星期六約咗Judy去嘉道理農場，咁耐以來今次係第一次去。成日覺得係一個農場，應該係小學生旅行或者要嚟體驗農場生活先會到。但我小學時有冇咁既機會，所以到今日先第一次踏足。 

由大埔出發，先去咗街市食吓豬扒麵先，之後就搭巴士到嘉道理農場門口。落咗車行去售票處。但係售票處門口已經寫咗話櫻花、梅花已經開完了！不過我哋一場嚟到都照行啦！上網睇過d人都係講過年時嚟睇櫻花，隔咗成大半個月，應該花都謝！

入到場一開始係d動物區，但最記得都係d豬，因為好攪笑地有牌話入面嗰八隻豬既名，所以每隻豬出嚟，都望吓佢d紋，到底佢叫咩！就係咁積咗好多人係度望！睇完豬我哋就上山。 

上山既路有好多，可以行車路，亦有好多小路！一開始我哋入咗嗰果園既小路行，之後接車路走。

又行咗去睇貓頭鷹，不過講真其實睇動物我真係一d都唔啱！跟住又行車路，又唔知點樣去咗灌木區、總知有路就係度行，跟住去咗瀑布區，再繼續努力上山，不過都行咗個幾鐘，櫻花樹都見到唔到，而距離山頂又仲有好高，我哋只係行咗一半路程，所以都只好放棄，行返落山！ 

去返山下，行返另一邊，就去養雞場，d雞真係好嘈，同埋有禽流感，都係唔好行咁近啦！去返門口既地方，大部份遊人都離開，不過時間都差唔多，五點鐘要關門。我哋兩個都好好奇，如果係嗰亭瞓著咗，過咗五點會點算，走唔到！同埋地方咁大，可能真係唔知時間，咁到底會點呢？ 

離開咗後，我哋決定唔再回大埔，搭同一架巴士64K，去返元朗。感覺出返元朗快好多咁！去到錦上路鐵路站就落車搭地鐵離開，今日既賞花活動就完結！