老實講，小弟亦喺第一次接觸依個比利時品牌，對其真喺一無所知，不過，經過今次嘅到訪，唔單只一嚐其手做朱古力嘅滋味，亦喺一個品味學習嘅好機會。有關朱古力大師Frederic Blondeel嘅背景及其產品嘅可可豆用料，就唔多抄一次，因為鋪面小頁都已有詳細介紹。不過，介紹牌上有一點無提及，喺店員嘅補充，就喺Frederic Blondeel曾於法國學廚，所以，加入咗唔少法式元素，故此，所做出嚟嘅朱古力口味會較新派，但又唔會太離經叛道，會帶多點趣味性，務求帶嚟更多驚喜！

 朱古力大師Frederic Blondeel嘅背景介紹

Frederic Blondeel產品嘅用料介紹

所有粒裝朱古力陳列晒晌朱古力櫃內，粒粒精巧，依家店內粒裝朱古力主要分為6個系列：軟心朱古力（Ganache）、焦糖朱古力（Caramel）、松露朱古力（Truffle）、乾果朱古力（Fruit Tree）、雜錦朱古力（Belgium Seafood）及榛子夾心朱古力（Gianduia），定價為$18 / $20粒，但味道則有成過百款，暫時在香港推出其中70-80款左右，輪流登場，不過，一般晌鋪面有售嘅都有超過40款喔。此外，亦有排裝朱古力售賣。

題外話，今次負責嘅導「嚐」員Gary，真喺非常專業，除對產品嘅特性瞭如指掌外，講解清晰，緩急有序，亦有很多品嚐朱古力嘅溫馨提示，例如：很多人都知道朱古力放晌陰涼處都可以嘞，但好似近來天氣轉熱，佢話最理想梗喺放入紅酒櫃，但深明有幾多人家中會有紅酒櫃吖，所以，放入雪櫃嘅蔬果格亦可以，攤一攤番15min，效果亦會好理想，只不過，就算放入雪櫃都唔好多過3星期，否則，質素必定大打折扣。

一大輪資訊、理論、注意事項過後，就開始正式踏入朱古力甜蜜之旅！但喺晌品嚐之前，Gary都再次強調多一次，就喺無論邊隻味道都好，朱古力就喺朱古力，Frederic Blondeel嘅朱古力以朱古力味行先，再滲出各款獨有味道，絕對唔會喧賓奪主，所以，我哋就更加細心領略固中滋味。仲有，先聞一聞啲朱古力，可感受一下佢散發嘅香氣。

Sao Tome

每款朱古力嘅名牌都有標明喺邊個系列嘅朱古力，Sao Tome屬於軟心朱古力（Ganache），亦喺Gary為我哋刻意安排嘅第一款朱古力，作為入門嘅基礎，因為喺一款簡單、原味、75%純黑朱古力。一咬外層非常薄，帶點脆，而餡心嘅朱古力極之軟滑，少甜而甘。

Jasmin

單睇名字，你就可預期佢個味道，聞落去依然喺濃郁嘅可可味，但入口嗒落，軟滑嘅軟心朱古力就慢慢滲出茉莉花香，清幽不俗，但又唔會太搶個朱古力香，不愧為招牌軟心朱古力之一。

Rose & Poivre Noir

依個跟茉莉花味好唔同，一聞已感覺到玖瑰花香嘅突出，入口都有同樣感覺，反而混入嘅木本辣椒，無預期中嘅辣味出嚟。據Gary解釋，原來個辣椒純粹幫玖瑰香提味，落極份量極少，就好似食西瓜加幼鹽個道理。

Lime

依款青檸味朱古力跟上幾款軟心朱古力有啲唔同，就喺用咗牛奶朱古力，所以，色澤明顯會較淺，故此，入口後，最初嘅朱古力味好快完結，隨之就喺挺強勁嘅純青檸酸香，餘韻亦比較長，小弟幾喜歡依款味道，值得推介。

Charles Hot

早前去大馬旅行參觀朱古力博物館時已試過辣椒味朱古力，估唔到咁快又重遇上，所以，未試已有份心理準備。採用軟心黑朱古力，依然香滑，辣椒味會慢慢滲出，而且會感覺到辣度會不斷提升，當朱古力溶透之後，先喺辣度最強之時，有種延後嘅感覺。不過，大可放心，雖則所謂「辣度最強」，只喺相對而言，當然比食隻辣椒輕怡好多好多。

Coeur - Milk

試咗好幾款軟心朱古力，稍稍改一改試另一系列：榛子夾心朱古力（Gianduia）。Coeur心形朱古力賣相亮麗極討好，基本有3個味道，分別喺Mike、Dark及White，被安排所試喺前者White（香脆牛奶朱古力配榛子及可可仁）。外層脆脆，牛奶朱古力內混和好多榛子碎、少量可可仁，口感複雜，但甜度比起之前所試嘅黑朱古力較重。

