栗子炆排骨

30 OCTOBER 2013(WED)

今日行街市時，見到好多店舖都有栗子賣，見大家買得咁開心，我又跟風買左半斤。原本係打算整光波炒栗子，不過今日我又買左排骨，所以最後都係整左栗子炆排骨~

成個煮餸過程相信都係將栗子去殼係最困難，好在買返嚟嘅都已經去左大半個殼，我只係將下半部分去埋，之後用滾水過面浸約十分鐘，咁就可以比較容易清除晒啲栗子衣啦~

排骨用胡椒粉、生抽、糖、油和水拌勻醃好備用~

先將鍋下油燒熱，爆香薑片和蒜蓉，下排骨炒至金黃色後灒酒。

栗子略略兜勻，再下少少蠔油炒一陣，加水剛蓋過栗子和排骨，上蓋轉小火炆煮約二十五分鐘~

之後轉回大火煮滾，埋芡汁兜勻後，就完成啦~

其實依個餸我都係第一次煮，可能係兜勻栗子嘅過程我大力左少少，所以攪到啲栗子散散地，唔係完整嘅一粒粒，所以個賣相就差左啲，不過個味道都冇影響，因為大肥豬都話好好食，仲話可以再ENCORE添！

趁依家入秋係栗子當造季節，等我多啲整栗子先得！(因為我真係好鐘意食栗子呀...哈哈哈)

============================================

感謝 小肥豬 提供以上資料

小肥豬的網誌: http://kinseymama.mysinablog.com/

============================================