|
真材實料、抵食自助餐
|
|
mjqueen7e
2016-08-21
732
0
|
分享
收藏
近排天氣陰晴不定，時晴時雨，實在讓人好生納悶。想驅走悶氣，最佳的辦法，當然就是讓自己放肆一下，大刷一餐。記得早前曾看過某報章推介銅鑼灣維景酒店《繽紛維苑餐廳 Café du Parc》的美酒佳餚自助餐，據說成人收費每位只是 $428，長者及小童就 $328，便可以品嘗到龍蝦、凍蟹、M5 和牛、鵝肝、燒蠔、燒虎蝦等矜貴美食，而且星期一至日同價，以指定信用卡結賬，更可享八五折，即場入埋酒店的「心享會」，仲有八折優惠添，睇落都幾划算，所以就決定趁星期五晚，下班後和家人一起去吃頓自助餐，令 Happy Friday 更 Happy。 餐廳位於酒店 2 樓，以啡木色為主調，裝潢雖然較為簡約平實，沒金碧輝煌的佈置，但環境光猛，配上牆身上掛著的一系列抽象油畫，為室內添上色彩。安坐後先細看四周，原來場地不大，以四人檯為主，幸好椅桌擺放得十分整齊，而且保留了適度嘅私人空間，加上樓底夠高，令人感覺舒服。 是時候開餐了，立即出動，先由海鮮區出發，原來這裡的海鮮，選擇勁豐富，而且望落去都好新鮮，賣相吸引。除咗有大大隻嘅龍蝦、蟹鉗、青口、長蟹腳之外，還有翡翠螺、熟蝦和麵包蟹等。個人最欣賞就是已去殼的蝦隻和體型巨大的麵包蟹，貪前者爽甜彈牙、而後者蟹肉結實清甜、蟹膏滿載；加上全部海鮮都 refill 得頗快，十分抵讚！ 至於冷盤方面，選擇雖然唔多，但幾款 Cold Cut 質素都唔錯，加上旁邊鹹香有致的西班牙黑毛豬火腿，用來配搭甜美的哈密瓜和多款軟硬芝士，令人吃得開懷。原來黑毛豬火腿旁邊還放有一個小酒櫃，上層擺咗砵酒、而下層就有雪莉酒，用來配襯火腿吃，更能互相提升效果，不過記住這些酒精飲品，只供 18 歲或以上人士享用。 接著輪到吃熱盤，除咗有飽肚的絲苗白飯和炒飯之外，其他熱食仲包括有牛肉咖喱、泰式燒豬頸肉、蒜子燒沙甸、菜膽雞、時菜扒草菇、清蒸龍脷柳、鮮時菜、孜然羊肉串、孜然豬肉串、酥炸生蠔和薄餅。由於款式眾多，當然未能一一盡嘗，不過覺得當中的菜膽雞和孜然羊肉串最值得推介，尤其是前者，不但肉質嫩滑、雞有雞味，就是連雞皮都晶瑩剔透兼入口即溶，確令人回味；而且後者羊肉串，入口外層焦酥，吃起來帶孜然香，充滿新彊風味。 除了熱盤外，Buffet Line 還有多款席煎和現烤的美食，當中包括有席煎法式鵝肝、現烤 M5 和牛、羊架、海蝦及生蠔。法式鵝肝即叫即煎，所以入口仍是熱燙香濃，以草莓伴吃，一點也不覺油膩。至於即烤羊架，雖然件頭不大，但肉質夠曬軟腍，近骨位更滿佈羊脂香，加上羶味不重，不嗜羊者亦大可一試。另外即烤生蠔水準都唔錯，蠔味雖然算不上很濃，但肉質不俗。 如果大家愛吃麵條的話，即點即製的粉麵檔有三款麵食可供選擇，包括日式冷麵、白汁腸仔闊條麵、鮮茄蝦肉墨汁麵。由於有大胃王在場，所以很豪氣地三款全部試勻。個人最推介就是白汁腸仔闊條麵，個醬汁入口好 Creamy，加上鹹香的腸仔粒，吃味不錯。 Salad Bar 方面，已預製的沙律款式唔多，只得一款，但用來 DIY 自製沙律的材料就頗為豐富，有爽口的沙律菜、甜美的車厘茄、筆者至愛的紅腰豆、三色椒、粟米粒，甚至秋葵等，不過由於想留肚吃刺身，所以只可以淺嘗！ 刺身方面，選擇雖然唔多，不過也每款拿了一點埋位，除了有大路嘅三文魚外，其餘款式仲包括有北寄貝、螺片、八爪魚、帶子粒和牡丹蝦等。筆者向來偏愛三文魚，加上這晚的三文魚水準亦不俗，入口不但肥美油潤、肉質柔軟，而且脂肪比例平均，若不是怕胃納有限，真想再 encore 多一轉。 咁快就想食甜品？咪住，其實 Buffet 檯上還有燒有骨牛肉、烤茄子、番茄、腸仔、南瓜等供應；另外中西湯方面，每樣一款，分別有星洲肉骨茶和番茄濃湯。筆者對番茄興趣不大，把配額留咗俾肉骨茶。碗肉骨茶果然沒令人失望，胡椒味不太重，而藥材味亦濃淡得宜，加上肉很軟腍，難怪老公連吃三碗亦面不改容。 接著當然是輪到女士最期待的甜品時間，先讓大家一看陣容，除了有意大利芝士餅、美國芝士餅、軟芝士蛋糕、伯爵茶慕絲蛋糕外，甜品區內還擺放了不少迷你果撻、鮮果班戟、忌廉泡芙、雪芳蛋糕、椰撻及法國小圓餅，另外雪櫃內就有鮮果啫喱、涼粉、椰汁紅豆糕、椰汁黑糯米、忌廉蛋糕、木糠布甸、士多啤梨慕絲等。糖水方面，這晚有熱食嘅海帶綠豆沙，此外餐廳會為每位客人送上一款當晚即製的甜品，而這晚的即焗麵包布甸就做得相當唔錯，入口熱辣、外脆內軟，以 Häagen-Dazs 雪糕伴吃，味道一流！ 飲品方面，除了有橙汁、蘋果汁和西柚汁可供選擇外，餐廳仲有咖啡或茶供應。另外如果大家鍾意飲酒的話，建議加 $88，會有三款紅酒和三款白酒無限添飲，就算每支飲一杯都已值回票價。此外 Buffet 餐桌上還設有一個自助糖果 counter，擺放了不少懷舊的糖果和涼果，就當晚所見，也很受小朋友和長者歡迎。 見鄰桌有食客大唱生日歌，玩得非常開心，而且還拿著 BB 熊爭相拍照，多口一問，原來據說凡「心享會」會員於生日月份惠顧自助晚餐，10 位或以上即可享 75 折優惠，另外「生日之星」更會獲贈生日蛋糕和這隻可愛的熊啤啤。
感謝mjqueen7e提供以上資料 mjqueen7e的網誌: http://www.openrice.com/zh/gourmet/reviews.htm?userid=66478&city=hongkong
|
~END~
| 商店 | 繽紛維苑餐廳 (天后銅鑼灣維景酒店) |