老婆嘅廣州親戚外遊，取道經香港返國內，其中舅父舅母再留幾日，目的都只喺想見吓班細姪，難得順路晌度玩多幾日，都會陪佢哋食餐好嘅。雖然廣州依家乜都有，食嘅未必比香港差，但點都好，都要盡地主之誼好好招呼吓嘅。
佢哋今日下午落機，比較奔波努累，費事為餐飯再走嚟走去，所以安頓好之後就晌番同區嘅小越南度食。因為早前跟老婆撐枱腳食過一餐，感覺幾好，食物有質素，所以都想帶埋屋企人嚟試。既然有親友駕到，就一於拉埋姨仔舅仔同佢女友一行7人食番餐洗塵飯！
![bowl]() 珍寶越式拼盤 $95
越式拼盤分迷你（$45）同珍寶（$95），前者只有炸蝦餅、酸辣無骨鳳爪、越式扎肉，而後者就再多越式分蹄同炸春卷，份量亦會多啲。我哋有成7個人，當然需要要個珍寶啦。炸蝦餅就最好食，雖則蝦味未算超農，但彈牙又唔油；然則個分蹄又幾特別，有別於我哋食燒味常見嗰種，質感較為細碎；鳳爪酸爽微辣，口感清涼。
![bowl]() 正宗越式粉包 $32
一客有4件，粉包層外皮挺薄身，做到半透明狀態，內餡包有沙葛、紅蘿蔔、豬肉，粉包再灑上魚乾、蝦米、蔥碎，蘸點魚露，鹹鹹鮮鮮，清爽不膩。
![bowl]() 清湯浸時菜 $22
老婆一家好鍾意食菜，所以就叫夠兩碟淨菜，一碟清淡就一碟濃味。清淡嘅就喺清湯浸菜心，除菜心外，仲有生菜、椰菜、通菜、芥蘭。清湯浸感覺都喺以菜心好啲，菜心較嗦湯嘛，啲菜心外觀幾嫩綠，食落無渣，吸咗清湯清甜好多！
![bowl]() 馬拉盞炒通菜 $35
炒菜可以揀蒜蓉或馬拉盞，既然晌間越南館子，當然以馬拉盞夠風味，再者點都覺得配通菜最夾，就正如食緊蝦醬炒通菜，而且碟頭頗大，都算抵食。
![bowl]() 越式金不換炒青口 $42
一碟唔喺好多青口，大概6-7隻，但勝在肥大肉厚，配以金不換、洋蔥、辣椒嚟炒，極為惹味，茨汁唔喺剩好多，否則撈飯就正喇！
![bowl]() 炸蝦餅撈檬 $40
檬粉唔少，炸蝦餅切開算叫有6件，炸蝦餅上文寫過就唔多提，檬粉撈上店方自家製嘅魚露，溝埋啲野菜絲、花生碎，爽口得嚟又清新。
![bowl]() 香茅豬扒湯河 $36
香茅豬扒切好已浸晌湯中，都喺豬扒、湯河分開上好啲，咁樣香茅豬扒除咗香茅味濃之外，多份經煎封嘅豬肉脆口感。河粉柔長滑溜，湯底又頗有肉香，唔錯！唔錯！
![bowl]() 西貢炒飯 $41
賣相就幾似我哋常見嘅揚州炒飯，不過無咗蝦仁同叉燒，換來喺啲蝦米碎、扎肉。基本功唔錯，飯粒分明夠乾身，食完碟底又唔會一攤油。
![bowl]() 香茅雞翼金邊粉 $34
後段出菜幾快，啲粉麵檬一碗接一碗，所以個金邊粉影漏咗相，無辦法啦，成枱人得小弟一個晌度影相，其他人個個等住食，有啲尷尬。香茅雞翼頗入味，煎得蠻香脆，金邊粉幾似米粉，但比較粗少少而且呈方形，個人而言，口感跟食米粉無太大分別。
![bowl]() 蕃茄牛腩飯 $38
牛腩採用坑腩，肉味濃質感鬆化，但就有啲肥；個蕃茄汁做得幾濃郁，色澤深紅，內裡又幾多蕃茄，唔喺話佢好好食，但唔及上次試過佢哋個咖喱咁香。
![bowl]() 越式滴漏咖啡 $11
今次小弟無飲嘢喇，但就介紹咗佢哋試吓依度個滴漏咖啡，一來坊間少有，要試都要去食越南菜嘅館子，二來點咗主菜，用$11就可以飲到，正價本身熱嘅要$23，凍嘅都要$25架。咖啡由上層咖啡粉中逐滴逐滴咁滴漏，感覺好有一種精華感，配以煉奶，舅仔試過都覺得幾特別喎。
今次再嚟，上次個侍應（我估佢可能喺主管）竟然仲認得我，大家又傾多兩句，可能見我帶埋一家人又嚟捧場，私人醒咗個九折俾我，真喺多謝晒。本身依度已經唔收加一，我哋今晚又叫咗唔少嘢，九折咗確喺慳唔少，7個人埋單都喺四舊水，非常抵食！食物質素唔錯，價錢都算街坊，服務又幾到位，怪不之得有時經過見佢晚市咁旺啦。
個人評分
味道：7/10
環境：6/10
服務：8/10
抵食：9/10
平均每人消費：HK$60
餐廳資料：
小越南
美孚美孚新村吉利徑5G號地下37號舖
2955 0218
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
