抱歉,發生點錯誤。
重新載入
北京人家 House of Beijing:北京不覺
山區麵包王
2013-09-29
749
0
分享
收藏
晌荃灣荃新天地嘅北京人家都唔喺第一次到訪,曾經嚟過幫襯晚市,慶祝老婆生日,不過都已經喺幾年前嘅事。嗰次嘅感覺喺菜名特別,但味道普通,定性為平淡嘅一餐,今次與另一對教會夫婦再訪,無乜特別原因,只喺貪其環境好,適合慢慢傾,慢慢食。
一向都幾鍾意美心嘅中餐館,尤其又一城八月花、尖沙咀潮庭……等等,裝潢、服務做得非常到位。以依間北京人家嚟講,大堂一字長形夠通透,通花吊燈有中國特色,布梳化椅貼背好挨,環境稱得優雅舒適。不過,午市人手明顯不足,望落好似一個侍應要應付十多張枱,見佢哋成日四圍張羅。
我哋一行4人,雖然有啲4人用嘅「午市自選小菜套餐」($388,另收茶位費、前菜費及加一服務費),包點心、冷盤、湯羹、小菜,如果有心嚟試佢小菜其實都幾抵食,因為都有好多款風味小菜可揀,如宮爆明蝦球、糟溜魚片……等等,不過,我哋就只喺想食吓點心啫。
點心紙就一小張睇晒,京川滬粵美點、生滾粥品、精美廚點、現拉腸粉、各式飯麵、特色甜品共70多款,無話分大中小點咁煩,每款食物下都標明價錢,明碼實價。另外,茗茶$9位,收加一,但睇番張單,兜前菜就無收過錢,唔知喺免收定打漏!
bowl前菜
小小一兜蒜泥青瓜豆腐乾,青瓜爽口又富香蒜味,而豆腐乾腍腍韌韌有咬口,豆味濃。呷啖茶,食啲前菜開開胃。
bowl灌湯小籠包 $32
皮唔算好厚,但摺紋做得較粗疏,尤其埋口位,咬落一舊粉咁。唯餡肉及湯汁都交足課,前者幾鮮味,後者則清甜。
bowl蜆芥鯪魚球 $42
一客6粒,炸得甘香,入口熱辣辣,鯪魚球魚味濃,又彈牙,因為調味唔錯,淨食都OK,沾咗蜆芥反而鹹得滯。
bowl煎芋頭糕 $16
一年只有過農曆年食得多之外,平時真喺好少點依道點心,美心出品嘅芋頭糕一向足料,芋頭味香濃,質感挺實,唔會靠溝粉,煎得香口都收貨啦。
bowl鮮菌腸粉 $36
個腸粉真喺幾貴,不過,相信貴在人工及手工。腸粉即拉,睇相你就知個皮拉得有幾薄,而且又夠滑溜;內裡嘅餡料非常多,有冬菇、磨菇、甘筍粒……等等,切得丁方巧小,樣樣都喺功夫。
bowl豉油皇炒腸粉 $32
腸粉喺蝦米腸,但嫌佢蝦米少,不過,勝在炒得「勻巡」,條條腸粉都上晒色,蘸點麻醬已經好好食。
bowl馬拉盞 $16
馬拉糕獨立版,雖然質感鬆軟,有蛋糕清香味,但都喺鍾意一底底,一件件嗰啲馬拉糕,感覺更富彈性。
bowl蔥油大餅 $32
勁多蔥,啱晒小弟。咪睇佢好似好大個,怕食落好滯膩,請放心,因為大得嚟薄,加上多蔥,感覺較為輕盈。可能有啲人覺得唔抵食,蔥油大餅一般都又大又厚,如果你喺想要大厚嘅蔥油餅,依個就真喺唔太啱你喇。
bowl酒釀燕麥小丸子 $20
酒釀小丸子重點在於個酒釀及桂花,兩者都好平衡,糖水入口有微微酒味又嗒到桂花香,小丸子煙煙糯糯,特別加入燕麥,多添一份咬口感,仲有少少似食糯米麥粥嘅感覺。
齋睇店名「北京人家」會有個錯覺佢喺賣京菜,查實無論晚市定午市,都唔只京菜一種,仲有川滬粵菜,所以,今次食評個標題「北京不覺」其中一個含義想講就喺唔覺佢只賣京菜;其二,跟這對教會夫婦都認識咗唔少年日,間唔時完咗教會崇拜都會一齊去食吓茶,彼此嘅情誼真喺「不經不覺」累積咗咁耐。

個人評分
味道:6/10
環境:8/10
服務:7/10
抵食:6/10
平均每人消費:HK$75

餐廳資料:
北京人家 House of Beijing
荃灣楊屋道1號荃新天地上層地下43及81號舖
2941 0066


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $75.00
商店 北京人家 House of Beijing (荃灣分店)