抱歉,發生點錯誤。
重新載入
一鍋–台日式精緻小火鍋專門店 iPot - The Shabu Shabu Expert:鍋心湯底
山區麵包王
2013-02-25
1415
0
分享
收藏
「一鍋」,顧名思義,就喺一人一鍋,佢個英文名「ipot」亦都改得幾有型,跟蘋果嘅ipod驟眼睇落有點似。座落晌天后琉璃街嘅一鍋,鄰近天后地鐵站,交通方便,主打台日式精緻小火鍋,某程度喺以台式小火鍋為實,加添日式用料為副。跟老闆之一Gary傾開,原來小火鍋對台灣人嚟講,就好似我哋香港人食雲吞麵咁普遍,食得輕鬆,食得隨意,怪不之得近嘅一枱喺台灣熟客,遠嗰一枱又喺一家大細台灣人,小弟亦有幸獲邀嚟品嚐一下台灣小火鍋嘅風味。
由於一鍋一心想以質素取悅客人青睞,所以無論丸類、牛肉、豬肉……等,用料比較高質,故此成本自不然貴,定價亦會比一般任食火鍋店為高,單以價錢感覺會唔太親民。但喺,若以質素而言,條數就唔應該咁計。況且,店家環境骨子,感覺舒適,少咗酒家份嘈吵,多份寫意寧靜,幾啱三幾個朋友嚟慢慢食、慢慢傾。店方為方便管理,分咗3個時段:6:00pm-8:30pm、8:30pm-10:30pm、10:30pm-12:30pm,不過,店主Gary都解釋依個都唔喺硬性規定,如果當晚人客唔算太爆,都唔會太跟足個時段做嘢,早啲嚟又得,晏啲走都得,但如果撞正日子旺,就要依時依候交枱喇。
小火鍋享用模式好簡單,有少少似半自助餐,猶如一條方程式咁: 湯底1鍋 + 肉類1份 + 自助吧任食任飲 + Haagen-Dazs雪糕1杯,而收費取決於所揀選嘅肉類。肉類分為4大類、5個級別價錢:
牛肉類
 - 美國雪花肥牛200g($180)
 - 美國安格斯牛肩胛肉200g($225)
 - 美國安格斯去骨牛小排200g($270)
 - 美國頂級肉眼200g($315)
 - 澳洲和牛肉眼180g($450)
豬肉類
 - 培根豬200g($180)
 - 日本松阪豬肉200g($225)
 - 日本黑豚腩肉 / 日本梅花肉200g($270)
羊肉類 - 紐西蘭小羊捲200g($225)
雞肉類
 - 美國無骨滑雞肉片200g($180)
此外,亦可以以優惠價再追加,例如第5級別嘅雪花肥牛、培根豬、無骨滑雞肉片都只不過$20 / 100g,其他為$30 / 100g(第4級別)、$50 / 100g(第3級別)、$80 / 100g(第2級別),而第1級別就當然喺最貴,追加價為$150 / 100g。
bowl一鍋
正所謂「工欲善其事,必先利其器」,上文講過依度喺以一人一鍋嚟打鞭爐,每個位前就裝有小型嵌入式電磁爐,無火既安全又無咁熱,而且爐面座低咗,更減少翻燼打瀉嘅可能性;開關及火力調較就晌枱邊下端,1-5度火力,滾起上嚟火力十足,自我操控,完全掌握手中。
bowl自選湯底
食火鍋,湯底非常重要,火鍋嘅靈魂,否則就唔會有人不斷研發唔同湯底。一鍋一共有8款選擇:原味嘅有牛骨湯、豬骨湯、素菜湯,特色嘅有台式麻辣鍋(又BB辣、醫院辣、棺材辣,好恐怖耶)、日式壽喜燒鍋、北海道牛奶鍋、養生蕃茄鍋、香濃咖喱鍋。5款特色湯底中,台式麻辣跟北海道牛奶鍋喺以牛骨湯做基礎,而其他3款則用上豬骨湯做底。一人一鍋有幾方面好處,一來方便衛生,完全唔會擔心食人口水尾,二來可自選啱心水湯底味道,三來最正喺按個人口味嚟調味,調味?無錯,因為店家已為各款湯底作出添加準備,唔會好似外間淨喺加水,再者,由於水份蒸發,湯底會越嚟越濃,好似日式壽喜燒鍋咁,就會越食越甜,故此,你大可按本身喜好加番原裝湯底,抑或加點水溝淡少少作平衡。多款添加用正湯已放晒近廚房矮櫃上,Gary話台灣人一向會自行添加,但香港慣被招呼,所以通常由侍應嚟服務,不過如你都唔介,又體驗下人家地道文化,可以自己動手加湯添水!
添加用嘅正湯
bowl日式壽喜燒鍋
同行朋友算喺少少哈日,所以揀嚟日式壽喜燒鍋,成份有甜醬油、昆布、燒酒,味道帶點甜香,配牛肉、豬肉都唔錯,令涮過嘅肉有份甜味。
bowl養生蕃茄鍋
小弟年紀唔細,見個「養生」二字,就特別投契,講吓笑啫,實情我都幾鍾意蕃茄,鍋內仲有好多大大件蕃茄肉。蕃茄清新酸香,湯底好有蕃茄味,其後我都喺添加原裝湯底,保持蕃茄味鮮活。
當晚偶遇另一班真正嘅殿堂食家,有幸黐咗老細為佢哋以養生蕃茄鍋剩餘嘅蕃茄濃湯所做嘅意大利飯,估唔到幾得喎,好濃郁嘅蕃茄甜味,又藉下忌廉帶有滑溜感,加點芝士碎,真喺幾正。佢話仲喺試驗階段,未正式放入餐牌,其他湯底相信亦可以搞下花臣,例如北海道牛奶白粥、香濃咖喱燴飯、日式壽喜燒湯年糕……等等,唔知可唔可行,不過有啲嘢要試過先知嘅。

