|
140108 比人呃蒲飛(旺角維景-雅叙閣)
|
|
關太
2014-02-11
2266
18
|
老公心血來潮想食蒲飛，基於本人岩岩失業，我就提議食平價既蒲飛。係<Open飯>搵到一間最平既係旺角維景，佢標價係$208加1，我心諗咁平好過打邊爐，就即係網上Book位啦！
我地Book左6點半，到樓下環境已經覺得好殘舊，再行上餐廳真係感覺好奇怪呀！侍應帶左我地坐邊位，環境好黑好暗，成個場都比自由人包圍住，突然覺得自己中左伏咁，但入左去都要食啦！
我次次食蒲飛都會夾沙律食先，呢間沙律就得好少菜，出面啲菜比我夾哂啦！好似真係好貴咁，心諗算啦，二百零蚊唔可以要求咁高既！
之後就夾我最鍾意既蝦蝦蝦，都OK既，蝦真係好難整到唔好食架。另外放出黎既三文魚真係好少，放出黎既得4塊比我夾哂，一出去夾野就好似掃哂人地啲野，其實份量真係好少！心諗算啦，二百零蚊唔可以要求咁高既！
之後出左啲蟹腳，關生最鍾意食，但我地坐得遠，出到去得返兩隻腳。好彩無拎得多，啲蟹腳真係有啲怪味既！我地又心諗算啦，二百零蚊唔可以要求咁高既！
後未關生見到又有新野出，佢好搞笑話要同自由人爭喎！搶到一隻凍蟹返黎，好開心咁一人半隻，點知......中伏了！無諗過可以咁咸，真係食唔到落肚。心諗算啦，二百零蚊唔可以要求咁高既！
我同關生一路食一路講，食蒲飛唔洗咁開心呀，可以嘈到咁既？話口未完，另一枱唱歌，發生咩事呀？係我好無奈之際，關生又出左去拎野，今次佢好叻仔，搶到我出去幾次都拎唔到既龍蝦仔。
其實就唔係特別想食，只係唔服氣出左去幾次，都比隔離枱自由人掃哂姐！食後覺得味道普通，再一次心諗算啦，二百零蚊唔可以要求咁高既！
之後反轉頭又見出三文魚，試過穩陣再反食，不過真係無諗過咁無野揀囉！又同自己講：算啦，二百零蚊唔可以要求咁高既！
食到呢度，有無發現除左最後搶到既龍蝦仔之外，我完全無食過熟野呀？我真係無諗過啲熟野，一早比人清哂！今日我先發現啲自由人係唔多食生野，而熟野比佢地食哂之後，餐廳係唔補返！唉~ 算啦，二百零蚊唔可以要求咁高既！食生果啦~
飲品方面，以二百零蚊黎講，都預左無乜得揀，呢度得咖啡、薑茶、茶同水揀啦！最後全晚我覺得最值得安慰，就係有Dreyers雪糕，因為關生唔食，我一個人食左兩個。隔離枱個班自由人，一人袋左幾個落袋外賣，侍應見到都唔出聲，真係無得頂呀！
食飽飽就埋單，先發現中哂伏，佢話網上個價加左未update喎。之後埋單$550-，圍起都係$270-一個都唔係貴，加上食野時不停同自己講：算啦，二百零蚊唔可以要求咁高既！但感覺比人呃左囉~ |
| 商店 | 雅敍閣西餐廳 Cafe Concourse |