0

帶MR.雞去動漫 ~ 2012第十四屆香港動漫電玩節

大仁生活 於 2012-07-31 02:31:02 發表  |  累積瀏覽 747

分類:1天短線 漫畫 商場展覽 其他 ;地區:灣仔

攻略日期:2012-07-31

是次消費:每人平均約HK$ 30.00

今日係14TH ACGHK2012動漫節最後一日, 其實, 每年都係例行公事去行個圈, 愈來愈覺得無左之前一定要去嘅期望, 點解以前去就好鬼興奮? 不過, 今年有D唔同, 因為我想帶埋MR.雞去見識下.事關經過4年迪士尼洗腦式教育外. 過去半年我就每日給力式不停灌輸大量ONE PIECE, 戰隊, 幪面超人嘅知識比佢. 所以, 我預先話比佢知, 今日會帶佢去睇玩具, 佢阿媽就話:"佢依幾日都表現得好雀躍, 好似好期待想同你去玩喎!"

入場前有個哥哥派左個好似冒險樂園嘅代幣比佢.

佢話:"點解會有個一蚊送比我嘅?"

我話:"依個唔係一蚊嚟架, 係一陣入到場比你可以夾一次公仔架! 張入場卷你記得攞實呀!! (因為頭先係OK買左張飛後, 佢就一定要自己攞住), 因為無左張飛我地就入唔到場, 同埋唔可以去$1蚊扭蛋場扭蛋架喇"

佢話:"一陣間有得扭蛋架? 好呀!好呀!我最鍾意扭蛋架喇!"

入到場, 佢見到有個大叮噹, 又見到個電影預告, 佢就一面攬住個大吹氣叮噹一面眼定定都未睇得清楚預告就完左, 之後佢話:"個叮噹係波波嚟架, 軟林林架, 不過, 點解咁快就做完嘅?"

我就即時指住對面BANDAI個扭蛋場話:"係呀, 因為佢唔想阻住你去扭蛋麻?", 佢就即時雙眼發光:"扭蛋!好呀. 我好鍾意扭蛋!"

 

今年7月開始, BANDAI又再一次將D扭蛋加價, 依家扭個蛋幾乎大部份都係$16蚊, $24蚊一粒. 所以MR.雞一見到$24蚊嘅幪面超人話好靚嘅時候, 我就話:"依度D蛋要$24蚊好貴, 不如, 我地去排隊玩$1蚊扭蛋啦!" MR.雞話:"係呀!好貴呀"

果然不出我所料, $1蚊又點會有好野, 差不多全部死蛋, 所以連MR.雞都無乜興趣,  好難得佢先搵到個幪面超人嚟扭, 之後我話媽媽鍾意食壽司喎, 不如扭個壽司比媽媽啦, 佢話唔好, 咁我又話不如扭個漢堡飽比媽媽啦. 可能佢鍾意食掛, 所以佢即係入左個銀落去扭畀媽媽.

之後, 可能我走左去睇D佢唔識嘅野, 所以, 佢就同我講:"我地幾時走呀? " 我話:"如果你攰, 不如僕係我度瞓一陣啦" 於是我就抱住佢周圍行. 

當我行吓行吓, 行到去ONE PIECE 宣傳佢地個AR 遊戲卡個場嘅時候, 因為, 填資料可以有得送一張索柏卡, 所以我就停低, 當我一停低, 佢話大叫:"索柏呀!" 

 

 

 

哦! 原來, 佢睇佢唔識嘅野, 所以悶!!

 

所以, 之後, 我就帶佢睇下迪士尼, 幪面超人玩具. 行行下, 佢竟然記得同我講:"頭先呢...個哥哥呢...比左個$1蚊我, 我係邊度夾公仔呢?"

真係唔好低估小朋友嘅記性. 卒知, 我唔知搵左幾耐先搵到個檔口仔出嚟. 不過, 佢咁細個人仔, 唔好話控制個夾, 就連點襟個制都唔識啦, 不過, 有幾個制佢襟佢又鬼咁開心喎.

見佢咁開心, 我又乘機不停再一次同佢講:”不如, 你去同D COSPLAY姐姐, 哥哥影相啦!” 之前佢死都唔肯, 好似好驚咁, 我唔知係因為佢夾完公仔好開心, 定係個姐姐佢覺得靚, 所以, 即時走左去個姐姐度, 位姐姐又好識做咁話:”你嚟一齊影啦, 嗱!比個公仔你攞住影好唔好?”

不過, 全日MR.雞只係肯同依個姐姐影得一張相….

 

食完飯, 時間差唔多1點幾. 抱住佢聽到佢不停話:”睇完未呢爸爸? 我地幾時去公公度?”我估佢應該眼瞓, 所以就拍下佢, 拍得幾拍就瞓左係我度. 行晒成個場, 最最最令我有印象嘅係LEGO個場, 竟然, 有人用LEGO砌左我最鍾意嘅超合金出嚟. 嘩!! 真係眼前為之一亮, 點樣可以砌到出嚟嘅呢? 簡直鬼斧神工. 勁!!! 勁!!勁!! 我勁LIKE!!

 

雖然, MR.雞不嬲都算係瘦, 不過, 抱下抱下都幾係野, 所以, 我自己行多大半個鐘都係快快走人.

返到屋企我同MR雞講:”你今日去睇玩具開唔開心呀? (佢答開心), 不過, 我見你好似好悶咁, 不如, 出年你唔好去, 爸爸自己去好喇, 好唔好? 佢即時講:”唔好呀! 我要去, 我好鍾意去呀!”

咁今年我要教多D佢動漫野先得, 等佢出年駛得多D, 就無咁悶.

 

 

Facebook : https://www.facebook.com/hayakutang


鐘意SeeWide的分享,給我們一個Like吧!
  • 攻略日期:2012-07-31
    攻略地點:灣仔
  • 攻略時間:1-3小時
    是次消費:每人平均約HK$ 30.00
0人比"掂"

最多能輸入300字

累積瀏覽 934818

全部攻略 890

全部回應 2289