蕃茄濃湯所做嘅意大利飯
bowl醬料
港人食火鍋就最喜歡「混醬」,入門口左邊就有個醬料區,上面一組有麻油、黑醋、醬油、白醋、甜白醋及生雞蛋;而下面一組有沙茶醬、麻醬、白芝麻、蔥花、生蒜蓉、乾蒜、乾蔥、白胡椒粉、辣椒粉及辣天椒多款調味料。小弟就稍稍鍾意惹味,但又想有點清香,所以生熟蒜、乾蒜、沙茶醬加蔥花,再加隻生雞蛋,配肉配丸都OK架!
bowl自選肉類
上文都講過自選肉類嘅套餐價同追加價,可見全部都喺產自美國、澳洲、日本、紐西蘭嘅靚貨,但溫馨提示一下,追加價只適用於追加同級或以下價錢嘅肉類。

bowl日本黑豚腩肉
朋友點咗由日本鹿兒島來貨嘅黑豚腩肉,其實鹿兒島嘅黑豚肉可以話喺享負盛名,有人媲美為豬肉界嘅神戶牛柳喎。雖然喺豬肉,但黑豚經專人飼養,餵食特別飼料,令黑豚本身脂肪含量低,所以,睇落確喺脂肪唔多,色澤粉嫩。個人感覺肉味唔喺超強,薄切嘅黑豚腩肉,肉質細嫩鬆軟,頗為鮮味,配日式壽喜燒或北海道牛奶都應該唔錯。
bowl美國安格斯去骨牛小排
試咗一款豬,當然要試番一款牛,安格斯嘜頭,多少喺品質保證。牛小排油花頗平均,輕灼後,牛肉味濃郁、軟腍,而有份入口即溶嘅感覺,可以揀啲濃啲嘅湯嚟配都無問題。
bowl火鍋料自助吧
入門口左右兩邊挨牆就有多款火鍋料,醬料傍就有企身大雪櫃,放有20多款乜丸物丸,仲有菇類、日本粟米(可以就咁新鮮食)、豆腐、蒟蒻、牛柏葉……等,另一邊廂則有6款新鮮青菜、一丁、烏冬、粉絲。自己出去拎,好處喺份量、款式完全自己控制晒,少少咁拎,至多行多兩轉,唔會浪費;又可以睇過靚唔靚先要,猶如晌街市買菜;仲有就唔會好似剔紙仔咁,有啲嘢剔極都唔嚟,有啲就剔一件佢就俾半打。
雖然樣樣一粒一件,但都食得小弟好飽。雖則任食火鍋料主要都喺得丸類,但喺,不乏特色,小弟推介嘅丸類包括:芝心包、南瓜包、XO海鮮包、芝士蛋、香菇貢丸球、羊肉包、黑椒牛根丸包、蟹粉蟹籽包,部份喺好食,例如香菇貢丸球好爽彈又夠菇香、南瓜包內嘅南瓜蓉好似流心餡;部份喺有特色,例如XO海鮮包、羊肉包。老闆話全部丸類都喺由台灣直送,粒粒成本都要三幾蚊,著實唔平,總共有成40到50款,但地方所限,通常會提供大部份,不時轉款。相對嘅另一邊。
