0

D21@深圳福田

軍曹基地 於 2009-05-23 00:00:00 發表  |  累積瀏覽 327

分類:
話說隊長又話想去品村, 二等兵梗係即時制止啦 !!! 大佬 … 食左 3 次喇 !! 於是隊長就開始留意人地既食評, 近期佢留意到 D21 西餐廳。

查實 D21 即係品村隔離果間餐廳, 品村主攻日式魚生類食品, 而 D21 主攻西餐肉類, cocktail 同埋甜品。二等兵睇到網上師兄師姐 post 出來的相都睇到流晒口水, 於是今日掹住隊長衫尾北上侵略 D21 !!! Go Go Go !!!




好鍾意呢個廚房咁開揚 ~~




D21 人少過品村, 可能大家都意食魚生類既食物多 d ~ 但坐到 7:30pm 都坐滿晒了 !!! 




晚市 RMB 138 / 位, 8:30 pm 後入座就 RMB 118 / 位, 限時 2.5 hrs !!!




呢度既服務員十分殷勤 !! (題外話 : 全晚幫我哋落單既妹妹仔叫 “鍾嘉欣”)

我地首先點了飲品, 隊長既至愛 ~ Asahi 朝日啤酒, 二等兵見到在品村沒有的 cocktail, 梗係試下啦 !!! 原來沒有指明要什麼 cocktail 的話, 就由 bar tender 話事, 但亦可以指明要哪種 cocktail ~

阿媽教落同男仔約會唔可以飲酒, 於是二等兵又扮乖叫左杯橙汁先~~  點知二等兵最後放棄左杯橙汁, 杯橙汁俾隊長 KO 左 ~~

題外話 : 除左 cocktail 任飲之外, 呢度 d 紅酒 / 白都係任飲架 !!! 不過我地都唔好紅酒, 所以冇叫到 !!




呢杯 cocktail “夢幻星空”, 開頭未攪勻就覺得苦苦地, 但係攪勻之後覺得好好飲 !!!




酥皮魚翅濃湯, good ~




法國鵝肝醬多士 ~ good  !!




芝士焗石斑配菠菜, 石斑冇味, 麻麻地 ….




香蒜扒大蝦, 隊長覺得呢個好味, 好味過品村, 二等兵覺得品村果個好味 d ~




香蒜鮮鮑仔 (限量位上) ~ 呢個只可以叫一次架咋, 但真係好好好好好味 !!!




香橙水柳醃三文魚, 橙好甜, 醋味同蔬菜配搭得唔錯 !!




香草牛油焗元貝, 正 !!! 下面仲有薯蓉 tim, 啱晒二等兵 !!!




青螺, 一般, 因為太硬 ~ 但大家留意下果粒車厘茄, 隊長食左好多粒, 佢話好好味 !!




香煎法式煎鵝肝 (限量位上) ~ 呢個又係每人限叫一次, 真係好好好好味 !!! 簡直有滿足既感覺 ~~




隊長又黎多杯啦 !!!




元貝磨菇沙律 + 溫帶子配橙肉 ~ 個磨菇好味, 帶子同橙肉都 ok~




法式洋蔥湯 ~ 隊長激讚 !!!




登登登登 ……. 食肉獸出場喇 !!! 以下肉類全部由隊長 KO !!!

品村小牛排 (限量位上), 一人一份 ~




果木烟薰牛小排 (限量位上) ~




食左兩碟牛, 兩碟牛都勁得 !!! 牛肉好稔, 但又唔係用鬆肉粉醃到無晒味, 依然好有牛味 !!! 正 ~

鹿兒島豬扒 (限量位上) ~ 雖然估計唔會俾鹿兒島既豬, 但係味道都不錯丫 ~




無味的香燒銀雪魚 ~ 重申 : “呢度食 d 魚係冇味的 !!!”




辣酒煮花螺 (限量位上) ~ 二等兵辣到入唔到口, 全部等隊長黎 !!! 佢話食得好過癮 !!! 仲好有快感 tim!!!




芝士焗青口, 正 !!!




香草芝士烤法國蝸牛 ~~~ 估唔到仲有蝸牛食, 不過二等兵其實唔識分, 但總之係好食 !!!




