首次嚟到蘭桂坊嘅樂宴，同樓下蘭桂坊嘅街景好唔同，滿街酒吧都喺人，有收咗工嚟飲吓酒嘅，有遊客嚟見識吓嘅，但上到位於商業大廈內嘅樂宴，感覺唔同晒，環境較為靜焗，少咗份嘈雜聲，上嚟飲嘢嘅人都較為斯文，雖然唔似一般日式居酒屋咁熱鬧，但靜靜焗焗傾吓偈又幾唔錯。裝修喺一貫嘅和風，深啡木枱板椅，不少日式海報，吧位及一邊牆身擺放好多酒樽，泡盛、燒酎、清酒……等，枱櫈間亦比較闊落，坐得鬆動，較為特別喺附設露台位，對下就喺蘭桂坊。
坐咗成晚，見佢客路主要都喺外國人同少部份日本人，並且飲酒居多，食嘢其次，所以侍應都比較清閒啲，我哋一遞手就有侍應即時前嚟招呼。今晚所見，有兩個侍應，一個外藉女侍應，另一個似喺日藉男侍應，唔算得上招待熱情，但服務都唔錯！
![bowl]() 啤酒苦瓜漬 $45
苦瓜喺沖繩名物，所以揀嚟啤酒苦瓜漬作第一道開胃前菜，苦瓜細細碟賣$45貫徹日本嘢嘅高檔呀，苦瓜咬落幾爽，唔喺好覺苦，不過啤酒味就唔多明顯。
![bowl]() 花生豆腐 $55
曾經食過一次，印象猶深，所以今次有機會，自然想跟佢再重逢。睇樣就被佢呃晒，以為佢好嫩滑，同一般豆腐無分別，一夾你就知好唔同。質感黏黏糯糯富彈性，有啲似糯米糍，花生香會隨隨滲出，唔太濃，帶點微甜，驚喜依然。
![bowl]() 石垣牛肉炸薯餅 $62
一客有兩大個牛肉炸薯餅，一開二兼擺得靚靚仔仔。唧點檸汁可解解油膩，外層炸得甘香鬆脆，內裡薯肉好軟滑，不過牛肉唔多，偶然咬落煙煙韌嘅就喺牛肉粒。
![bowl]() 沖繩魚餅拼盤 $70
睇落好似好多款式，除咗較大嗰件紫菜墨魚餅之外，其他一粒粒嘅魚餅都唔喺好食得出喺乜，而且口感較為死實，屬試過就算嘅菜式。
![bowl]() 串燒拼盤（8支） $145
串燒每2支計，定價由最平嘅冬菇$32到最貴嘅和牛串$72，唔想煩就好似我哋咁，叫一客串燒拼盤（8支），計有：長蔥雞串、雞肉棒、雞翼、青椒仔釀雞肉、沖繩黑豬肉、豬頸肉、冬菇、青椒仔其8款。賣相幾有睇頭，但味道不過不失，部份下鹽多咗，有少少過鹹。
![bowl]() 沖繩AGU豬肉餃子薄餅 $78
AGU豬又喺沖繩另一名物，綽號夢幻之豬，喺沖繩原有嘅貴重品牌豬，據說豬種晌600年前仍叫琉球王國時代跟中國有貿易而傳入。有大理石紋理、肉質甘香、甜美嫩滑喺佢嘅特徵。先唔好講啲豬肉，依個偽薄餅嘅餃子薄餅本身都幾有創意，一客6隻餃子煎好後再放晌鐵板，加芝士再焗，餃子皮食落確有啲似薄批嘅感覺，而內餡豬肉肉汁豐盈，肉餡鬆化，唔錯喎！
![bowl]() 沖繩風燻豬手拌酸汁 $68
跟德國鹹豬手好唔同，沖繩風燻豬手皮下脂肪頗多，凝固成骨膠原蛋白，食得人滿咀都喺，油香滋味，實際上就無乜肉，幸好外皮燒得香脆，佐酒嘅好朋友。拌啲酸汁，仲份外清新。
![bowl]() 墨魚汁炒飯 $78
呈全黑色嘅墨魚汁炒飯，唔好以為個飯好濕，啱啱相反，個飯炒得飯粒分明挺乾身，只喺啲墨魚汁令個飯閃爧有光澤，錯覺以為濕黏黏。啲飯食落有墨魚味，除咗墨汁之效外，因為飯內仲有啲墨魚一齊同炒，雖然唔多，但已添加份口感性。至於飯面嘅太陽蛋，外觀大於實際，因為晌黑漆漆嘅墨汁飯之上，特別搶眼，可惜蛋黃已接迎全凝固，仲期望影張流心蛋黃嘅相添！雖然喺咁，但個飯整體都好好食，值得推薦。
![bowl]() 芒果汁、沖繩四季桔果汁 $40
我哋試咗兩杯果汁，芒果汁杯底有啲沉澱嘅情況，應該就唔似新鮮榨嗰類，但芒果味極濃郁，少少偏甜；相反，個四季桔果汁口感嚟得天然，酸酸甜，開胃有得，消滯都得！
芒果汁（左）、沖繩四季桔果汁（右）
![bowl]() 沖繩雪糕拼黑糖年輪蛋糕 $68
甜品選擇唔多，只有沖繩風冬甩、3款沖繩雪糕及一款雪糕拼年輪蛋糕組合。淡粉紅嘅沖繩紅芋雪糕，富牛奶香而蕃薯味不俗，但不知何解，雪糕內有好多碎冰，好影響個雪糕嘅軟滑度；黑糖年輪蛋糕外觀好靚，「年輪」一層又一層，蛋糕唔算好鬆軟，但一層層嘅年輪紋帶有黑糖焦香，頗突出呀！
短期內試到兩次沖繩料理，有啲走運嘅感覺，兩次都品嚐到唔同嘅特色沖繩菜。仲見Asia Gateway共同觀光說明會搞咗個日韓食飯贏機票，8間日式或韓式食店，食飯有機會贏到飛往釜山或福岡雙人來回機票各一套，可惜個推廣期好短，11/3-31/3，中環樂宴喺其中一間（但銅鑼灣店唔喺），就算唔喺搏張機票，一嚐沖繩菜都喺唔錯。再次多謝餐廳招待！
個人評分
味道：7/10
環境：8/10
服務：8/10
抵食：6/10
平均每人消費：HK$400（試食邀請）
餐廳資料：
樂宴 Rakuen
中環蘭桂坊德己立街38-44號好利商業大廈4樓E舖
3102 2255
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
