15 FEBRUARY 2014(SAT)

由於小小豬係賣旗活動中表現真係非常之好，為左獎勵佢，所以大肥豬就帶小小豬去佢最鐘意嘅地方，就係去Play House E³ Club放電啦~

小小豬一聽到話去MegaBox，佢就已經勁開心，再同佢講話因為佢賣旗叻叻，所以帶佢去Play House玩，佢就仲開心，即刻自動自覺叫換衫，仲好快手咁出門口，真係俾佢激親，平日又唔見咁乖仔，一聽到去玩就完全兩個人呀！

一去到Play House，個傻豬仔就一支箭咁飛去迷宮嗰度。當然我地係唔會咁快俾佢玩啲咁激烈玩意先，所以就帶佢玩啲比較文靜玩意先。

先去做吓運動~

之後就跳吓車呔，跳得都似模似樣呀~

跟住玩吓車仔先~

砌吓大Lego~

行過一間宴會廳，今日冇活動所以就放左好多圖書。依個大肥豬想同小小豬講故事，有咁多引誘小小豬又點肯呀。不過小小豬都好合作，乖乖地聽左一本故事書~

玩吓穿珠仔同渣車仔先~

終於...小小豬都忍唔住，要求去玩迷宮啦！既然佢主動提出，加上又玩左一陣我地要求嘅玩意，所以就放佢自己入去玩一轉啦~

因為今日唔多人，所以就放小小豬自己一個上去玩，我地係旁邊睇住。不過依個小小豬都玩得好激烈，玩到成身濕晒，仲玩到除衫呀~

今日小小豬有新玩法，就係拎住個小籃周圍執小球~

執滿晒就嚟搵大肥豬~

原來係想一齊去玩射波波呀~

就連玩"sir"滑梯都要拎住啲波波呀~

有個百厭豬玩都唔捨得走呀~

哈哈哈...依兩父子來來回回係個迷宮都玩左成兩個鐘，我就好舒服地坐係一旁等佢地，只係間中去望一望影幾張相咁。不過小小豬全程都要大肥豬陪佢玩，所以玩完之後，大肥豬話佢真係攰到冇朋友，仲話非常掛住上次陪小小豬玩嗰兩位小魔怪哥哥姐姐呀！