10 JANUARY 2014(FRI)
又大一個月，小小豬已經41個月大，下個月就三歲半了，不過唔知點解總係覺得小小豬一啲都唔似三歲半，就連係街上嘅人都成日問我佢夠三歲未？
究竟係小小豬個樣生得細個，定係佢嘅行徑俾人覺得佢細路呢？算啦...唔深究啦，總之小小豬開心健康咁生活就足夠啦！
為左慶祝41個月大，今日我地三口子就嚟左個大長征，其實係去同小小豬去覆診呀~
其實係小小豬返PN時，由於小小豬講嘢唔叻，所以老師都叫我地去睇吓，早啲知道問題係邊，可以作出訓練。所以最後就經健康院再轉介去大口環兒童醫院再做詳細訓練。
係評估時小小豬都係唔肯講嘢，所以最後醫生都同小小豬開左個CASE。大大話話依一年多內，我地都返左兩堂言語治療(冇錯..一年多只係兩次，依個咪就係政府啦)，之後一年後嘅今日就返去見兒科醫生。
點解要叫大長征？咪就係因為我地由屋企出發至去到目的地，大大話話都要大半個鐘，真係可以話搭車都搭到我傻呀！
我地約左兩點，但早左十分鐘去到，諗住早少少去到可以等小小豬WARE-UP吓，好乖仔咁自己睇圖書呀~
點知等左兩點半先見個醫生行入診所，覺得有啲過分囉，如果兩點半先開始接見，咁就唔好約我地咁早啦！(真係十個嬲呀！)
到我地見醫生個過程亦十分簡單，全程都五分鐘都冇。問吓小小豬日常生活同返學情況，到檢查小小豬時，都只係聽吓心跳同摸吓佢身體，最後都只係問左一個問題，就係小小豬叫咩名，真係何其簡單。之前又話小小豬言語弱，咁點解都只係問一個問題呢。真係完全摸不著頭腦呀！
醫生話小小豬大致都OK，所以都唔係做特別訓練，一年後再嚟覆診。
來回搭車三個鐘，等又要等半個鐘，見醫生都只係三分鐘，一年後又要嚟，真係有啲驚呀！不過大肥豬話都一年都係辛苦一次，始終開左個FILE，有人跟吓都未嘗唔係一件好事。
辛苦過後，我地去左間舒服餐廳食左個好味TEA，好好抖吓呀~
個麵包雪糕真係又靚又好味，雖然係見醫生過程都嬲嬲地，不過見到個靚麵包心情都好轉返啲啦！
============================================
感謝 小肥豬 提供以上資料
小肥豬的網誌: http://kinseymama.mysinablog.com/
============================================
