自從大少爺有濕疹後，原本我無打算要佢戒口，因為我從來唔知濕疹係咁樣
後來發現唔戒口唔得…結果要佢全面戒口
可憐的大少爺覺得自己最感懷身世既係…"帶飯"重現江湖
我都知叮完既飯點都唔太好食
但出街點都戒唔清
好似琴日咁，我問佢Lunch食乜
佢話：我專登揀豬肉食，食肉絲炒麵囉
我話：咁熱氣，你唔食得炸野囉！仲有肉絲炒麵有星球大戰既銀芽)))銀芽))
仲有菇呀
唉…
男人就係咁
如果你叫佢戒糯米，佢會食糯米雞當自己係食雞
你叫佢唔好食花生，潮洲粉果裡面粒花生佢會唔計囉
其實佢戒口對我好大影響，又唔煮得其他，又要煮最怕豬肉
跟住出街又要煮定
聽日我又過澳門兩日，要醃定肉餅比佢
不過…只要佢好番，我一切也願意
唯有晌佢上班期間，我獨自去偷歡，我謝絕你監管
所以午餐食蟹粥！Yeah~
噢！哼~
![]()
自從有Fissler高速煲，我開始多煲粥，因為以前我從來煲d粥都古古怪怪
自要浸完d米、放落Fissler高速煲佢8分鐘，排氣減壓
再加隻蟹、大頭菜粒、陳皮切粒粒、薑絲落去滾多10分鐘攪掂
當然你可以用普通煲慢慢去煲
不過…蟹粥來講…我覺得加少少大頭菜粒、果皮切粒、薑絲去煲好味！大頭菜粒已有鹹味唔需要加鹽
最後要食時加蔥同..................珍珍薯片！哈哈
============================================
感謝 大少奶 提供以上資料
大少奶的網誌: http://iamtaisiu9.blogspot.hk/
大少奶的FaceBook 專頁：https://www.facebook.com/taisiu9
============================================
