老婆一句話攰唔煮，出街食，鍾意試新嘢嘅我梗喺無問題啦。荃灣區都算常出沒嘅地方，不過其實仲有好多食肆未試過，就好似今晚幫襯嘅「台灣麵」，原來都開咗成5年，一直都過門不入未有到訪。據說喺由正宗台灣師傅操刀，對小弟嚟講，喺唔喺台灣師傅都問題不大，唔通香港師傅就一定煮唔到正宗台灣麵？再講，雖則我都去過台北、高雄、台南等地，但對台灣麵食就唔喺好有研究，正宗唔正宗都難以判別，最緊要喺煮得好食。
好早輪見佢再裝修，鋪外、鋪內都煥然一新，牆紙款式、吊燈、枱椅都換過晒，不過格局就似乎無乜點變，感覺都喺有啲逼。枱上嘅餐紙，印有招牌麵「台灣紅燒牛肉麵」嘅大相，當然要會一會依個紅燒牛肉啦。
翻翻餐牌，散叫、套餐都有，都有唔少選擇，幾花多眼亂。將範圍收窄少少，點套餐為上算。有個全天候套餐（$39-$44），即喺全日任何時間都有供應，有麵有飯近廿款，送港式熱飲、豆漿或當令時菜（凍飲+$3，轉台式冷熱飲品+$4），仲可以以優惠價$12換購多一份指定台式小食，正價要過$20。另外仲有個雙拼粉麵飯套餐（$47-49），晌A項（一共7款台式麵食）及B項（另一組共10款台式麵），自行揀兩款配搭，同樣送港式熱飲、豆漿、當令時菜、加錢換小食。其實以上邊個套餐，都可以改粗麵、拉麵、米線、飯、乾伴麵、關廟麵、新竹米粉。
全天候套餐及二人套餐餐牌
雙拼粉麵飯套餐
如果想食得豐富啲，又可揀個二人套餐（$148），有齊點心 / 前菜 / 湯（揀1款）、上湯灼時菜、台式小吃（揀1款）、麵飯（揀2款）、港式熱飲（2杯）。再想食好少少，有個升級版（$168），只喺晌每個類別中可以揀嘅嘢就貴啲、正啲咁樣。
全天候套餐 $44
![bowl]() 台灣紅燒牛肉新竹米粉
如果散叫一碗台灣紅燒牛肉新竹米粉要$36，老婆唔要嘢飲，想食多啲菜，一碟菜散叫收$20，依家就晌全天候套餐度揀，兩樣夾埋$44就有著落喇，慳番成十幾蚊！店員話佢哋啲牛肉以慢煮處理，以上選嘅一級牛肉密封低溫慢煮燜熟，熟真熟假未有入過廚房驗正，但啲紅燒牛肉果然唔錯，軟腍鬆化，肉味幾濃郁，又帶啲筋位，多份咬口感。而菜牌內頁有特別介紹啲新竹米粉：「台南直送，傳統磨米方式技術，純米製作，魅力不凡」，唔知點解喺「台南」直送，唔喺應該「新竹」直送咩？？？魅力不凡都講得有啲誇。新竹米粉口感上比起廣東米粉幼身啲，似介乎晌米粉同粉絲之間，但質感卻又煙韌啲，扮扮台灣人：「啲米粉好Q呀！」論到個湯頭，感覺就一般啲。
![bowl]() 上湯灼時菜
時菜喺紹菜，咁就出事，老婆一心想食碟菜，但紹菜喺佢最唔鍾意嘅蔬菜，因為佢公司個飯堂10次內可能有7、8日都喺整白烚紹菜，難食都震，所以佢對紹菜都生畏，結果，成碟由小弟一個食晒囉。講真，眼前依碟紹菜亦唔喺好得去邊，只喺靠淋上面嘅蒜頭豉油俾啲味。
雙拼粉麵飯套餐 $47
![bowl]() 滷蛋豆腐肉燥飯（B1）拼台式豬腳關廟麵（B5）
上面已講過雙拼粉麵飯喺由A項及B項嘅組合，AA / AB就賣$49，而BB則收$47，雙拼粉麵飯最大好處莫過於一個價錢試到好多樣嘢。咪講笑，個「雙拼」都幾大碗，半隻滷蛋、酥炸豆腐、少少肉燥，味道都唔錯，尤其個豆腐，裡面幾軟滑幾香豆腐味，飯粒亦夠分明；另一邊嘅台式豬腳關廟麵，有兩件台式豬腳，亦加咗少少肉燥，豬腳就唔喺有咩特別；而關廟麵第一次食，喺台南名物，聞名嘅手工麵，幾年前去過一轉台南，都真喺唔知有種關廟麵嘅嘢，關廟麵都幾粗身，咬落又真喺幾有嚼勁，多少有幾分似食伊麵。店方同樣強調佢哋嘅關廟麵喺由台南直送，人工日曬製造，久煮不爛。
![bowl]() 椰香芝麻奶露
單售正價要$24，依家跟餐補多$4就有一杯喇。簡單嚟講，佢就喺一杯溝咗椰奶同芝麻粉嘅牛奶，有椰香，有芝麻香，秋冬嘅滋潤熱飲之選，個人嚟講，味道不俗。
雖然台灣麵有店員招呼，送麵上菜，但唔收加一，整體質素唔差，但又唔會令人有好深印象。對比起食碗雲吞麵、魚蛋粉，晌台灣麵食一餐唔算得話平，但相對食日本拉麵，消費又無咁高。假若凡事計較，比較邊樣平、邊樣抵，可能會令你錯過食物本身嘅味道同價值。別忘記，舒服嘅概化椅、唔錯嘅招呼……都喺你所食嗰碗麵嘅成本之一嚟！
個人評分
味道：8/10
環境：7/10
服務：6/10
抵食：6/10
平均每人消費：HK$48
餐廳資料：
台灣麵 Tai Wan Kitchen
荃灣青山公路185-187號荃勝大廈地下A1
2408 6621
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
