溫馨提示各位網友, 如果打算選用網上痕既網友, 簽約前一定要睇清楚 !!
事源隊長同二等兵打算在蝸居裝寬頻線, 由於隊長係忠實球迷, 於是佢响無得選擇既情況下選擇咗網上痕 + NOWTV 足球頻道。
隊長平時唔方便打電話, 就差遺二等兵詢問關於網上痕既計劃詳情。
二等兵睇完陳豪個廣告, 就打去熱線問下寬頻線詳情, 佢哋 hotline d sales 就 pass 咗我俾一個叫 Ray Lo 既 Sales (Staff code : 8037 4671)。
先唔講寬頻線既問題住, 而家重點想講下佢個 NOWTV 足球台。
佢回覆二等兵如果想加足球頻道要 +$18, 因為隊長之前叮囑要問清楚 +$18 包邊幾個台, 於是二等兵就照辦煮碗問一次 Ray Lo, 佢查完一輪之後話 +$18 包 [631-639, 670-673, 676-677] 呢幾條頻道, 再額外送 [331-333] 台俾我哋, 至於寬頻月費豁免嗰 6 個月, 足球台 $18 都一樣會豁免。
隊長一向都有安裝 NOWTV 足球頻道, 佢聽到二等兵話 +$18 有咁多條足球頻道都覺得有無咁荀 ?? 於是不厭其煩叫二等兵再問清楚。
其間 Ray Lo 又攪錯咗寬頻線, 過咗一兩日又同二等兵講我哋既地址要安裝貴啲既 300M, 佢話為咗補償損失, 就送$ 300 coupon 俾我哋補數。但足球台都一樣係 +$18 有齊咁多個台。
如是者在 bargain 200M 同 300M 既過程, 二等兵又同佢 make sure +$18 足球頻道係包 [631-639, 670-673,676-677], 額外加送 [331-333], 佢都再三 confirm 係包呢十幾個台, 佢自己都有重覆讀一次呢十幾個台既編號, 但係隊長都覺得邊有咁荀, 於是就叫個 sales 打俾佢, 親自問佢一次, 因為佢怕二等兵攪錯。
之後嗰位 sales 打去隊長公司 (電話有錄音), 隊長今次自己問得好清楚, 嗰位 sales 亦都自己讀咗一次呢張 contract +$18 包括邊幾個台, 就係佢同二等兵講既 [631-639, 670-673, 676-677, 331-333], 隊長見佢既然講到咁肯定, 又有錄音, 就 join 佢, 並計劃星期六嚟裝線 (300M 寬頻 + TV), 但嗰個 sales 話趕唔切今個星期六 (11/6) 裝, 於是改為下星期裝。
11/6 中午時份, 二等兵收到師傅打來話今日嚟裝 200M 寬頻, 但係我哋係 upgarde 咗去 300M, 於是在神推鬼擁的情況下, 二等兵就打去 hotline 問問究竟而家個 contract 係點。
唔問由自可, 一問真係把幾火, 個 hotline 職員話我哋張 contract 只係 200M, TV +$18 只係包 630 及 631, 其他什麼 [632-639, 670-673, 676-677, 331-333] 全部都無, 仲要無寫有任何 coupon 送, 真係頂佢個肺吖, 二等兵就打去剷嗰個 sales 啦, 佢開頭仲死撐, 話係送嗰十幾個台, 無呃你 !! 二等兵就剷佢話已經打咗去 hotline 問咗張 contract, 完全無寫嗰十幾條頻道, 佢開始知衰, 就話 “唔好意思, 我對足球台呢方面唔係太熟悉, 可能誤會咗包呢十幾個台” 吓 .. 唔熟悉 ?! sell 呢個產品會唔熟悉 ?? 唔熟悉唔搵第二個 sell ??
二等兵實在唔想再同佢講落佢, 一句叫你上司嚟聽, 佢開始耍二等兵, 話 “其實你可以 cancel 張 contract” 的 ~ 真係低能的, contract 我固之然要 cancel, 但就一定 要投訴佢無良既鎖售手法囉 !! 況且我哋有錄音, 全部都可以證明到佢銷售手法有好大問題, 佢一句叫我 cancel 就想耍我哋 !!
而家呢件事正在處理中, 實在太慶喇, 要响度發洩下, 近兩年既電盈同早年既有線開始無乜分別喇, 如果唔係隊長要睇波, 二等兵一定以後都 black list 佢囉 !!
============================================
感謝 軍曹基地 提供以上資料
軍曹基地的網誌: http://keroxtama.blogspot.hk/
============================================
