毋庸置疑，天后可以稱得上已經成為一個美食小區，唔少小店都已經薄有名氣，有啲甚至打出名堂。不過，仍有好多食店在默默耕耘，好似人生咁，有實力卻似乎欠點際遇，好易被人忽略，成為漏網之魚，今夜所試嘅「御名軒」，就有種咁嘅感覺喇。
其實御名軒真喺非常就腳，港鐵天后站A2一出就喺，大大個霓虹招牌，都幾難搵錯地方。沿樓梯上去，原來有啲啱啱晌旅發局嘅烹飪比賽中贏出嘅獎狀，可見御名軒都非泛泛之輩。上到大堂，長形一眼望晒，天花吊咗多盞紫色水晶燈，棗紅色花紋地氊，淺黃色枱布襯香檳金櫈圍，一派中式酒樓常見嘅格局，以及專擺婚宴慣用嘅色彩配搭。
店方曾晌旅發局嘅烹飪比賽中獲獎
大廳柱位唔多，地點又就腳，擺婚宴都唔錯喎！
是晚基本上安排咗7道菜式，另再多加兩道炒粉麵，令今晚嘅餸菜更豐富。多款菜式唔單止名堂特別，食材配搭好有新意，賣相、擺花亦做得頗為精緻，真喺色香味俱全！
![bowl]() 虎乳靈芝海底椰燉豬展 $168 / 四位用
首先上場喺店家自信之作嘅燉湯，相中嘅燉湯喺4倍份量，供12位用，而撈一撈就見用料十足，其後將湯渣另碟上，就可知內裡有海底椰、未成熟的海底椰果肉、豬展、雞腳，以及另一重點食材虎乳靈芝（白靈芝，碟中黃黃哋一片片似山草藥就喺喇），清燉4小時後就成為此盅清熱潤肺、化痰止咳嘅滋補靚湯。入口果然清甜、滋潤，其食療功效啱晒我依類哮喘病人飲啦，所以小弟老實唔客氣，添飲唔該！
![bowl]() 蟲草花炒大連鮮鮑 $198
一組拉糖所做嘅珊瑚裝飾，令賣相幾賞心悅目。以大量芽菜跟蟲草花同大連鮮鮑條快炒，配上惹味醬汁，爽口嘅芽菜，軟腍嘅蟲草花，煙韌嘅鮑條，再加埋少少點綴嘅炸瑤柱絲，個人覺得整個配搭上唔錯，口感各有特色。雖然蟲草花跟冬蟲草喺兩回事，不過蟲草花同樣喺養生食材，含豐富蛋白質、多種氨基酸、維生素……絕對有益健康。
![bowl]() 蜂蜜炭燒鰻魚 $130
又喺一道賣相精緻嘅菜式，鰻魚炭燒後金黃帶微焦，表面富光澤，藉以香橙片伴碟，睇見都好想食。鰻魚以2-3斤重嘅入饌，貪其做出嚟嘅口感爽脆油潤，簡簡單單以蜂蜜、檸汁明火慢烤，鰻魚厚身有肉地，咬落外層香脆，內裡嫩滑，帶點清甜蜜糖香之餘，而檸汁又有效減低油膩感，所以，別具風味，值得推薦。
![bowl]() 蟹籽元貝滑西施 $138
絕對喺蒸蛋白嘅豪華版，因為鋪上香煎過嘅帶子，以及一大撮蟹籽，再放上茨汁。蛋白蒸得非常滑溜，夾雜埋帶子及蟹籽同食，多添一份鮮甜，帶子雖則喺急凍貨色，但質素不俗。賣相方面，繼續精巧而構圖美，確喺好睇又好食！
![bowl]() 竹翠銀杏 $78
鮮鮑、鰻魚、元貝試咗幾款海鮮食材之後，嚟個清淡嘅素菜最健康不過。與其話佢清淡，其實反而喺正正食番出各種食材原味，清甜嘅鮮百合、白果，加埋爽脆嘅西芹、藕片、雲耳、榆耳等清炒，少鹽少油無添加，外觀又色彩繽紛，簡單也可以健康好味。
![bowl]() 鹽燒芝麻脆雞 $250（需預訂）
如果用「外脆內嫩」嚟形容依道菜，只可以話啱一半。據介紹做法都有點繁複，先以秘製醬汁嚟醃，之後鹽焗，又加上白芝麻，再風乾，又再慢火烤燒，所以唔預訂邊有咁多時間搞吖。因為用上兩斤半左右嘅鮮雞，所以肉質本身已夠嫩滑，配合上述做法，入口唔單止皮脆，外皮既有芝麻香，而雞肉又滲出點點海鹽鹹鮮，真喺好有水準嘅一道菜式，更喺小弟是晚另一推介菜式。
![bowl]() 麵醬雞球炒河
無論濕炒定乾炒，查實炒河粉都幾蝦人炒得好，單尾首先嚟依道麵醬雞球炒河，個人認為做得算喺不俗，河粉唔會炒到「一舊舊」，麵醬雞球幾香幾惹味，不過配翠玉瓜感覺麻麻，而茨汁太多會喺失分嘅地方。
![bowl]() 龍鬚芝麻炒麵
龍鬚？魷魚鬚是也，將豉油皇炒麵加入魷魚鬚及芝麻而變身成為高檔版。豉油皇炒麵入味又夠乾身，食落唔油膩，麵條帶點爽口，又有芝麻香，其實加唔加魷魚鬚，都變得唔重要。
![bowl]() 燕窩紅棗糕 $48（6件）
最後上場嘅甜品，一樣很有心思，賣相依樣細緻非常，而且甚有桂花拉糕嘅影子。唔講真喺唔知，原來要先將紅棗慢火蒸燉成日，讓紅棗全然出味，加入木薯粉、糯米粉等材料，一層又一層咁紅白相間逐層蒸，唔難做，但花功夫呢！單食件紅棗糕已好好食，口感軟糯煙韌，清甜而棗味突出；再晌糕面加上印尼燕窩，矜貴不言而喻，當然燕窩亦喺女士們恩物，養顏聖品嘛，此外，紅棗有補血之效，實在好啱女生嘅甜點。
以上食咗唔少好嘢，飯後果盤啱晒，食多幾件幫助清化！
靜待嘅卧虎，能否晌天后依片美食樂土湧起軒然波濤，有待時間去印證。但憑今晚所試嘅菜式，既精巧，又有創意，不少仲帶有藥膳價值，喺不容小覷佢嘅實力！
個人評分
味道：9/10
環境：8/10
服務：8/10
抵食：9/10
平均每人消費：HK$0（試食邀請）
餐廳資料：
御名軒 Royal Legend
天后電氣道22-52號金殿大廈1樓
2578 9983
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
御名軒 Royal Legend：卧虎靜待．御名軒然
BY 山區麵包王
