0

超推介之日式放題 - 松家 @ 中環

軍曹基地 於 2011-06-18 00:00:00 發表  |  累積瀏覽 523

分類:
見好耐都未食過放題, 我哋心思思又走嚟食 ~

隊長之前做定晒功課, 知道中環新開既松家口碑唔錯, 於是就帶隊嚟搵食喇 ~

首先睇下收費先, 好似好複雜咁 ?? 簡單啲講其實即係 20:00 pm 前埋單, 或 21:00 pm 後入座, 收費 $198 (一至四) / $208 (五至日), 其他時段 $238 (一至四) / $248 (五至日) ~

原來仲有午市放題 (六, 日及红日) tim ga, 都幾少見喎 !!




食物都幾多選擇, 仲有想讚下全部無漏單呀, 讚 !!




環境唔錯, 一啲都唔迫, 又唔會枱貼枱, 真係坐得幾舒服 !!




呢 4 款食物可以免費揀一款, 如額外再叫, 加 $20 一款 ~

4 款食物分別有 : 鐵板鵝肝 1 件, 鐵板 11 吋老虎蝦 1 隻, 赤貝刺身 2 隻, 牡丹蝦刺身 2 隻 ~

$208 包一款以上食物, 都幾抵喎 !!




一坐低, 店員就話落咗個刺身拼盤先, 仲問我哋飲乜, 飲品有好多選擇呀 !!
除咗一般汽水之外, 仲有鮮榨果汁 (橙汁及西瓜汁), 同埋從來都無响放題見過既 “熱薑母茶”, 犀利 !!



隊長叫咗佢至愛既巨峰提子梳打, 你哋數下佢今晚飲咗幾多杯 ?? 而二等兵就叫咗西瓜汁 ~


點完食物後, 刺身拼盤都到喇, 好吸引呀 !!


餐牌上除咗希靈魚外, 其他都有齊 !!


你睇啲三文魚幾厚 !! 其他超好味既包括 : 甜蝦, 鮑片, 馬刀貝同貝柱, 但係立魚就有少少魚骨, 食嗰陣要留意 ~


睇下我哋食咗啲乜 ~
薄燒牛肉 - 掂 !!


燒羊架 - 掂 !!


呢個係每人一客 4 選 1既鉄板鵝肝 ~
係超超超滿足 … !!


另一款每人一客 4 選 1 既 11 吋鉄板老虎蝦 ~
啲蝦好新鮮, 但食鵝肝就滿足啲, 呵呵 ~


燒煙肉車厘茄 - 煙肉同車厘茄勁夾, 車厘茄中和咗煙肉既鹹味, 好正 ~
燒雞翼 - 好味 ~


海膽手卷 - 海膽一般, 但紫菜勁脆 !!


蟹籽沙律 - 無特別 !!


燒牛舌 - 切得厚咗啲, 薄既地方好好味, 但厚切嗰度就靭咗啲 ~


燒蝦 - 一般, 因為啲蝦殼好難剝呀 ~


蝦天婦羅 - 啲蝦勁粗身, 又新鲜, 啲炸粉又唔會過厚, 掂 !!


第二輪刺身拼盤, 我哋都係叫晒餐牌上既刺身 ~


好少叫第二 round 個刺身拼盤都咁有睇頭, 讚 !! 啲刺身都係好新鮮 !!


凍柑桔檸檬 - 少少酸, 但幾濃味 ~


encore 既蝦天婦羅, 仍然係好好味 !!


燒石斑 & encore 既薄燒牛肉 ~ 
估唔到食到第 2 round 人多咗, 啲食物都仲 keep 到是熱的, 同第一 round 啲質素一樣 !!



冷蕎麥麵 - 好少見放題有呀, 但再凍少少會好味啲 ~


燒羊架 - 俾隊長 KO 晒 !!


燒雞翼 - 都係俾隊長 KO 晒, kaka ~


炸豆腐 - 件豆腐無咗一角既 ??


軟骨餃子 - 好味 !!


嚟多兩串煙肉車厘茄先 ~


隊長又嚟多杯巨峰提子梳打喇 ~


隊長至愛既炒飯呀 !!
話說炒飯有兩款, 分別係海膽炒飯 & 三文魚蟹籽炒飯, 但呢個炒飯嚟到時我哋第一個反應係咪嚟錯咗呢 ?? 個樣咁似三文魚蟹籽炒飯既, 於是就問問店員啦, 佢都話呢個係三文魚籽炒飯 ~ 咁我哋就繼續食啦, 並叫店員再落一客海膽炒飯 ~


炒飯濕濕哋, 攤凍少少會好食啲, 不過味道唔錯啊 ~


KO 無難度 !!


見咁少有薑母茶飲, 二等兵又貪得意叫吓先, 但原來好辣架, 辣到飲唔到, 結果飲咗幾啖要放棄, 大半杯俾隊長包底 !!


其實頭先嗰碗炒飯食到最底先見到海膽, 我哋先知佢無落錯單吖, 原來真係海膽炒飯, 結果頭先再落單既海膽炒飯又嚟喇, 好彩隊長話好食, 仲食得落 !!


KO-ed 既時候店員啲反應實在太快喇, 張相影住佢拎走個碗, 哈哈 ~
第三次叫既煙肉車厘茄, 真係好味架啫 ~


又係第三轉既刺身, 不過今次重點出擊, 只係叫咗三文魚, 甜蝦 & 鮑片, 仍然係好好味, 好新鮮 !!


又嚟巨峰提子梳打 ?! 隊長你唔厭架咩 !!
(P.S. 隊長今晚一共飲咗 5 杯巨峰提子梳打)


食到接近尾聲時, 店員開始提醒就快要交枱, 於是我哋開始食雪糕 ~
雪糕有 4 款 - 紅豆, 芝麻, 菠蘿 & 綠茶, very very good ~


菠蘿味雪糕真係好耐未食過喇, 好 fresh, 仲要有菠蘿肉吖 !!


鮮榨橙汁 - 真係鮮榨 ga ~


食到捧住個肚走, 服務又好, 食物又好味, 呢餐真係好滿足 !!
Total : $458 (已加一)
隊長, 一定要再侵略呀 !!


============================================

感謝 軍曹基地 提供以上資料

軍曹基地的網誌: http://keroxtama.blogspot.hk/


============================================

鐘意SeeWide的分享,給我們一個Like吧!
  • 攻略日期:N/A
    攻略地點:N/A
  • 攻略時間:N/A
    是次消費:N/A
0人比"掂"

最多能輸入300字

累積瀏覽 355200

全部攻略 901

全部回應 0