第十一屆Epson環保嘉年華

12 JANUARY 2014(SUN)

之前係MYBB.COM見到有第十一屆Epson環保嘉年華嘅入場卷派發，一向鐘意玩嘅我地，見個活動幾有意思又係近近地嘅尖沙咀，所以就登記拎入場卷。

好幸運地我地抽到入場卷，所以又可以去玩啦~

時間剛剛好，我地一到場就開始Rody健康舞活動，當然即係帶小小豬上去玩陣啦~

不過唔知係唔係一到步就開始活動，小小豬好似未WARE-UP好，開頭玩得唔太ENJOY呀~

可能OTTO見仔仔唔識郁，所以走過嚟教小小豬呀~

正當小小豬開始投入之時，原來已經夠鐘玩完依個項目啦~

嘩...玩完RODY仲有一大袋禮物呀，小小豬都不知幾開心呀~

係臨離開嘅時候，我主動請OTTO同小小豬影返張合照留個紀念。不過小小豬俾其他攤位吸引住，唔識望鏡頭~

哈哈...我都係第一次主動請藝人影相同埋傾計，OTTO都真係好NICE，影完相之後仲主動撩小小豬傾計呀(傾左幾句啦...因為小小豬掛住要去玩呀)！之後當我地去玩攤位遊戲時，剛好佢就離開，佢地主動同小小豬SAY GOODBYE呀！

玩完第一個活動，我地就周圍行吓，睇吓啲攤位遊戲先。今次主題係環保，所以場內有好多唔同機構嘅攤位都係以環保為主，等我地有得玩之餘，更可以學習到環保意識~

參觀完之後，當然要即刻去玩。第一個攤位當然係MYBB.COM，要嚟支持吓啦~

原本依個遊戲係需要將回收物品拋到回收箱內，不過因為小小豬唔夠力關係，負責人員好好，只係叫小小豬放入去就當佢完成呀~

第二個遊戲就係夾回收物品，睇吓佢兩父子玩得幾投入。雖然小小豬就唔算夠力夾個夾仔，不過教左一次之後，小小豬就識得依正確位置放好啦~

第三個遊戲就係釣走啲唔可以自然分解嘅廢物~

第四個遊戲就係環保對與錯，其實小小豬真係唔多明，不過負責叔叔好有耐心咁慢慢同小小豬講解，仲教小小豬放對與錯磁石呀~

第五個遊戲就係環保分類，估唔到小小豬係唔洗我地提示之下，自己可以好快咁完成，真係俾左我地一個小驚喜呀~

第六個遊戲就係環保車，不過其實依個遊戲我地都唔係太識玩，只係知道有得玩車....哈哈哈~

依個時候有唱歌表演聽，所以大肥豬同小小豬就去台前聽歌順便休息一陣~

我就去排隊拎扭扭氣球~

撞到兩個環保公仔又影吓先~

抖夠精神又再去排隊玩遊戲~

第七個遊戲就係去玩碌波波，雖然小小豬唔夠力拎起個扭扭架，不過佢都一樣玩得好投入呀~

攡位負責叔叔見佢咁努力，送左好多禮物俾小小豬呀~

 第八個遊戲終於到我同小小豬一齊玩，釣燈泡呀~

雖然係限時我地完成唔晒，不過負責姐姐好好人，一樣俾左好大堆禮物我地呀~

原來袋入面其中一份禮物係一本圖書，就係我地排隊嘅時候，小小豬拎左本圖書出嚟，話要講故事我地聽呀~

嚟到今日我地玩嘅最後一個活動，亦都係小小豬至鐘意玩嘅配對卡~

其實場內都仲有好多攡位遊戲，不過因為見小小豬都玩得開始攰攰地，加上夜晚又約左小豬媽食晚飯，所以我地就走啦！

雖然我地都只係玩左大約一半嘅攡位遊戲，不過我地戰利品都十分豐富，有好多都係顏色筆，今次小小豬有可以排畫啦~

之前都曾經去過類似活動，不過當時小小豬都係傻吓傻吓，又唔多肯排隊又唔肯參與。但今次見到小小豬真係有好大嘅唔同，既投入又肯參與(排隊時又唔扭計)，最後仲要唔願走咁，所以都令我地好驚喜。

既然小小豬鐘意玩，咁我地真係要留意多啲類似活動，帶小小豬去多啲，既可以有得玩之餘，又可等小小豬參與多啲社區活動，認識多啲唔同人與事嘛！

============================================

感謝 小肥豬 提供以上資料

小肥豬的網誌: http://kinseymama.mysinablog.com/

============================================