青菜類提供亦唔少,當晚所見就有娃娃菜、小棠菜、西洋菜、皇帝菜、唐生菜、油麥菜,放晒晌竹筲箕,睇落相當新鮮。因為太飽要捧晒肚,所以,上面嘅出前一丁、烏冬就無掂過!不得不提,火鍋料補充得幾快,甚少見有缺貨情況
除以上任食火鍋配料,又有啲收費配料,如台式嘅棒球貢丸($18/2隻)、豬血糕($20/1份),海鮮嘅日本扇貝($30/2隻)、廣島蠔($30/3隻)、帶子($30/2隻)……等等十多款。仲有店方誠意推介嘅「周師傅魯肉飯」,都只喺賣$10碗,人多不妨叫一碗分享試試。
bowl飲品
位置就晌入門口右邊,上層有烏梅汁、洛神花茶、冬瓜茶,下層有多款支裝汽水,可口可樂、雪碧、芬達、玉泉忌廉,雖然跟罐裝理應同味,不過支裝飲落有感情。全部無限添飲,多少隨意,幸好小弟腸胃一向都受得吓,先嚟一杯烏梅汁,酸酸咪幾醒神,作為自我嘅迎賓飲料喺個好開始。一路打鞭爐,就會越食越熱,可樂同玉泉忌廉走唔甩啦,最後試埋杯洛神花茶,同樣飲落微微酸,食咗咁多嘢,清清味蕾再食雪糕就啱晒啦!如鍾意啤酒嘅朋友,又可以試吓佢哋嘅台式啤酒,單售$25 - $30,唔算便宜,不過帶果味嘅啤酒,如白葡萄、荔枝、芒果、鳳梨,你又試過未?
bowl甜品
飯後甜品總喺好多人食飯嘅慣性,店家既然希望想大家都食到啲高質嘅嘢,雪糕嘅級數都唔可以太馬虎。Haagen-Dazs當然夠照啦,雖然唔喺任食,但少食多滋味,口味有雲喱拿、士多啤梨、咖啡、朱古力同忌廉曲奇,一杯味美嘅雪糕亦為今餐作個美好嘅完結!
總體嚟講,老闊確喺有心做好個台式小火鍋,希望多啲人品嚐到當中嘅滋味,所以幾注重食物嘅品質,用料嘅級數,對細節嘅認真,睇得出有誠意,心中有團火。當然有啲地方仍有改善空間,好似加強台式嘅丸類選擇、粉麵可以改用新竹米粉、麵線之類。只要食物做得好,定會有人賞識,祝願小店成功,再次感謝店方邀請!

個人評分
味道:8/10
環境:8/10
服務:8/10
抵食:7/10
平均每人消費:HK$300

餐廳資料:
一鍋 – 台日式精緻小火鍋專門店
天后琉璃街11號地下
2111 1241


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $300.00
商店 一鍋 - 台日式精緻小火鍋專門店