Cralin - Dark

又試試另一系列：焦糖朱古力（Caramel），依款香脆海鹽焦糖黑朱古力認真好味，口感富層次，朱古力共分3層，第一層黑朱古力外殼，甘苦香脆；第二層焦糖軟心，有少少流心嘅效果，擺晌度會慢慢流落嚟，焦香少甜；第三層榛子夾心朱古力，食落有少少海鹽鹹味，非常有趣。

Green Tea

綠茶味屬軟心朱古力（Ganache），晌幼滑嘅牛奶朱古力味中，綠茶味表現突出，但又出奇地唔會太強、太搶。加上表面加咗少少法國海鹽，淡雅清醇嘅綠茶中，誘發出絲絲鹹味，感覺幾過癮喎。

Basilic

同樣屬軟心朱古力（Ganache）嘅Basilic，喺羅勒配士多啤梨嘅組合，聞落已有少少士多啤梨清香，但入口，羅勒嘅味道鮮明，食到臨尾，又有一層輕輕果酸味。第一次試半粒食唔到依個效果，難得Gary俾我再試一整粒，要慢慢、慢慢品嚐晒成粒先領略到，實在刁鑽。其實，Frederic Blondeel有唔少朱古力款式都以香草入饌，例如：薄荷、月桂葉、香茅、豆蔻……等等，相信都喺值得一試嘅口味。

Feuillantine - Milk & Feuillantine - Dark

卒之試吓松露朱古力（Truffle）系列，首先介紹兩款喺香脆榛子松露及香脆榛子黑松露，小弟手上所試嘅喺前者香脆榛子松露。質感好特別，外層喺好柔軟嘅牛奶朱古力，入口好軟滑，但就較甜；而內層因為加入咗榛子碎，多份脆脆口感，所以造就依款松露朱古力喺「外軟內脆」，跟平常全軟滑嘅松露朱古力喺另一種口感。

Cassonade - Milk & Cassonade - Dark

另一款松露朱古力，焦糖榛子松露及焦糖杏仁黑松露，跟上述剛好相反嘅松露朱古力，特點喺「外脆內軟」。小弟依次所試嘅喺後者，「外脆」原因喺朱古力表面「焦糖化」咗，沾滿烘過嘅糖粒，以及杏仁碎碎，所以，咬落脆脆哋；至於中間，喺好幼滑嘅朱古力，不過，整體會有啲頗甜嘅感覺！

Irish Coffee

試咗上面隻Cassonade – Dark，睇樣就知款Irish Coffee又喺另一款「外脆內軟」嘅松露朱古力，「焦糖化」嘅表面令外層脆脆。雖然屬「酒心」類別，但有別一般嘅液態酒心，而喺把愛爾蘭咖啡酒注入朱古力中，所以，細味朱古力嘅時候，酒味會一湧而出，非常突出，而且餘韻悠長，感覺特別。

Poire William

本來被安排試食嘅朱古力都差不多，但數款松露朱古力甚有特色，故此，同場加映依款香梨白蘭地松露，因為香梨加白蘭地想起都好奇。不過，香梨只喺作為提味，未見突出，而白蘭地酒味亦只喺輕輕滲出，唔及上述嘅Irish Coffee酒味突出悠長。

Framboise

以純黑嘅朱古力片為基礎，加上紅莓果乾，就成為依款乾果朱古力（Fruit Tree）一員。朱古力片味道甘醇，而紅莓乾嗒落帶微酸，唔算好特別嘅款式，但味道本身都喺唔錯嘅。

除散裝，亦有不同份量嘅禮盒裝（45粒裝/$890、25粒裝/$510、9粒裝/$180）及禮物籃（$1,980/尊貴套裝禮籃、$1,685/幸福滿載禮籃、$1,265/滿心歡喜禮籃），又不時推出節日限定，如近期推出嘅復活節系列。而禮盒裝內嘅朱古力，又可隨個人心水作自由配搭，兼且包裝大方得體，簡單而典雅，送給摰友定必窩心到爆。

是夜，試了足足14款朱古力，感到好滿足，不過，仍有意猶未盡嘅感覺，因為款款朱古力都各俱特色，味道細膩，質感獨特，確喺一個不容忽視嘅朱古力品牌。

個人評分
味道：9/10
環境：8/10
服務：9/10
抵食：8/10
平均每人消費：HK$0（試食邀請）

餐廳資料：
140402 Frederic Blondeel
尖沙咀河內道18號K11購物藝術館B1層Kiosk 14
2375 6033