又嚟拍拖喪玩迪迪尼

26 JUNE 2014(THU)

由於今日小小豬學校突如其來嘅假期，難得平日放假，當然唔好放過咁好機會，兩母子拍拖入迪迪尼玩啦~

之前次次同小小豬講入迪迪尼，佢嘅表現都係開心，不過今次就好唔同，一同佢講入去玩時，佢已經不停咁講話去邊度玩，要玩啲咩，仲計劃好晒要帶我去玩八樣遊戲。

既然小小豬咁投入，所以今日就由小小豬做小領隊，帶我入去玩呀！當佢入去園嘅時候，話要去玩"LEVEL幾...LEVEL幾"，我都聽到一頭冒水，最後小小豬就帶我去，原來佢想玩嘅係巴斯光年射槍槍~

之後例必去攪攪陣，個傻豬仔真係好鐘意部相機，次次要玩一輪，不過....等下次迪迪尼大減價先買俾佢啦~

之後就去渣車車，自從上次玩過一次之後，個傻豬仔都不知幾鐘意，所以今次當然又要玩一轉啦！不過，其實我都真係幾怕玩馳車天地，因為次次都係要排晒長龍，但小小豬鐘意玩，見佢又肯乖乖排隊，所以就陪佢排吓啦！

好在今日都唔算太多人，我地排左大半個鐘就可以玩啦~

下一個目的地，當然係其中一個小小豬至愛嘅飛碟啦！今日天氣真係好悶熱，小小豬玩到依個時候都已經成身濕晒，又要變身啦~

玩完依個，小小豬竟然話要去玩轉轉杯，唔好話小小豬之前都未玩過，就連我都好驚玩，因為真係會玩到頭都暈嘛！

相信都係因為依排大肥豬同小小豬講故事嘅時候，講過一班小朋友去玩轉轉杯，所以小小豬先要玩。

不過，點到估唔到第一次玩嘅小小豬一啲都唔驚，仲笑晒口周圍望。反而我就真係暈暈地，下次都係等大肥豬係度時，等佢地兩父子玩啦~

路過見到MICKEY，小小豬都話要去同MICKEY玩。不過因為換左新整嘅MICKEY & MINNIE實在太多人排，今日預計都要排60分鐘，所以最後就去同左DAISY同高飛影啦~

到左巡遊時候，坐定定食飽飽先~

不過今日我地個位置唔多好，當小朋友出去嘅時候，個職員唔俾我跟埋去，所以完全唔知發生咩事，小小豬最後冇得玩，佢返嚟嘅時候都不知幾唔開心，仲"偏偏"咀咁，下次一定要早啲去搵返個靚位先得~

又到為食豬時間，我幾時都話有得食個豬仔就係最開心~

食飽飽之後有晒能量，行去玩到開心過人呀~

之後就到左小小豬夏天必到嘅地方，不停走嚟走去，玩水玩得好興奮呀~

玩到內內外外都濕晒呀~

最後玩左大半個鐘，就換衫離開依個咁好玩嘅水池啦~

原本都打算走人，不過小小豬又點肯呀，最後玩埋小小世界~

仲要話玩埋騎木馬先肯走呀~

今日成個行程都係由小小豬帶路，唯一我話事嘅地方就係入SHOP掃平衫，三小一大都只係$214，咁抵唔迫入去買都唔得啦！不過咁辛苦迫去買都係冇我份，依三件戰利品係買俾我家中兩位俊男呀~

坦白講，單拖帶住小小豬玩左大半日，其實都真係幾攰，尤其係回程時撞啱放工時間，搭地鐵係會人又迫又冇位座，所以都真係幾辛苦。

不過見小小豬全程都玩得咁開心，又冇扭過抱，全部都係自己行，所以都要俾個叻叻佢先得呀！

MY FACEBOOK~


MY WEIBO~

MY E-MAIL~

 

其他博客區
※※ SINA ※※

※※ MyBB星級Blogger ※※
※※ BlogSpot ※※

※※ WeShare ※※

※※ She.com ※※

※※ theZtyle ※※

※※ SeeWide ※※

 

※※ BK Milk 親子語 ※※

※※ Cook 1 Cook 星級廚師 ※※