抱歉,發生點錯誤。
重新載入
馬來一菜館 Café Malacca:細嚐惹味大馬菜
山區麵包王
2013-08-12
1266
0
分享
收藏
依晚半公半私嚟到馬來一食晚飯,其實身體有少少把恙,但自覺問題不太,況且一切已經約定晒,就無謂爽約,因為時下都市人個個都忙到不可開交,小弟份工算叫做hea,但都唔想再約嚟約去咁麻煩。之前已經嚟過兩次,所以收工由中環過嚟已經頗熟路,多條巴士路線駛到石塘咀街市落車再行前少少就到盛貿酒店。搭一程扶手電梯先上到酒店大堂,而再搭升降機上一樓就喺馬來一,不過小弟就鐘意晌大堂尾行樓梯上去,自覺太少做運動嘞,行吓樓梯幫補吓囉!
今晚都幾早嚟,所以初初睇落唔多客,但越坐越多客,似乎馬來一越做越旺,不過由於地方闊落,裝潢走簡單閒適路線,枱與枱之間保持一定距離,所以,感覺份外悠閒,一啲都唔局促。加上斯文客多,唔會覺得太嘈雜,實在友聚、見客皆可。
見到有幾款新菜同推介,當然要試吓啦,又加幾款之前食過嘅心水菜,咁就夠平穩嘞!
bowl沙嗲羊肉串燒(6串) $72
馬來一一向都有賣沙嗲串燒,新推出嘅喺沙嗲羊肉串燒,可惜是晚羊肉串燒沽清,只好退二求其次,點番上之嘅雞肉同牛肉串燒。3串雞、3串牛,伴以飯糕、青瓜、生洋蔥,很地道,當然「靈魂」馬來沙嗲唔少得,串燒焦香惹味,見大廚出嚟枱枱問意見,小弟梗多口問兩句,原來串燒喺用日本玻璃發熱管烤爐,特點喺溫度比普通烤爐高,出嚟嘅效果喺肉嫩有焦香,真喺想入廚房見識吓依部幾萬銀嘅烤爐。此外,沙嗲濃郁香甜,花生香特別重,一啖肉一啖青瓜洋蔥中和吓,不過啲飯糕我就麻麻。
bowl咖哩香葉炒茄子 $45
第一次嚟試菜就遇上依碟炒茄子,印象深刻,所以都「專燈」翻兜介紹俾朋友。今次再食,水準依然,茄子入口如豆腐,口感非常嫩滑,外層脆漿做得夠晒薄,而以香蒜、蔥粒、咖喱葉爆炒,甘香惹味,最有心思灑上大量炸蝦乾,添多幾分卜卜脆口感。
bowl鹹魚炒芽菜 $56
新菜式之一,爽脆嘅本地芽菜,入口真喺多汁清爽,而搵鹹魚炒理應做到鹹鮮咩更突出,不過,鹹魚可能重手咗,個人覺得過鹹少少。另外,大廚話可惜啲怡保芽菜未返,否則仲特別喎,希望有機會見識一下怡保芽菜喺點樣!
bowl椰漿飯拼盤 $82
椰漿飯又喺小弟另一心水推介,一份椰漿飯拼盤其實好豐富,配菜有炸雞、花生粒、炸江魚仔、青瓜及流心荷包蛋,仲伴有一小碟既香且辣自家製嘅參巴醬,而飯中滲出嘅椰香極之濃郁,食落啖啖椰香,兼且飯粒軟熟,撈埋花生粒同埋江魚仔,溝少少蛋漿,下啲參巴醬,有口感,有層次。用番上次對依個「碟頭飯」嘅總結,就喺飯香、料足、味好,點會唔再推介先得吖,不過,至緊要朋友都讚好食,仲話超讚喎,哈哈,總算無推介錯。
bowl檳城亞參喇沙 $82
