有時晌啲網上遊戲抽到啲飲飲食食嘢，都會醒啲俾老死Ivan兄，佢為人對食都頗有研究，所以佢似食家多過我，小弟我依類都只喺為為食食啫。佢老兄話受得小弟「恩惠」多，想回個禮，查實就真喺唔使，嗰啲獎品嘢都喺借花敬佛而矣，何足掛齒！回禮嘅事丟低咗，後來Ivan兄話買咗世家Segafredo Zanetti嘅All-day High Tea套餐團購，不如一齊去試，結果上當就受咗依份回禮喇。大家都喺晌中上環返工，理所當然收工過嚟上環店度食就最便捷，唔使專燈再出嚟。
比起逾三千多呎銅鑼灣嘅旗艦店，上環店絕對喺蚊型小鋪，幸好入夜後嘅中上環都好靜，尤其好似世家依類縮晌內街嘅鋪頭，就更加靜焗，故此客人都唔多。Segafredo Zanetti本身喺意大利著名嘅Espresso生產商，其後搞埋餐廳，店舖可謂遍佈全球。
話說回來，今次團購個「高茶」點夠我哋兩個男人當正餐食吖，所以，嘆完份「高茶」，另外再加多一份3道菜嘅晚餐。整份高茶一共有8款嘢（鹹甜各4款），最好就喺每款兩件，唔使分嚟分去。Segafredo Zanetti貴為意大利品牌，個「高茶」賣相就未免「有失身份」，唔好話以三層架咁高姿態，就咁以兩隻餐碟都喺令人感覺過於普通。
![bowl]() 鹹點：鵝肝多士、火腿芝士三文治、迷你春卷、煙三文魚泡芙
鵝肝多士，只喺鵝肝醬配法包，法包一點都無烘過，所以多士之名有點兒戲，鵝肝醬粉嫩柔軟，食落口鹹香軟滑；火腿芝士三文治相信喺成個餐最低分、最無睇頭嘅出品，一般茶記食到嘅水平，除非夾住嘅喺巴馬火腿就可能另眼相看；迷你春卷一睇就似足越南嘅絲網春卷，還算鬆脆，但原來餡料有滿滿蝦肉，即時加番分俾佢；泡芙甜食就試得多，鹹食就較為少，依個煙三文魚泡芙細細個，可以一口搞掂，乾淨俐落，泡芙唔算好鬆軟，內裡亦只喺單單夾片煙三文，口感有啲寡，如果加點蜜糖芥茉汁，相信味道更有層次。整體上，鹹點有啲未夠秤，其一就喺款式唔突出，其二，味道有好大改善空間。
![bowl]() 甜點：栗子撻、意大利芝士餅、芒果慕絲蛋糕、馬卡龍
甜點又咩景呢？款式及外觀，至少比鹹點好。栗子撻，精緻小巧，朱古力撻底頗鬆脆，栗子蓉做得幼滑，味道粉甜；意大利芝士餅，純以個人口味就肯定唔達標，以海綿蛋糕取代手指餅做底，都唔喺問題，但啡味酒香味欠奉，而上層芝士餡只佔一小部份；反而芒果慕絲蛋糕做得唔錯，芒果慕絲好柔滑，味道清甜，加埋點點果肉，很有水準喎；馬卡龍，一啡一綠，喺焦糖跟綠茶，表面烘得幾圓滑，手勢唔錯，味道不竟都喺偏甜，正宗馬卡龍嘅特色，口感煙韌緊至，滲點焦糖、綠茶香，不俗！結論喺甜點比鹹點稍優勝，但仍可以再做好啲。
![bowl]() 餐飲
咖啡以外，都有幾多餐茶選擇，例如伯爵茶、洋甘菊茶、薄荷茶……等等。我哋兩個都要咖啡，Ivan兄要嘅喺意大利泡沫咖啡，小弟則點咗鮮奶咖啡，拉花似乎喺個心形，不過唔喺幾靚，還好就喺咖啡有水準，咖啡香氣馥郁，味道很醇和。
個「高茶」套餐話原價值$288，感覺有點疑問，當然依家團購價$99（另加一），確實超晒值，因為淨喺兩杯靚咖啡都差唔多要咁嘅價啦。不過，當正餐兩個就一定唔夠食，所以我哋再另外點多一個餐，佢有個「all day set menu」，無分日頭定夜晚都有得嗌，有前菜 / 餐湯、主菜、甜品、餐飲，價錢視乎所選主菜而定。
全日套餐（All Day Set Menu）餐牌
散點餐牌
![bowl]() 煙鴨胸沙律配檸檬蜜糖汁
沙律菜之上，有煙鴨胸及柚肉、哈蜜瓜，配襯酸酸甜甜嘅檸檬蜜糖汁，挺醒胃。以一個套餐嘅前菜嚟講，份量實屬不少呀。
![bowl]() 燒雞肉青豆意大利飯（$103 – 套餐價）
主菜依晚就有5款，有三文活、意大利粉、意大利飯、燒法國春雞及煎三文魚。揀個意大利飯都無咩偏好，都只喺隨意。青綠色嘅外觀源於青豆所做嘅汁，青豆味唔錯喎，意大利飯煮得又夠咬口，拌有好多菇菌同燒雞粒，撤上少少即磨黑椒碎，好好味，如果可加少少芝士粉就仲正添。
![bowl]() 意式奶凍
是日甜品喺無得揀，只有意式奶凍，平滑嘅奶凍本應賣相平平無奇，不過以紅莓漿及朱古力漿畫咗個笑臉出嚟，份外有趣。再者，個奶凍做得挺身柔軟，好重奶味，又有雲呢嗱香，因為刮到下面粒粒雲呢嗱籽就會清晰可見，絕對真材實料。
小弟一杯咖啡就夠，所以全日套餐杯餐飲就再由老死搞掂。今晚好開心跟老死食嘢吹水，雖然個高茶未達預期，但個晚餐質素仍高，輕輕鬆鬆傾咗兩個幾鐘，慢慢食慢慢嘆，感覺好有偷得浮生半日閒。
店家仲提供半自助晚餐
個人評分
味道：8/10
環境：6/10
服務：8/10
抵食：7/10
平均每人消費：HK$110
餐廳資料：
Segafredo Zanetti Espresso
上環永樂街71-77號地下G舖
2850 6332
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
