喂))))大聲d啦聽唔到呀
係呀!
做乜咁耐唔見人
我晨早流流開始整紅豆栗子糕囉,今日天色唔好,件紅豆糕好難影啊
咩話?我以前整過,今次個食譜唔同架!係傳統食譜囉!
唔使整咁耐?個紅豆都煲成兩個幾鐘,然後仲要蒸丫嘛
有乜唔同?佢好味架!再加埋栗子,個紅豆自己煲香豆味好多囉!個食譜係事頭婆媽咪提供既
上次燒野食,事頭婆帶來比我地食,好好味
以前我整既用粟粉,今次用粘米粉,今次個複雜dd,要比心機煲紅豆囉
咩呀?整件嚟?有無食譜?
我新書既食譜都仲未諗掂,又寫食譜出來?等陣你地唔買書又話我個blog有,我仲使繼續有得寫書既?
下?你地唔會咁對我?係咪架先?
哼~~~~~睇下反應啦!反應好咪寫...............囉...囉..囉.囉..囉........
唔講住,我好累,係咁先啦!bye bye
蒸好時
食譜:
紅豆 半斤
粘米粉 300g
冰糖 隨意
栗子 一磅
1.先將紅豆洗淨浸冰水,煲一煲水大約1500CC至2000cc,,煲滾水後,紅豆隔走冰水,趁凍倒落滾水中煲,大火滾起轉細火煲2~3小時
(紅豆起晒沙溶晒就可以)
2.栗子乾身放入微波爐叮45秒,趁熱脫栗子層衣,呢個方法比煲既好,一摔就脫架喇!然後放入煲紅豆個煲裡面一齊煲
3.煲好紅豆後加冰糖,視付口味加冰糖
4.粘米粉遂少加水至成漿,倒入紅豆沙中攪勻,然後蒸45分鐘
放涼切件入雪櫃食得,哼
============================================
感謝 大少奶 提供以上資料
大少奶的網誌: http://iamtaisiu9.blogspot.hk/
大少奶的FaceBook 專頁:https://www.facebook.com/taisiu9
============================================