食完個濃香嘅椰漿飯,嚟個酸香嘅喇沙就最好不過,檳城亞參喇沙都算喺依度幾多招牌嘅麵食之一。其實單睇碗喇沙個賣相都幾馬拉特色,碗面放有一堆新鮮菠蘿肉、青瓜絲、洋蔥絲、薄菏葉,不過最大亮點喺個湯頭,以細鮫魚拆肉嚟熬製個湯底,再加入亞參(一種熱帶果實:羅望子)及多種香料,鮮得嚟有種清爽嘅酸香,又帶點點辣,頗醒胃,配以滑嘟嘟嘅米線,真喺唔錯,最後就梗喺一滴湯都唔放過啦!
bowl馬來巴東牛肉 $88
甚少食印尼菜,所以對嚟自印尼嘅巴東牛肉比較陌生,不過晌馬來西亞同新加坡都好盛行依道菜。眼前「烏瘁瘁」嘅牛肉,肉質好腍好鬆化,望真啲原來喺牛展肉,以多種香料混合燜煮,所以感受到好複雜多變嘅香料味,令個辣味唔單一,又滲有濃郁椰奶香,牛展肉十分入味,所以食得人好滋味。依家馬來一有提供印度薄餅,由於啲醬汁比較杰身,所以用薄餅嚟蘸醬汁較用嚟撈飯效果好啲。
接近尾聲,又喺輪到甜品時間,榴槤布丁不知不覺成為必然正選,此外多咗兩款新嘢「清湯」、「刨冰」,因為前者可以喺熱食,所以揀咗佢,而喉嚨仲有啲咳,刨冰就留番有機會先再試;再加埋一直都未有晌度試過嘅咖央多士,就成為最後嘅甜品三劍俠。
 「刨冰」
 「清湯」
bowl清湯 $32
名字好普通,但材料好豐富嘅大馬糖水,亦喺新推出嘅產品。糖水底以桂圓肉煮,質地有啲似食西米露有少少杰身,而糖水內有蓮子、銀杏、洋薏米、蕃薯、大菜、珍珠西米、糖冬瓜、柿餅、胖大海,可以寫到咁細緻咪當喺鱔稿,只喺人哋個介紹牌有寫晒。凍食、熱食都得,口感挺潤,唔太甜,幾適合秋冬天食,雖然材料上幾有特色,不過咁嘅組合個人覺唔算太啱自己口味啫。題外話,胖大海喺乜?我都第一次聽,晌維基摷摷,原來喺種生長於越南、印度、馬來西亞等地嘅植物,曬乾用,好處有清熱潤肺,利咽解毒,潤腸通便,有利於肺熱聲啞,乾咳無痰,咽喉乾痛,頭痛目赤,都幾犀利咁喎,所以個「清湯」唔睇得都打得。
bowl榴槤布丁 $38
以前因為依個甜品唔喺馬來西亞嘢,所以一路無放入餐牌,依家,卒之晌餐牌出現喇。以貓山王榴槤果肉打造,所以榴槤味極之濃郁喺必然,啖啖榴槤飄香,加入忌廉同魚膠份量恰到好處,所以布丁質感挺身而軟滑,值得食完再食。 
bowl咖央多士 $22
之前兩次嚟都未有機會試,今勻點都要叫番一客。麵包烘得香脆,內裡所夾嘅咖央好香椰子味,細心嗒落又慢慢滲出幽幽嘅班蘭香,而且落咖央亦都好闊佬,極體又真喺幾好食。
飽餐一頓,喺咪再計劃吓再去一轉大馬呢?實在有點懷念當地露天「大排檔」嘅美食!

個人評分
味道:9/10
環境:8/10
服務:8/10
抵食:8/10
平均每人消費:HK$142

餐廳資料:
馬來一菜館 Café Malacca
西環皇后大道西508號香港盛貿飯店2樓
2213 6613


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $142.00
商店 馬來一菜館 Café Malacca