美孚話大唔大，話細唔細，一個美孚新村足足有7間茶餐廳，連埋附近屋苑，成個美孚區有過10間茶記，但依度人口唔少，咩階層嘅人都有，所以，絕對夠人流養活佢哋。有時同啲美孚街坊教友，無乜心水食乜之時，尤其喺食晏又唔想太破費，亦唔會打算坐得耐，純粹撐飽個肚，茶記就變得最常選擇。「味味佳」唔喺有咩好出色，都喺近老友個車位，返完教會黐佢車返到嚟美孚，就腳行過對面先揀嚟「味味佳」食晏。
味味佳位處內街，街外人唔易搵，相反，晌依區住嘅，逛開街市嘅人都知佢個位置，可以話街知巷聞。店內喺一貫茶記格局，有卡位，有圓枱，一張枱貼一張枱，地盡其用，牆上掛有大電視，打開餐牌要乜有乜，全喺茶記特色。
想快想平，午餐喺唔使傷腦筋嘅必然首選，每日精選午餐都有3款選擇，是日之選喺：沙嗲菠蘿肉片飯（$35）、蒜蓉雞扒飯（$37）、生炒雞絲飯（$39），無例湯，只配啡茶。
![bowl]() 蒜蓉雞扒飯
鍾意蒜蓉夠香，所以揀蒜蓉雞扒飯，茶記嘅碟頭飯嘅一大特點，就喺夠大碟，絕對夠飽肚，所以都見唔少附近嘅工友嚟食晏。蒜蓉雞扒兩大件，份量十足，雞扒醃過香煎，都無乜可失手嘅地方，蒜蓉汁好香蒜味，汁內仲有唔少蒜粒，用嚟撈飯，真喺三爬兩撥搞掂碟飯。蒜蓉雞扒、黑椒雞扒依類午餐碟頭飯，就算唔喺茶記午餐排第一，都一定喺常見嘅選擇！飯後加埋杯永遠喺晌茶記先沖得靚嘅奶茶，美味都可以食得好慳家。
![bowl]() 沙嗲菠蘿肉片飯
肉片飯聽老友A講亦都唔錯，個沙嗲汁都幾香，肉片亦唔少，如果多啲菠蘿就仲好喎。
除咗精選午餐，午市都仲有好多選擇，例如焗飯系列、泡飯系列……等等，始終喺茶餐廳，永遠選擇多多，層出不窮。而另一位老友就揀咗無名餐，佢只喺放晒個泡飯系列下面，A沙嗲牛肉一丁，B煎雞扒湯烏冬，再配炒蛋火腿厚多士，包餐飲，賣$36，似乎又幾好咁喎。
![bowl]() 沙嗲牛肉一丁．炒蛋火腿厚多士
個沙嗲牛肉一丁都幾大碗，仲有埋啲生菜添，而老友C話啲沙嗲一般，濃啲就更惹味，牛肉過份鬆軟，條麵喺出前一丁點都唔會有咩出錯，而炒蛋似乎過咗少許，欠滑溜。
唔使煮、唔使洗，味道又唔錯，幾十蚊又一餐，茶餐廳永遠喺城市人掏個方便搵食嘅地方！
個人評分
味道：7/10
環境：6/10
服務：7/10
抵食：8/10
平均每人消費：HK$37
餐廳資料：
味味佳餐廳 Mimikai Cafe
美孚美孚新邨第二期吉利徑21號地下
2785 5313
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
