由 honeyhinbaby 於 2013-08-01 00:00:00 發表 | 累積瀏覽 384
七點起身,八點去食早餐。早餐選擇唔多,但都夠我哋食,因為有yoghurt!我同拾爺每人食咗三小杯呢。
酒店餐廳環境
九點出發,出發前問咗酒店拎地圖同行去old port嘅路線。
九點五到達old port,見到有唔少人喺到賣魚,當然亦有唔少買緊,不過,最多嘅係好似我呢啲嘅運吉旅客,喺到影相。
有人將唔要嘅部份切出,再拋出俾啲海鷗食。之前嗰次有幾隻一齊搶,到我哋要舉機影時,就冇海鷗吼……
除咗買魚同賣魚,仲有人喺到釣魚。
我哋影咗陣相,因為身處治安唔太好嘅Marseille,拾爺唔敢拎部700D出嚟,所以我哋只係用部S90嚟影。眼見所有遊客都係用細機,唔似我哋之前所到之地,個個都孭部單反喺身,我想大家都有戒心。
先去搵村長仔口中到Cassis嘅船counter,行錯方向,反而去咗到Island of If嘅 counter先,好彩個staff教我哋行去另一邊。去到counter,staff話架船會開去Cassis,再開番嚟old port,但中途冇得落船,即係我哋唔可以踏足Cassis……呢個完全唔係我想要嘅嘢,我想喺Cassis走走,同拾爺喺個beach到游水。既然冇得 落船,我決定跟番原本個plan,搭火車去Cassis。但而家嚟到old port,冇理由又上番去火車站嗰邊,去完Cassis先再嚟old port搭船去Island of If架嘛,所以,我決定先去Island of If,之後先去Cassis。
又行番去去Island of If嘅counter買船飛,因為miss咗之前九點半班船,要等到十點五先再有船。我哋只去Island of If,唔去另一個,來回船飛每人€10.1。等船期間,又四圍行吓,影吓相,兼去一去拾爺見到city map印有供應bouillabaisse嘅餐廳睇吓。
Marseille嘅old port
本來想上船前,去一去洗手間,但入過幾間酒店,都唔見有洗手間喺lobby……唯有放棄。架船好多乘客,我哋坐唔到上層嘅位,只好坐船尾,曬曬太陽,望望風景。
船隻駛離old port……
不消一會,船隻已經到達Island of If。 去Island of If其實主要係要到Château d’If,Château d’If本來係fortress,後來變成監獄,佢之所以聞名,係因為法國作家Alexandre Dumas以呢個監牢為小說The Count of Monte Cristo嘅背景。雖然Château d’If係一個監牢,但四周環境真係幾唔錯!船隻泊岸後,上島一看,只見四周被藍藍綠綠嘅海水包圍住,感覺好舒服。
海水顏色其實好靚,但我攝影技巧拙劣,影唔出佢嘅美。
人人都趕住入Château d’If參觀,我同拾爺卻掛住影低呢個美景,結果,當然係最後先買飛入場啦。
入場費每人€5.5。
買完飛,我哋都唔係即時入Château d’If,反而行出去影吓個海景,呢到真係好靚!
