|
英雄不再 – Hero Sandwiches(大角咀店)
|
|
Cammy
2013-09-04
456
0
|
分享
收藏
曾經有次經過中環既Hero Sandwiches，本身都有興趣去試一下，但係因為唔就腳，所以遲遲未有機會試到！早於7月係團購見到Hero Sandwiches有$36既劵賣，原來大角咀都有一間分店，因為我屋企去大角咀都好方便，所以就買左兩張諗住同老公一齊去食！
昨日打風前夕，條街真係熱到媽媽聲，又咁岩我放假(唉~~)，於是就疊埋心水走去拎團購買既野再去大角咀食埋團購既餐(團購消滅日~~~)，去到團購既物流中心一排排左我9個字=___=好在我放假果到又有冷氣涼，算啦，當涼下冷氣打下機咁囉w於是就由下午茶變左做晚餐！
其實Hero Sandwiches位置係大角咀偏深水埗果邊，通州街果邊，所以如果你係搭地鐵係奧運站出，你至小要行15分鐘左右先到，或者太子地鐵站沿通州街行入去都得！佢係港灣豪庭斜對面既！我去到既時候大概係5點半左右，當時店內冇咩人，大概3,4枱左右啦，店內冷氣唔算大，初入去仲有小小焗，咁熱既天氣入到去都起碼坐左成4個字先涼番，首先我點左煙三文魚雞蛋沙津三文治+薯條+汽水($44)，老公就點左燒肉眼牛扒三文治+薯條+汽水($47)，另外團購會送兩杯小杯乳酪(香蕉味同橙芒果味)俾你，德國牌子唔記得影相！
因為即製關係，大概等10Min左右就有得食!先講我既煙三文魚雞蛋沙津三文治，薯條炸出黎唔太油，但係就火柴頭咁？可能係翻炸迫哂D油出黎但係已經唔脆，而且仲小燶唔太討好，但係三文治個包我就幾喜歡，首先拎上手包包暖暖地而且好鬆軟有彈性，入面一塊薄薄煙三文魚同一層蛋沙津，蕃茄配生菜，煙三文魚唔太腥，而且因為太薄其實除左幫個三文治提升鹹味作用唔大，蛋沙津質地較差，同小食店10蚊份三文治既碎蛋沙津參唔多冇黎味道，整體個三文治除左個包本質幾好食之外其他都好麻麻！至於老公既燒肉眼牛扒三文治就比我果個好好多，肉眼牛扒係片上夾係三文治入面，配埋牛肉汁咬落去好Juicy而且好香配埋質地好既包依個三文治都算值依個價錢！
總括整體黎講，如果有其他選擇之下，我並唔會幫襯Hero Sandwiches，雖然我有讚佢既包同埋牛扒三文治好食，而且佢係食評網都有頗好既分數，但係首先地點較偏唔在講，價錢如果唔係團購的話，以正價($44)食煙三文魚雞蛋沙津三文治依個SET我一定會後悔，牛扒三文治都還好，第二就係店內既衛生清潔，到我食完既時候，因為其他有幾枱早黎過我已經離開，不過冇人出黎收拾，入面至小3個女仔一係掛住整食材一個掛住傾計，眼見開始有蚊滋仔飛下飛下，真係幾難頂，其次就係佢地做三文治既位置，2次見到有店員鬆開自己既辮fing頭髮= =其實D食材係你隔離，你冇頭皮都好你都有頭髮，唔合乎衛生囉！冇服務不在話下，其實如果後連基本清潔衛生都搞唔好，遲早只係會變團購店，而且翻睇近日係食評網同其他地方既食評都係以團購食評較多，而且大多都只係普通，佢既GOOD似乎已經唔係近日既事，慎選慎選～～
地址：大角咀詩歌舞街83號亮賢居地下7-8號舖
電話：2523 2333
|
~END~
| 商店 | Hero Sandwich (大角咀店) |