抱歉,發生點錯誤。
重新載入
Outback Steakhouse:冷.烤.熱奉.新年午餐
山區麵包王
2013-01-01
1141
0
分享
收藏
新一年新開始,其實只喺多日假,不過就好唔同,因為早前聖誕跟朋友、小組組員搞咗幾餐大食會,叫做忙過不停,今日就乜都唔搞,過番個輕鬆嘅假日。所以,同老婆出咗尖沙咀睇場戲(早場,平啲嘛),跟住過嚟Outback食個新年午餐!
因為新年關係,無咗個平日所見嘅午餐餐牌,換嚟喺個節日特別餐牌,包餐湯、蜜糖小麥包及餐飲,按唔同主菜款式收費,價錢賣$98-$118,比平時個餐牌($68-$98)貴咗約20%-40%,其實食嘅嘢都差唔多,仲少咗選擇添(平時會有9款),不過,節日出街食飯就喺咁架啦。
是日嘅「節日特別餐牌」,一共有6款主菜可供選擇:是日烤魚($108)、塔斯卡尼烤雞($98)、特色西冷($118)、烤肉醬味助骨($98)、海鮮意大意粉($108)、黑椒牛扒粒($98)。Outback嘅烤助骨一向出色,不過之前食咗好幾次喇;烤雞嫌食起上嚟麻煩,海鮮料晌過去個聖誕又喺食咗好幾次(海鮮薄餅、海鮮焗飯、海鮮意粉……),而牛扒粒不如鋸扒啦,所以,最終小弟揀特色西冷(冷),老婆要是日烤魚(烤)作為主菜。順帶一提,門口有個溫馨提示,節日關係,晚市有最收消費,所以如果你撞正想大時大節嚟食晚飯,記緊問一問最低消費要幾多,免得失預算。
近排天氣較冷,但冬日陽光,幾時都令人感到很舒服同好寫意。雖然依個晏晝唔少客,難得啱啱好安排到個挨窗口嘅尾位,又少騷擾,又有點陽光透入嚟,感覺真喺好唔錯!
bowl蜜糖小麥包
點好菜無耐,就先送上Outback名物「蜜糖小麥包」,午餐喺圓碌碌細個裝,晚市就會變身成大條裝。黝黑嘅小麥包仍然微暖,隨包附送酸忌廉醬,帶蜜香清甜嘅小麥包,配微酸質感輕柔嘅酸忌廉,味道真喺好夾。我老婆好欣賞啲小麥包,次次食都讚,由於佢晌依區返工,所以多口問句有無外賣,不來真喺有嘅,午市嘅小麥包外賣價$10 / 3個,價錢OK喎;而晚市大條嘅蜜糖麥包,外賣價就$15條。
bowl杯裝是日餐湯
小麥包送到,隨後好快就輪到餐湯送上。雖然話杯裝,不過都已經成碗,只喺一般美式餐廳叫法,而是日餐湯喺野菌忌廉湯,今次個湯又做得幾好,野菌味幾對板,口感幾滑溜,無上次個粟米忌廉湯咁杰。餐湯仲附有沙律,只喺一啲沙律菜同車厘茄,用料新鮮,沙律菜咬落索索聲,而沙律醬另小兜附上,方便有啲人唔食,喺幾人性化嘅安排。
bowl特色西冷 $118
西冷都幾大件,而且頗為厚身,要求五乘熟,唔知咁厚身之下會燒成點。單睇賣相就幾靚仔,一切開好滿意,因為中心色澤十分之粉嫩,肉汁隨刀卸下,肉質感覺好有彈性,西冷已淋上燒汁(汁醬無得揀),切下一小件再沾上燒汁,放在口中細嚼,正!真喺好軟腍,肉味又濃。反而伴菜同啲有味飯一般,伴菜喺白烚紅蘿蔔、翠玉瓜,味道非常清淡,撤點鹽好啲;有味飯加入咗蔬菜粒同煮,雖然確喺有啲味,但口感似乎爛咗啲,如果乾身少少應該更合小弟心意。
bowl是日烤魚 $108
輪到老婆個主菜上場,魚柳又喺幾大件,烤得個樣帶點焦香,而味道好簡單,餐牌寫住個做法就只下少少鹽調味齋燒,食落肉質估唔到好細嫩,有魚嘅甜味。好好奇想知喺咩魚,問過侍應,喺鯛魚柳,亦足見侍應訓練有數,一問就知,唔會蒙查查。伴菜都喺白烚紅蘿蔔、翠玉瓜,不過就搭薯蓉,一大球薯蓉,非常飽肚。多數嘅薯蓉都會打得挺幼滑,但今次所食到嘅質感較粗,薯蓉內仲有啲粒粒薯仔肉,不過薯味夠又有點黑胡椒香。
bowl雲呢拿雪糕朱古力軟餅 $56
午餐唔包甜品,另叫甜品亦無優惠,其實午餐個份量都好夠,不過,新一年第一餐出街飯,心態上總喺想食好啲,食得豐富啲,所以,點都額外點多一客甜品嚟滿足吓。真喺,點一客就夠,因為依個「雲呢拿雪糕朱古力軟餅」頗為有份量,一大件班尼士墊底,加一大球雲呢拿雪糕,再唧上一球鮮忌廉,除碟底淋滿特濃朱古力漿外,上面仲撒咗好多朱古力碎,絕對喺朱古力粉絲之選。加上熱烘烘嘅班尼士,夾冷冰冰嘅雪糕,冰火之效立竿見影;再高一層,就喺一羹過滔勻忌廉、雪糕、班尼士,沾滿朱古力漿,口感複雜,份外滿足!
bowl餐飲汽水、啡、茶任君選擇,冷熱隨意,唔使額外加錢。老婆唔講都知,例牌熱檸水,沙糖都唔加,佢話健康啲。小弟為咗好好嘆埋件甜品,即磨咖啡成為必然首選嘅配搭,猶如額外食多一份下午茶!

個人評分
味道:8/10
環境:8/10
服務:8/10
抵食:8/10
平均每人消費:HK$155

餐廳資料:
Outback Steakhouse
尖沙咀彌敦道26號東企業廣場2樓1號舖
3741 1728


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $155.00
商店 (已結業)Outback Steakhouse