如果唔係船隻班次疏,同埋我哋要去Cassis,真係好想喺到坐耐啲。
拾爺好想喺到食嘢,但我哋唔夠時間……
Château d’If
我哋先參觀室內嘅地方,地下展示咗有關Alexandre Dumas嘅資料。跟住我哋上一層,睇吓各個牢房。
監房窗口望出去都係海景。
十二點番去碼頭,等番old port嘅船。等咗一陣,有船呀!不過……唔係番old port架……呢架船埋岸後,又有一大堆人上上落落,但縛住架船條繩有啲問題,成班職員搞咗好耐先搞掂。
架船唔走,我哋上唔到番old port嘅船架!><
十二點五,番old port嘅船終於都到!(遲咗三個字,曬鬼死我哋!)以為啲人又會爭上層位,點知唔係,可能個個都曬到傻咗喇,prefer坐樓下室內位。
十二點九,船隻泊岸,我哋先行去tourist office,問吓人有關Cassis嘅嘢,因為之前上網,有人話由火車站去beach路程頗遠,但巴士又唔定時,仲未必有添,所以我好想知情況係咪咁差。可惜,tourist office嗰邊唔係太幫到我哋……
番酒店抖抖,執好嘢後就去火車站買火車飛,然後又行番去tourist office附近間supermarket買水飲。
搭 兩點二十七分嘅火車去Cassis,車程半個鐘到,一去到,拾爺先搵路牌,因為我預咗要行去beach,一早print好地圖。我就去counter問關 門時間,睇吓要唔要先買回程火車飛。由火車站行出去,我見到有架巴士,於是就捉住拾爺搭巴士去!拾爺本來想行去beach(佢好鍾意行路架!),但我覺得 有得搭車就搭車,一嚟我哋唔熟路,二嚟我想慳時間去玩,因為我係打算去睇calanques,我上網check過船公司開到四點幾到,所以早啲去到穩陣 啲。
上巴士,巴士司機初初話兩個人€1.2,但佢找少錢俾我後,又改口話係€1.6……都唔知係唔係架!呢程車十五分鐘到,但左兜右兜,自己行,有難度!落車後,拾爺即刻影低回程班次,拾爺就係咁細心!如果只有我一個,我係會走咗去玩,玩完先算,哈哈!
巴士停喺casino,我哋要自己行落centre。Cassi個port雖然細過Marseille個old port,但旁邊有好多colorful嘅屋,感覺好正!我鍾意呢到!就連拾爺都話「一定要再嚟!」。
呢到真係好靚!
我哋見到calanques團嘅counter,即時排隊,本來我倆屬意參加睇5個calanques嘅團,但full咗……唯有睇3個calanques啦……(8個太多同太貴……)每人€15。買完飛,我哋問個staff幾點開始,佢話即刻(當時為三點半),於是我哋即刻跑去上船處。
個calanques tour大約45分鐘,但負責講解嘅人英文唔得,所以全程講法文……只有一、兩個位係講吓英文……算啦,欣賞到美景,已經好開心!
有人從高處躍下。
睇完calanques更加鍾意呢到!上岸後,又影咗啲相。
然後,見到有間雪糕舖好多人幫襯,我倆熱到死,於是又買兩球(€4.4)share嚟食。我見到有Cassis味,於是就揀咗呢隻味,另一隻就揀lavender。呢到嘅lavender味係紫色架!不過,佢個texture似雪芭多啲……雪糕,我都係鍾意綿綿嘅texture多啲。
食完雪糕,就行去beach到游水。
呢 到冇更衣室……只有一個供人沖身嘅花灑……喺到游水嘅人,唔係本身住喺附近,就係喺呢到住酒店……因為搵唔到更衣室,我都冇mood玩水(我唔識游 水……),而且,我又好想去洗手間……我哋見beach附近有兩間bar,睇吓menu,叫杯嘢飲價錢都ok,於是我哋就揀咗其中一間坐低,用佢個洗手 間。拾爺換好泳褲就出去游水,我就留喺間bar到負責睇嘢。間bar可以望到出面個灘,我叫咗杯hot chocolate (€3),就坐喺到幫拾爺影吓佢啲游水相。叫嘢飲時,waiter問我係咪只叫一杯,指一指拾爺個位,問佢要咩。我就厚住臉皮話拾爺去咗游水,唔會留喺到。
一杯3歐嘅嘢飲,令我有洗手間用,拾爺有地方換泳褲,我又可以免卻曝曬,ok啦!
