少。以上湯混入鮮竹、銀耳、金菇、直菇所做,外觀有啲似素翅,所有食材都切得非常幼細,口感幾好,唔會太餬,亦唔會太稀,但喺薑味偏重,舅母話驅寒好。


bowl
蒸菜包 $35 / 3件 西式餐湯就會跟個麵包籃,中式當然唔興依家嘢,所以點個蒸包襯吓。一客3件蒸菜包,即叫即蒸,新鮮熱辣,內餡主要喺菜粒、冬菇同水根,水根喺乜?我都唔知,大抵喺啲靶菜根部。同樣,餡料刴到細碎,好有菇香,而包身十分軟綿,當然,比起去酒樓食籠菜肉包就肯定有啲貴喇。




bowl
金菇菜苗餃 $35 / 3件 原意喺想試一籠百合露筍松露餃,一籠金菇菜苗餃,但前者賣晒,所以,叫夠兩籠金菇菜苗餃。餃餡好簡單,就喺金菇、菜蔬,但已睇到師傅手功,餡料依然切得認真無迤做,餃皮既薄且透,咬落煙韌唔易爛,味道調得啱啱好。




bowl
松茸珊瑚醬豆腐煲 $98 / 例 鮮松茸配豆腐,食材健康新鮮,而且,啲豆腐真喺好嫩滑,用上珊瑚醬去做,小弟見識淺,都喺第一次聽到珊瑚醬依樣嘢,令整道菜都惹味唔少,個汁底撈飯亦都正。


bowl
菠蘿咕嚕麥纖 $88 菠蘿咕嚕菜式唔使多介紹,出面就算齋鋪做都比較味濃,但依道就做得輕怡得多,個咕嚕酸甜醬薄薄咁掛住,唔會有多餘嘅汁醬,又唔嗆喉,而麥纖有別常食嘅麵筋之類,硬身較有咬口,更混有唔少鮮菠蘿、酸蘿蔔、三色椒,唔會只得麥纖咁單調,不愧喺廚師推介菜式。


bowl
黃油牛肝菌豆腐 $110 再嚟多一道豆腐配野菌嘅菜式,不過,依款豆腐就先泡油再炆煮。牛肝菌聽得多又食過,黃油菌應該喺第一次食,兩隻菇都好香,豆腐入口同樣嫩滑,醬汁香濃。


bowl
醬燒秋葵座頭菇 $105 雖則話食素,但一啲都唔「齋」(寡),因為好幾道菜個汁底都頗惹味,就如依一道咁,以金醬、九層塔、紫菜炒秋葵及座頭菇,前者滑潺潺,後者爽爽脆,兩者都喺有益健康蔬菜。


bowl
地衣牛肝菌白玉炒飯 $138 白粥、香飯$18碗,不如點個炒飯,睇餐牌時就心儀依一款炒飯,貪其材料多,有地衣藻、牛肝菌、白本菇、松子、鮮竹,炒出嚟大大碟好對辦,鑊氣十足,飯粒分明,又有松子增加口感。

雖然唔收茶芥,更免加一,不過,無論午市 、下午茶、抑或晚市,都設有每人最低消費。而且,落單後,店員都會打張「飛仔」俾你,提提差幾多先到最低消費額,咁客人就唔使擔心白蝕。其實,以佢咁嘅定價,都好易過。

志蓮素齋環境清幽,嚟得依度食素嘅人亦唔會嘈喧巴閉,菜式亦做得有心機,價位比出面一般素菜館相若,所以,揀嚟同家人食飯實屬明智之舉!
個人評分
味道:8/10
環境:8/10
服務:8/10
抵食:8/10
平均每人消費:HK$155
餐廳資料: 志蓮素齋 Chi Lin Vegetarian
鑽石山鳳德道60號南蓮園池龍門樓 3658 9388


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
*/ $zopim.livechat.setLanguage('zh_TW'); $zopim.livechat.hideAll(); });