夏威夷木瓜鮮蝦咯嗲 (編按 : 咯嗲即係 cocktail !! 哇哈哈…) 隊長話麻麻, 因為佢唔食木瓜, 但二等兵覺得好好味 ~




甜品怪終於出場喇 !!!

木瓜燉雪烚 (棷汁), 真係正, 食到呢個時候覺得真係好抵, 呢個價錢有咁多好野食 !!

(注 : 除棷汁外, 可配杏汁)




由於隊長唔食木瓜, 所以呢半邊木瓜由二等兵獨享 !!! 正呀 !!!




草莓芭菲, 意大利芝士蛋糕, 芒果 mousse, d cake 既海棉蛋糕好 “嚡”, no good, 但係 mousse 部份就好味, 而芝士蛋糕真係唔錯 !! 同埋有冇留意到 d cake 其實係細細件, 咁先好, 可以試下邊樣好食先 order, 唔會嘥野 !!!




炸朱古力, no good no good !! d 皮好厚,冇味, 但入面 D 朱古力好味 ~




呢個係限量位上既 Haagen-Dazs 雪糕, 都算係咁啦, 佢地唔係供應其他牌子 !! 雪糕有 4 個味 : 夏威夷果仁, 士多啤梨, 雲呢拿 & 朱古力, 我地揀左頭兩個味 ~




焦糖燉蛋, 一般, 層糖太厚 ~




隊長無啦啦同二等兵講 : “小姐, 我請你飲杯 cappuccino 好嗎 ??”

二等兵俾隊長嚇親 @@, 即刻回應 : ” Sorry …. 我唔飲咖啡架喎 !!!”




哈哈, 二等兵唔記得阿媽既教晦, 仲點左兩杯 cocktail tim, 千祈唔好話俾阿媽知…@@

其實我地先叫綠色果杯 (百香果味), 但由於太濃酒味, 於是二等兵親自走到 bar tender 面前同佢講 : “我想要一杯果味重 d 又唔好太大杯既 cocktail 丫唔該 !!” 阿哥哥仔勁好人, 佢就為二等兵炮製左下面右手邊呢杯 “蜜桃之吻” 喇 ~~




隊長話想食多件 cake, 於是 encore 左意大利 cheese cake + cappuccino~

揀直係天衣無縫既配搭!!!




葡式蛋撻…..??? 點解個面唔燶既???




反而個底有少燶……….. 蛋漿一流, 但皮太硬, not good……




二等兵至愛~ 心太軟~~




心太軟 ?! 係咪應該叫朱古力蛋糕 or 心太硬呢 ?? 實心 ……….




都有少少朱古力漿既…………@@ 不過件 cake 好 “嚡” ……….




最後, 我地叫多一杯 cappuccino, 隊長話好滿足 !!!




我地既戰績………..應該話係隊長既戰績, hehe ~




Total : RMB 138 x 2 = RMB 276

本來上次在品村攞了張每人減 RMB 8 既 coupon, 但係二等兵整 dirty 左後掉左, 諗住黎到可以再攞, 點知今次已經冇得派 lu………..@@

品村同 D21 比較, 其實各有各好, 睇下你地鍾意食乜啦 !! 如果意食魚生類就不妨到品村, 相反, D21 的食物係飽肚 d, 啱晒 d 食肉獸同大食一族 !! 而飲品同甜品方面, D21 亦多 d 選擇, 有 cocktail 同紅酒 / 白酒任飲, 淨係呢樣都抵返啦 !! 仲有各種甜品 tim, 加上今晚全晚未漏過單, 同埋服務員態度十分殷勤, 今餐真係好滿足 ~~


============================================

感謝 軍曹基地 提供以上資料

軍曹基地的網誌: http://keroxtama.blogspot.hk/


============================================

鐘意SeeWide的分享,給我們一個Like吧!
  • 攻略日期:N/A
    攻略地點:N/A
  • 攻略時間:N/A
    是次消費:N/A
0人比"掂"

最多能輸入300字

累積瀏覽 302760

全部攻略 901

全部回應 0