9 AUGUST 2014(SAT)
親子活動就最啱我，所以當大肥豬公司舉行嘅親子農莊體驗日時，我即刻話要報名，等小小豬可以學做小農夫、又翻泥又種小生菜，親親大自然嘛！
今日就我同小小豬整晒靚靚親子裝去玩啦~
今次我地依個親子農莊體驗係錦田一個有機農莊進行，其實即係HELLO KITTY農莊後面，再行大約15分鐘就到啦~
首先就係聽莊主PAUL叔叔講解吓有機農莊嘅運作，原來依一個農莊由規劃到動工，一手一腳係由PAUL叔叔自己整，好利害呀~
小小豬都好留心咁聽呀~
PAUL叔叔介紹左啲有機肥料，其實依啲係牛糞便同馬糞便嚟，不過經過處理之後就衛生左同冇晒啲味道呀~
雖然係冇晒味道，不過小小豬一聽到係"便便"，所以只係肯遠遠咁望一眼~
之後PAUL叔叔就介紹個大然防蟲器，入面有啲天然物料(我唔記得左個名)，係可以吸引啲蚊蟲入去，有得入冇得出，咁就唔會去咬啲瓜菜啦~
小小豬好有研究，仲不停問啲蟲蟲係邊度添~
聽完介紹之後，我地就可以去參觀農莊啦~
由於依家係夏天，都係啲瓜類當造，所以係農莊入面我地見到好多唔同種類嘅瓜瓜。小小豬見到啲瓜都好興奮，成日問我可唔可以即刻食，真係俾佢笑C呀~
參觀完之後，就到左小小豬最期待嘅一環節，就係去做小農夫學翻土，拎個工具就可以開始啦~
PAUL叔叔先教我地翻土嘅技巧，之後就到我地啦。小小豬一啲都唔似玩玩吓，佢仲非常認真添~
依個勤力的小農夫仲非常樂力，做到PAUL叔叔話休息佢都唔肯，仍然要繼續翻土。最後我就用小小豬最鐘意嘅事(當時係食嘢啦)，佢先肯停下來休息呀！
哈哈哈..為左今日依個活動，我地尋日仲整左好味芝士波波帶嚟食呀~
休息過後，我地就去種小生菜啦~
每人一盆小生菜，可以帶返屋企繼續種啦~
依個時候就係買有機瓜菜嘅時候~
既然一場嚟到，我地都買兩條涼瓜同栗米~
今日依個體驗真係好好，既可以感受大自然之外，又可以俾小小豬學做個小農夫，等佢知道農夫嘅工作，所以平日唔好浪費食物，咁就即係浪費左農夫嘅辛勞呀！
有機會都真係要多啲帶小小豬參加依啲農莊體驗，有嘢學又可以過一個充實嘅下午，真係好滿足呢！
其他博客區
※※ SINA ※※
※※ MyBB星級Blogger ※※
※※ She.com ※※
※※ WeShare ※※
※※ U-Blog ※※
※※ SeeWide ※※
※※ BlogSpot ※※
※※ BK Milk 親子語 ※※
※※ Cook 1 Cook 星級廚師 ※※
