抱歉,發生點錯誤。
重新載入
日牛涮涮鍋專門店 Nichigyu Shabu Shabu & Sukiyaki Restaurant:日牛賀牛一
山區麵包王
2013-06-09
989
0
分享
收藏
每年同姨仔、舅仔慶祝生日都好有數,因為佢兩個同月生日,只喺相差一個星期,所以,年年請佢哋食飯可以一次過。阿Q啲諗叫做俾少次錢,查實仲傷荷包,因為仲有老婆嗰份,舅仔拍緊拖,無理由唔請埋佢女友架,一個人頂晒,依個就喺做姐夫代價,不過,都俾得甘心樂意,一年都喺俾一次,最緊要大家食得開心!平時搞生日飯都喺由我諗食乜,難得姨仔有心水好介紹,就喺晌荷里活廣場由日本村姑林慧美搞嘅日牛,唔使我諗就最好不過啦。仲有,原來姨仔一早申請埋日牛張會員卡,益我慳番個加一服務費呀。
知道日牛都多人等,已經未夠6:00pm就嚟排隊,但都要等成粒鐘,其實小弟就極唔多鍾意為搵食而排隊,因為總覺得無咩必要,費時失事,浪費時間,要處理總有更好方法。不過,大家都明,佢哋都喺純粹出於商業利益考慮。

卒之入座,被安排坐最入就晌取食物之前嘅一排枱,認真方便拎嘢食,轉個身就喺。其實室內環境唔錯,深啡為主色調,高樓底,燈光都刻意調校過,整個場唔會「光撐撐」,感覺柔和舒服,但對正每個爐位又打咗聚光燈,唔會黑掹掹。同埋啲枱夠晒大張闊落,擺咗好多嘢都唔覺佢逼,最欣賞喺枱上塊「隔板」,因為有啲枱大張到坐成10人,但以一塊塊隔板間開晒,變成幾多個人嘅位都得,又減少食客之間嘅互相騷擾。
日牛主要喺涮涮鍋放題,每節1.5小時,個人覺得查實食得有啲緊。收費方面視乎揀咩種類嘅牛肉,分4個級別:日牛$133(澳洲穀飼牛+美國豬肩)、特選$163(澳洲穀飼牛+美國豬肩)、極上黑毛和牛$268(黑毛和牛+美國豬肩)、霜降黑毛和牛$338(黑毛和牛+美國豬肩),湯底選擇有昆布清湯、日牛清湯、辛口赤味噌湯及骨膠原雞湯,如果要壽喜燒(甜醬油湯),要貴$10,即由$143到$348。所有肉類可以無限添食,而配料、野菜、醬汁、汽水、乳酪則自助任取。由於依類涮涮鍋放題近幾年都開唔少,所以運作模式都幾為港人熟悉。

餐廳最入就喺一字長形擺滿食物區,最右側放有兩個飯煲,一煲白飯,另一煲喺黑松露雜穀飯,跟住一路向左掃,有豆腐、烏冬、3款野菜、素麵、蕎麥麵、鮮冬菇、金菇、雞脾菇、銀芽、蓮藕、粟米、珍珠筍、蕃茄、白蘿蔔、大蔥、洋蔥、韮菜、墨魚丸、芋絲、蒟蒻、炸方粒魚蛋、海鮮魚蛋、獅子狗魚蛋、芝士腸、粉絲、日本年糕,如果無影漏相,自助任取食物就有咁多。
跟住最尾,就有幾款醬料,都喺比較和風,包括醬油、自家製柚子胡椒汁、麻醬、辣味白蘿蔔茸及蔥花,當中以柚子胡椒汁最為得意啦,有柚子清甜味,又辣辣哋,幾過癮喎。再過啲有汽水機(可口可樂、雀巢檸茶、雪碧)、乳酪機。
可能大家都唔想我咁傷荷包,所以個個都揀晒最平嘅一級「日牛」($133澳洲穀飼牛+美國豬肩),而小弟則要壽喜燒。
好快手就上嚟5份澳洲穀飼牛及美國豬肩,色澤鮮紅誘人,紋理清晰,最緊要唔會太多脂肪,啱晒佢哋,因為佢哋幾怕啲肥膏嘢。由於兩者都薄切,灼幾灼就食得,穀飼牛更加唔使講,直情晌個湯底裡拖兩拖就經已可以入口。
澳洲穀飼牛,由於薄薄一片,所以入口唔會話肉味超濃,但嫩滑就無反對嘅理由,沾點柚子胡椒汁,效果好意想不到。由於小弟嘅壽喜燒會多附送一隻新鮮日本雞蛋,加點醬油同蔥花,撈勻後用嚟蘸穀飼牛,更加滑嘟嘟!
美國豬肩,相比起穀飼牛,油花多啲,又平均啲,同樣入口軟腍,富油香,但又無一朕好肥嘅感覺,質素認真唔錯。不過,當翻睇其他食友嘅食評,無論澳洲穀飼牛,抑或美國豬肩,時好時差,似乎水準比較飄忽,餐廳需注意啊!
至於其他涮涮鍋配料,雖然唔喺試晒,但都樣樣食啲試咗唔少,不過都難以逐一分享,只簡單總結幾句。蔬菜取材算唔得上好有特色,但都叫多元化,而且頗為新鮮,尤其幾款野菜及菇菌。此外,烏冬、素麵、蕎麥麵幾款墊肚粉麵,又的確不俗,反而日本年糕錯過咗無試,唔知質素喺點。
唔進帶外嚟食物都喺一般晌餐廳用膳嘅常識,而食自助餐、放題亦唔准將食物帶走喺公認常理,不過,晌日牛就有個不成文規定嘅奇景,就喺好多人食完臨走都仲捧住大大杯乳酪出門口。可能因為只有90分鐘時限,夠大食嘅食客都盡量晌限時內食多啲涮涮鍋食物,乳酪就晌差唔多夠鐘時再整一大杯拎走。小弟一向都嗜甜品,乳酪當然都啱啦,所以,食涮涮鍋中段食到人都熱起嚟,就先整番杯中份量嘅乳酪消消暑,乳酪只有原味,6款配料(細粒綿花糖、粟米片、朱古力脆米、彩色朱古力針、彩色朱古力星星、朱古力針)加3款甜漿(朱古力、士多啤梨、焦糖),小弟唔鍾意太雜,第一杯喺朱古力脆米配朱古力漿,正呀!臨走就再唧杯大杯啲,滿到漏咁滯,朱古力針配朱古力漿夾焦糖漿,酸咪咪嘅乳酪中帶點濃甜,冰涼嘅乳酪真喺令人「暑氣」全消,爽呀!雖知道,一杯有「份量」嘅乳酪都值幾十蚊,前後食佢兩杯,真喺抵番晒。
一人一鍋嘅日式涮涮鍋放題都幾為港人接受,但開到成行成市,要晌依個大餅分一杯羹屬實不易。日牛人龍連連,只要食材保持水準,定價合理,相信捧場客不絕。

個人評分
味道:8/10
環境:8/10
服務:8/10
抵食:8/10
平均每人消費:HK$135

餐廳資料:
日牛涮涮鍋專門店 Nichigyu Shabu Shabu & Sukiyaki Restaurant
鑽石山龍蟠街3號荷里活廣場311A號舖
3102 0122


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $135.00
商店 日牛涮涮鍋專門店 Nichigyu Shabu Shabu & Sukiyaki Restaurant (鑽石山店)