有回憶的譚點 SeeWide

第一次去譚點飲茶，數數手指都兩年前既事，當時九龍城店初開張，好多雜誌報導佢既點心好食同特別，仲係同老公拍拖年代既我就同老公一齊去試，當時仲要等成半個鐘位先有得食，不過都冇令我地失望，食物好好食，我亦都隔幾個星期就去一次，每一次佢地既餐牌都會有唔同既新點心，好有驚喜！

兩年後既今日，我嫁左仲搬左去附近，但係就小左去食佢，因為佢既點心品質開始有下降，而且上次仲竟然俾左有問題既腸粉我，所以我都已經有一大段時間冇去，今日再黎，希望佢唔會令我失望。

是日1點左右去到，唔洗等位，依舊玄米茶，點左上圖既野…手打章魚肉餅飯，每次去都會食，因為佢蒸出黎既肉餅配埋章魚粒好有咬口，而且咬落亦都唔會太散加埋小許既蔥粒係面頭，成個飯一開蓋就香到不得了~~

荀尖蝦餃皇，每次食到好enjoy佢蝦餃入面既蝦又大隻又爽而且餃皮亦都唔會黏住筷子散哂,佢既蝦餃真係好好食！！

珍寶鮮蝦腸，腸粉類其實佢有好幾款！因為我自己鐘意食蝦所以每次都係叫蝦腸，雖然佢其他野都會好好食-v-，不過今日既腸粉就比較差，以往佢既蝦腸有薄薄既粉皮包住原隻蝦肉，粉皮滑蝦肉爽，今日既粉皮好厚而且好黏，唔滑，似蒸好耐水氣浸住粉皮，唉！

鵪鶉蛋燒賣，普普通通，不過燒賣肉好香，咬落去肉汁流出，好食。

青芥脆蝦一口漢堡，係佢地既成名作，雖然mini，但係都未至於一口一個，因為佢都幾高身架，不過中層既芥末配岩岩炸起中層既脆蝦真係好好食，面同底層既包都係烘過，所以脆脆，佢一擺低就要即刻食！唔可以遲～淋左就唔好食！

葡汁四蔬盒，係小撻底，面頭有芝士焗，中間係蔬菜粒同埋葡汁，外脆內軟，好食，不過小心辣咀！

２個人$130埋單，食到飽飽，雖然份量似唔多，依樣小小果樣小小其實都幾飽下，總括黎講佢既食物比起以前係差左小小，而且加價都幾密下，但係菜單依然有更新，每次黎到都有唔同！希望佢既水準唔好再有跌！

~END~

人均 $65.00

商店

(已結業)譚點王朝


(0)	(0)	(0)