喺到已經見到有女人無上裝曬太陽,但正如網友所講,都係上咗年紀嘅女人……
離開前,我都有係咁倚落一落水,話哂都係地中海嘅水嘛!啲水好凍!唔怪得拾爺要熱身好一段時間先游到,佢話凍到佢癲呀!哈哈。
由 beach行番去巴士站,其實預早咗好多。我哋六點行去巴士站,只用咗最多十五分鐘到,但架車要六點五十五分先到……我想再行吓Cassis呢個地方,但 拾爺突然覺得唔舒服,仲拎埋膠袋出嚟想嘔添!見到拾爺咁,我好擔心,心知自己冇能力take care佢架嘛。好彩,過咗一陣,拾爺好番好多喇。
巴 士七點三到火車站,我哋買咗七點二十五分嘅火車番Marseille。番到Marseille,先番酒店,換番啲得體啲嘅衫(我哋怕短褲唔入得餐 廳……),就趕去Restaurant Miramar食飯。因為我哋冇訂位,去到時出面嘅位唔係被坐滿,就係被reserved,我哋焗住要坐入面……
餐廳原先安排嘅座位好焗,我哋越坐越熱,於是要求調位。有個嚟自Vietnam嘅waitress好nice,幫我哋安排換位,又細心介紹食身俾我哋。我哋最後order咗半打Normande oyster (€18) 同bouillabaisse (€59)。
想唔到我哋只係要咗咁少嘢,餐廳都會供應兩份餐前小食俾我哋,而且一睇份小食賣相就知唔係hea嘢。
餐前小食﹕麵包上面放滿truffle,好好味!
Starter﹕問waitress個starter係乜,佢話係tomato同monk fish所整成嘅,味道又係超正!
呢個係Normande oyster嘅跟餐麵包,見到呢碟嘢,我同拾爺就知今晚一定好夠食。
呢份嘢就矜貴喇,落咗番紅花架!Waitress叫我哋一陣加落啲bouillabaisse到。
Normande oyster﹕因為拾爺唔食生嘢,所以我首次(平時佢唔俾架!)一人食半打!味道ok,頭三隻味道淡咗啲,但之後三隻好有蠔味。
Bouillabaisse﹕個bouillabaisse 當然唔止呢一碟啦(其實餐廳舀咗兩碟俾我哋,雖然呢份嘢話就話係for一個人,但份量絕對唔止一人!),餐廳只係先俾湯我哋飲。我哋先係就咁飲,之後先加 waitress叫我哋加嘅醬。個湯味道唔錯,飲時除咗有魚味,仲有魚肉!加醬後,就有少辣感覺,因為個醬有生蒜,辣辣哋,幾惹味。
喺我哋飲湯時,waitress會先放好我哋份bouillabaisse嘅材料,到飲完湯,佢哋就會幫我哋分好上枱。
Bouillabaisse﹕飲完湯,足料bouillabaisse就會呈上。實在難以相信佢係一人份量,我同拾爺好努力都食唔哂……我一向唔太好海鮮,尤其係魚,所以對於呢個
bouillabaisse,我比較欣賞個湯,遠勝於湯渣。
食飯期間小插曲一則,有個應該係美國人嘅男人投訴餐廳上菜慢,話已經等咗半個鐘,雖然餐廳方面話會跟進,但佢太嬲,最後走咗……不過,佢走咗一陣,餐廳就送上佢同佢家人order嘅嘢,佢家人留喺到繼續食。
埋單€77,拾爺話一啲都唔貴,首先係個蠔,喺香港呢個價可能只食到兩、三隻,但我食咗半打!其次就係個bouillabaisse,拾爺話喺香港飲一定過千。之前拾爺話過去Marseille一定要試bouillabaisse,而家試咗喇,滿足lu。
指定動作﹕餐廳評級為Good!
今日真係好開心,完全冇黑仔嘢,所到之處又咁靚,又食到好嘢,幸福指數爆燈!
P.S. 唔知大家有冇留意到今日啲相係冇雲架呢,嚟到呢到,我終於見識到乜嘢叫做萬里無雲。所以,經過一整日曝曬,又唔記得帶帽嚟嘅我,頭上條分界線都曬紅咗……
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================